A Jesus Kristo a Mekreos el Chad

Sera 1907 a merau el chad ra England el ngklel a George Herbert, el Ongeim el Earl er a Carnarvon,¹ a millukl el mo er a Egypt e mlo semeriar er a uerel a archaeology. Ng mlo mesang a merael a chisel el Egyptologist, el Howard Carter, e olengit mel bol dak loureor. A ngerchelel a Carter a mo omes a urelel a ikel omengiis losiik reksi ra irechar, ea Carnarvon a mo oltobed a udoud el kirel.

Me sera ledak loureor e te kmal mlo ungil lomes a kakerous el basio. Ma le uaisei, e te ngiluu a kengei el mo mengiis er sel Valley er a re Kings, el kmeed er sel basio el ngii a Luxor er a chelechal taem, el debellir a rebetok el pharaoh a bla le betik er sei. Te tilbir el mo osiik er sel debellel a King Tutankhamun. Tutankhamun a ngilasech el mo er sel kingellel a Egypt er a chelsel a betok er a edei el telael el rak ruchei e milerredel el teruich el rak ruchei er a meang el kodellel.² Ng klemedengei el kmo Ngii a mlo delekull er sel Valley er a re Kings,³ eng di ngdiak lungil medengelii el kmo ngarker a debellel.

Carter me a Carnarvon a chiloit a eim el rak e dimlak a tal betik er a debellel a Tutankhamun. Meseikid a Carnarvon a melekoi er a Carter el kmo ng mo merek el meruul er tial lureor. A Carter a ulengit mel di luut el tal taem el mo mengiis, a Carnarvon a dimlak el sal soal engdi ng kilengei el mo otobed a udoud el kirel.

A Carter a mlo medengei el kmo sel chetemel a Valley er a re Kings a kmal blo lungil kisii—engdi sel basio el blel camp er ngii a dimlak. A uriul er a sesei el klebesei er a lekisii, e te miltik a terebel el merael el moriou el mora debull.⁴

Mesera Carter a lomes er a chelsel tial basio er a chelsel a debellel a Tutankhamun, eng miles a betok el kolt. Ng mlo kmeed er a chelsel a edei el buil el lolusech el kirel a ikel klalou el mla er a chelsel tial delmerab, e milkengii sel chesmerel a delmerab er a debull er a Ongeru el buil er a 1923—el mla mo dart er rak ra memong. Tiang sel mlo kot el merael a chisel el tekoi er a archeology er a cheslel a 20th century.

Chelsel a ikel rak el blel meringel losiik, ea Carter me a Carnarvon a dimlak el lodesuii sel basio el blel dechor er ngii. Locha eim el centuries uchera cherellel a Osobel, ea profet Jacob er a Babier er a Mormon a milekoi el kmo sel diak doureng a saul malechub ngdiak dungil mes a kmeed er kid a diua ulemes “lengelakl er a olangch.” A Jacob a milsa el kmo a rechad er a Jerusalem a mo diak el dengchii a Messiah sera Lemei. A Jacob a ulemlaoch el kmo tirka tirkel [chad] el diak el sorir a beot el tekoi … e bai [mo osiik] a ikel ngii a diak el sebecherir el mo medengei. Meng milkolk losengir a uchul, e ngii el ilkolk a mlo er ngii e le te ulemes lengelakl er a olangch, me te mo reuebet.⁵ El belkul a kmo, te mo mesibas.

A ulochel a Jacob a mlo klemerang. Sel temel a urerel a Jesus er tial beluulechad, eng mle betok a ulemes lengelakl er a olangch, e lengelakl er Ngii. Te ulemes el lengelakl er a Osobel er a beluulechad. Meng bai dimlak el lomtab a ikel Urerel el meruul a ikel uldesuel a Chedam er a Babeluades, e te bai kilebsengii e Milkodir. Te ulsiik e mengiil er a tara chad el mo olsobel er tir.

Di ua rechad er a Jerusalem, me a Carter me a Carnarvon, kid meng dirrek el sebeched el lomes el lengelakl er a olangch. Ng kired el mo kerekikl el kirel tial omeruul me lak dobes er a Jesus Kristo er a chelsel a klengar er kid e diak bo domtab a ikel betok el klengeltengat el Ngii a odars el merkid. Kede ousbech er Ngii. Kede mla mellach el mo ultuir “re ngii el ngarngii a klisichel lolsobel.”⁶

Ngii a olengcheled. A lsekum meng mekngit a uldesued el kmo ngarngii a usbechall el kirel a kmong ngerang el engelakl er a ikel Ngii a odars, e kid a bai tomer malechub e kede mengesadel a klisiich el Ngii a sebechel loia er a chelsel a klengar er kid. Ngii a obang a klisichel a klechubechub e odersii ngii el klechubechub el merkid.⁷ Ngii a meral uchul “eng [kired el mo er ngii ] el mo ouchel a rengud.”⁸ Ngii a meluluuch er a Chedam el kired e oldubech a ikel kekedel al soal a Chedam: me kid a lmuut el mo er Ngii e mo nguu a Rengedel. Meng kired, el uai sel tekingl a profet Alma, berekii osengiu e bo momuchel loumerang er a Ngelekel a Dios, el Ngii a mei el mo olsobel er a rechedal, e ngii a mo chuarm e mad el mo melngakireng a kengtid; e ngii a mo lmuut el mekiis er a kodall, meng morngii a okisel a kodall.⁹ A Jesus Kristo a mekreos el chad el merkid.

A Osobel a mla meskid a betok el teletael el mo ngarngii a rengud el omes el bedul Ngii, luldimukl er a techall el mo ouchel a rengud er a bek el sils. A le bebil er a taem eng diak domekerreu er a ututelel tial mla modars el klengeltengat. Sera le eai a rekik, ea demak a mlo tochelbak. A uriul, e ak kulereked er a chimal ra ki bo miull el mo er a bitang er tial meseked el rael. Ng dimlak kungil lomes me a kulemakes el tuobed ea klou el torak a meremang. A demak kilersak, mak mlora bkul a rael. A lsekum meng dimlak el kursak, e ak miltulech er tial torak. Leng di ngak el medengelii a telkengelek, e a kulmedasu, “Nglocha bai mle ungil tial torak a lokodak e leng diak el sebechek el mo beches el ua chelechang er a uriul er ak metecholb.”

Me sel eai a rekik, eng mle chebirukel a uldesuek el kmo a ralm er a techolbechlid a uchul eng mo diak a klengit. Ng di ngdiak el uaisei. A ikel rak ruriul er ak metecholb, e ak mla mesuub el kmo a klengit a mo diak lokiu a klisichel a Jesus Kristo loba melngakireng er Ngii sel doruul e doltirakl a telbilel a techolbechelid.¹⁰ Ma leuaisei, ngokiu a sengk er a ouchel el reng, eng sebeched el melemolem el beches. Ak dirrek el milsuub el kmo a sakrament a meskid a mesisiich el kldung el mera chelsel a klengar er kid, me bol sebeched louchel a rengud el kirel a kengtid .¹¹

El di uai ikel mekreos el klalou el mlara cheungel a ochil a Carter me a Carnarvon, ea ikel mekreos el klengeltengat er a sakrament a ngarngii el merkid sel bek el taem el de bora sakrament miting. Kede mla yaksok el kmo a Chedaol Reng a mo blechoel el keldemed a lsekum ke de mo chemau a sakrament el diua teletael sel ngkel beches e obult el chad a mo chemau a techolbechelid ma omengedaol, loba chelam el reng ma ngariou el reng, me a duch el reng el mo oltirakl a telbilel a techolbechelid. A Chedaol Reng a omekngeltengat er kid loba klikiid el Klisichel me bol sebeched el ouchel a rengud, er a bek el taem.¹²

A chedaol dodai er kid a mo mesisiich lokiu a ouchel el reng e keldmokl e klikiid el mo melai er a sakrament. Ng di okiu a mesisiich el chedaol dodai eng sebeched el mo chemau a ikel domekesiu el teletael el chull, eolt, me a ieleb er a chelsel a klengar er kid.¹³ E sel kuk bitang, ea chedaol dodai er kid a mo mechitechut sel lak de bora sakrament miting malechub ea uldesued a diak el bedul a Osobel sel temel a sakrament. Kede locha diak el ngarngii a rengud eng di kede mo “mengeroid er [kid] er a Reng er a Rubak, meng mo diak el ngar [kid] lomekrael er [kid] er a rolel a mellomes luldasu, me [kid] bo dengeltengat, el ungil besud, e keldmokl.”¹⁴

Sel dobang a Chedaol Reng el lobengked, e kede mo oba ulekrael llomes e mukrael el mo meruul e oltirakl a bebil er a telbiil, el uai a ikel doruul er a templo. Me sel doruul a ikang ea deleuill er kid lobengkel a Dios a mo dmolech.¹⁵ Kom locha mla omtab el kmo ng betok el beches el templo a bla louchais er a ikal dirk mlo merek el rak, me a templo bo lekeed el mo er a rechedal a ikelesia.¹⁶ E sel kuk bitang, ea templo sel bo dil beot a debo er ngii, eng locha mo beot er kid a debong ma lak. Se le cheroid a templo, e kede sikii a taem ma ikel dousbech el kirel a omeroled el mo er a templo el mong e ngara omengull. A ikal omerael a mo kot el ngaruchei el doruul.

Sel keed a templo, eng sebechel beot a debechei a mekerei el tekoi me bo longesang er kid meng diak debong, meng di kid el melekoi er kid el kmo, “Ng, sebechek el kuk di mong ra tara taem.” A dekiei el kmeed el mo er a templo a rulii meng sebechel beot er kid a sikii a taem el mong, eng di tiang a dirrek el sebechel rulii meng diak doureng a saul el kirel a templo. Me sel deuaisei, e kede “imiit er a olangch,” e diak el blak a rengud er a techall el mo melisiich er a deleuill er kid el mo ra Osobel el ngara chelsel a chedaol el Blil. A dechal a rengud el mora templo a kirel mesisiich sel le keed a templo el di uai sel cheroid.

A uriul sera Carter me a Carnarvon a longiis er sel Vally er a re Kings losiik er a debellel a Tutankhamun, e te mlo metebengii a ikel dimlak el ues. Ng diak el kired el terrekakl a urered, el uai tir el mlo melai a taem, el mo osiik a mekreos el klokled. A lechub e dosiik a ngeseu ra ikel diak dodengei el basio, el ngii a domdasu el kmo ngii el ngeseu a kot el ungil ra ikel ngii a sebeched el ngmai er a ngariou a rengul profet er a Dios.

Uai sel llechukl er a chelsel a Chuodel el Renged, sera Naaman losiik a kerul a chebedes el mla er ngii, engdi ngii a mle kesib a rengul sera ledu er ngii me bo el euid el taem le bo lolduleb er a omoachel. Engdi ng mlo oltirakl er a omelkingel a Elisha e bai dimlak el ultuil er a di uldesuel el kirel a odbechel tial ongasireng. Ma le uaisei, ea Naaman a mlo mechubs a bedengel.¹⁷ Sel doumerang er a profet er a Dios el ngar tial beluulechad er a chelechal taem, e kede mo metik a deurreng, ekid meng dirrek el sebched el mo mechubs. Ng diak domes el bedul a ngidil ngerang.

Rodam me a rodos, ak mengemedaol er kemiu el mo blechoel melatk e omes el bedul a Jesus Kristo. Ngii a Osobeled e mo Olsobel er kid, el “olangch” el kired lomes kirel, e kot el mekreos el chad er kid. Sel bo er Ngii, e ko mo nguu a klisiich el mo chemau a ikel olibesongel er a klengar, e mo ngarngii a blakerreng el mo meruul a llemalt, me a klisiich el mo meruul a ureriu er a chelsel tial klengar. Bol mekreos a rengmiu el kirel a techall er a ouchel reng, omolai er a sakrament, sel klengeltengat el meruul e oltirakl a telbiil er a templo, e oldeu el mengull er a chelsel a templo, e ngara deurreng el ngarngii a ngar el profet.

A kuuchais e kmal sioning el kmo a Dios, el Diak a Ulebengelel Chedam, a Demad er a Babeluades e Ngii a ngar; Jesus a Kristo; Ng di uai kid, el mellomes a rengul Sechelid er a babeluades,¹⁸ e tia mla moluut el Ikelesia er Ngii. Ko mesulang er a klaumerang me a keldung er kemiu. Ak meluluuch me kemiu bom ngeltengat, e ungil besemiu, e keldmokl, el ngara ngklel a Jesus Kristo, amen.