Beltikerreng a Dolchesiu er Ngii Tiang

A rengeleked er a Primary a mengitakl, “Beltikerreng a Dolchesiu er Ngii Tiang.”¹

Ng mle tal kbsang a Sister Gong a kekerei el locket. Ak lilechesii a cheslel dot-dot, dot-dot, dot-dot-dash. Tirkel medengei a Morse code a mo metebengar a ikel letters el I, I, U. Engdi ngak a lilechesii a ongeru el code. El Mandarin el tekoi er a Sina el, “ai” el bekul a “beltikerreng.” Ma le uaisei, e ak lilechesiii tial tekoi el erul taem, el llechukl el kmo “Ng betik a renguk er kau.” Susan Sweetheart, “I, ai (爱), U.”

Kede melekoi a beltikerreng el lousbech a bekbedengel a tekoi. Te mla subedak el kmo a rechad el kiei a melekoi a 7,168 el usbechall el tekoi.² Chelsel a Ikelesia e kede melekoi a 575 el tekoi, lobengkel a betok el kakerous el lomelekoi. Kede dirrek el mengedecheduch a ngara rengud, smisichii a omsodel, me a domelchesiu lokiu a sunga, chelitakl, ngloik, olangch, me a obengterir a rechad.³

Chelechal sils, e dongedecheduch a teletelel a edei el tekoi ra ebangkelio ra beltikerreng: tekoi er a delmedemek me a omengull, tekoi er a omesiou me a ringel, me a tekoi er a telbiil.

Kot, tekingel a ebangkelio el kirel a delmedemek me a omengull.

Ngoba delmedemek me a omengull, ea Sister Gong oker er a rengalek me a rengeasek el kmo, “Kom mekerang e medengei el kmo a demam me a delam me a telungalek er kau a betik a rengrir er kau?”

Ngara Guatemala, ea rengalek a kmul uasei, “A demak ma delak a meringel loureor mel ngarngii a kelir a telungalek er kemam.” Ngara Diluches er a Merikel, ea rengalek a kmul uasei, “A demak ma delak a menguiu a cheldecheduch e ngosukak el mo mechiuaiu.” Ngara Chedaol Beluu, ea rengalek a kmul uasei, “A demak ma delak uchul mak selbechakl.” Ngara Ghana, West Africa, ea rengalek a kmul uasei, “A demak ma delak a ngosukak er a ikel urungulir a Rengalek me a Rengeasek.”

A tara ngalek a dilul el kmo, “Meng locha kmal mesaul a bedengel sel bol merek el oureor, engdi a delak a meriikr e milil lobengkek.” A delal a lilangel er a renges el kmo a ikal ringel el chau er a bek sils a ngarngii a belkul. A ngeasek el dil a dilu el kmo, “Meng locha ngak ma delak a kautitekangel a lebebil ra taem, engdi ngak a oumerang er a delak.” A delal meng dirrek el di lilangel.

Sel bebil er a taem eng kired el mo medengei el kmo a beltikelreng el dolchesiu er ngii a morrenges e mereng a sulel er tiang.

Loba delmedemek me a omengull, ea sakrament er kid me a bebil er a miting a di bedul a Jesus Kristo. Kede mengedecheduch loba omengull el kirel a Tngakireng er a Jesus Kristo, eldi kid e ngara rengud, e diak el dil Tngakireng er a uldasu. Kede omekedong er a mla moluut el Ikelesia er a Jesus Kristo el oba ngklel, el Ikelesia er a Jesus Kristo er a Uriul-klebesei el Santo. Kede meluluuch el oba omengull sel domekedong er a Chedam er a Babeluades e ungil kakekull sel dechadecheduch er a delongeled. Kede medengei el kmo a Jesus Kristo a kot el klou a ultutelel el telengtengil a telbiil er a templo, me kede mo diak desal melekoi el kmo “mo er a templo” e bai mo blechoel melekoi el kmo “mo er a Jesus Kristo el ngara blil a Rubak el Dios.” A bek el tebiil a melekoi el kmo, “Beltikerreng a Dolchesiu er ngii er tiang.”

A rebeches el chedal a Ikelesia a melekoi el uaisei a tekingel a Ikelesia a blechoel lousbech a decoding. Ng tuobed a cherid sel domdasu el kmo a “stake house” a sebechel belkul a kerebou el odoim; “ward building” a sebechel belkul a osbitar; “opening exercises” a sebechel rulid elmo ouedikel a btelud, ongelngeled, bkul ochid, ma chedngelel ochid el ngara parking lot er a Ikelesia. Engdi, kulengit, mebo de kaingeseu e dungil kadecheduch sel dosuub a beches el tekoi e loba beltikerreng er a delongeled. Ng ketengel mera Ikelesia, ea beches el chedal a ikelesia a le dilung er ngii el kmo a sailengel a kmal kedeb. Ng bai dimlak el ngasech a rengul, e ulnger, el uasei, “A renguk a mla obult; ma kulengit el bol meklou a rengmiu e ngak a direke mesuub a urerel a klaumerang er ngak el uai a bail el kubail.”⁴

A tekoi el dousbech a sebechel lokedid malechub eng choridid er a rebebil er a re Kristiano me a resechelid. A le bebil er a taem e kede mengedecheduch el kirel a urerel a misionari, ureor er a templo, urerel a olngeseu er a rebebil meng rulterir a rebebil mo omdasu el kmo ngdi kid el meruul a ikal ureor. Bo de blechoel mengedecheduch loba delmedemk me a omengull lomereng el saul el kirel a urerel a Dios me a klebkall me a chetengakl, me a krasia er a Jesus Kristo me a tngakireng er Ngii.⁵

Ongerung, a tekoi er a ebangkelio el omesiou me a ringel.

Sel bo de luut el dmak el kldibel er a ikelesia er a bek el sandei e mo ngara deurreng er a Chedaol sils, eng sebeched el ochotii a blakerreng er a kid er a telbiled er a sakrament el mo er a Jesus Kristo me a rebebil er kid el okiu a derucheled er a Ikelesia, klausechelei, e obengterir a rechad, me a omesiou.

Sel kuker ra remerredel er a Ikelesia el kirel a ikel le simbai er ngii, ea rodam me a rodos a di diul melekoi el kmo, “A bebil er a rechad ra ikelesia a diak el kengei el ngmai a okedong er a Ikelesia.” A okedong el mo mesiou er a Rubak ma rebebil er a chelsel a Ikelesia er Ngii a techall el mo omdois a beltikerreng, klisiich, ma delmedemek el reng. Mesel bo de moterekokl er a ngerachel, eng sebeched el ngmai a ulekrael luldasu er a Rubak el mo mengider e melisiich er a rebebil me kid. Ng uaisei, a ngeldengodech el teletael me a temel a klengar er kid a sebechel ngarngii a rellii er a klisiched el mo mesiou, ngidi lak el bol ngedechii sel soal a rengum. Ke dobengkel a King Benjamin, e kede kmul uasei, “Ulekum meng ngarngii eak msang”⁶ e odars a ikel rokui el sebeched.

Remerredel er a stake me a ward, bo deruul a ikel ngerecheled. Sel domekedong (e melubet) er a rodam me a rodos el mesiou er a Ikelesia er a Rubak, e kulengit me doruul loba llemalt me a ulekrael llomes. Molngeseu er tir me bo lolchesuar el kmo kede mereng a sulir e sebechir el kmal mo meduch er a urerir. Kulengit me mongedecheduch lobengterir e morrenges er a rodos el merredel. Bo dolatk, er sel lulsisechakl er ngii a President J. Reuben Clark el kmo, chelsel a Ikelesia er a Rubak e kede mesiou er sel de mukedong er ngii, “el diak sel dosiik er ngii a lechub e dekotouar er sel beskid a okedong.”⁸

Sera Sister Gong me a ngak er aki bo bechiil, ea Elder David B. Haight a milellach: “Bol blechoel ngarngii a okedongem er a Ikelesia. Sel sal mo meriked a klengar,” eng dilu,“ng kirem el mo omelchesuar er a beltkil a rengul a Rubak el mo er tirkel mosiou er tir me a mo er kau sel mosiou.” Ak yaksok el kmo a beltikerreng el dolchesuar er ngii tiang, me sei, me a ngidil ker sel de kengei er a remerredel er a Ikelesa el mo mesiou er a Rubak er a chelsel a Ikelesia er Ngii lokiu a Chedaol Reng er Ngii me a telbiled.

A mla moluut el Ikelesia er a Rubak a sebechel basio el mukeroul a beluu er a Zion. Me sel dongull, e mesiou, e oldeu a rengud, e dmak el mesuub er a Beltkil a Rengul, e kede omak er kid er a ebangkelio er Ngii. Kede locha diak de kengei a tekoi er a balatiks a lechub a tekoi er a buai engdi ng sebeched el metik a budech sel dedak el mengitakl el chedal a chelitakl er a ward. Kede kaukeroul e kaingeseu el diak dongeroid er kid sel de blechoel ngarngii a rengud el mo oldingel a blirir a rebebil me a bouai.

Sera temel oldingel lobengterir a remerredel er a stake, e ak mlo omelchesuar er a dmolech el beltkil a rengrir el mora rechedal ikelesia er a ngidil tekoi el chau er ngii. Sera ki momekall el engelak a obliil el ngara stake er ngii, ea chimo el stake president a milekoi el kmo a de kiei er a blai el ngarngii a swimming pool malechub a blai el chutem a ulolel, ea omesiou er a Ikelesia a techall el blechoel el uldimukl er ngii a ringel. Uaisei, ngii a mlo ungil metebengar el kmo, sel dosiou e dmak el chemau a ringel er a ebangkelio, e kede bai mes a mekesai el klechitechut e bai mesa a klou el budech. Me sel de becherei, ea Jesus Kristo a ngosukid el melchesuar a tekingel er a Beltkil a Rengul er tiang.

Tial summer, ea telungalek er ngak a mle kebtech lobengterir a rungil rechedal a Ikelesia me a resechelei el ngara Loughborough me a Oxford, England. Aikakid el ngarngii a belkul el ongdibel a ulemeklatk er ngak el kirel a omilil er a ward me a omesiou a sebechel lomekdubech a beches e mesisiich el deluill er a ebangkelio. Ng mlo melai a taem e ak kulmelchesuar el kmo, chelsel a betok el basio er a Ikelesia, ea lmuut el bebil er a omilil er a ward el blal tib e kongei loba moktek er a ebangkelio, a sebechel lomak er kid el mo dmak e mo ngara kltalreng.

Oba ulekrael llomes a chad loungerachel a omilil er a ward ma rolngeseu a ngosuterir a dersta el chad me a cheldelir a re Santo. A ungil telib el omilil a ngosuterir a rokui mete mo omelchesuar el meklou a belkrir, e ngara belsachel, e siotai elmo meruul a usbechall el ngerachel. Aikal omilil a omuchel a deluill er a delongelir a rechad el kakerous a rekrir me a kakerous teletelel a klechad, el uchul meng diak el lobes, e sebechel meruul el di kekerei a itel a udoud ma lak. A ungil omilil er a ebangkelio a dirrek el siotai er a rechad el kmeed er kau me a resechelei.

Omilil me a omesiou a blechoel dmak el loureor. Rengeasek el rechad a lsekum kmal soam el mo medengelii a chad e bom dechor er bita er ngii el ngara changaridang e mdak el mengesebereber mel ngarngii a belkul a teletael er a omesiou.

siasing/Llecheklel

Rengeasek el rechad el mesiou el mengesbereber.

Ng uaisei, ngdiak a dersta el chad me a telungalek el cherrungel. Ng kired el rokui el kaingeseu el mo ungil a blekerdeled e olecholt a beltikerreng. “Cherrungel beltikerreng oriid a rokui el dakt.”⁹ Klaumerang, omesiou, me a ringel a ngosukid meng diak di domdasu er kid e bai mo omes el bedul a Osobel. Sel de meral lou beltikerreng, oumerang, e mesiou e ngara ringel el di Kirel, e kede meral mo medengelii sel diak a ulebengelel me a melngakireng el beltkil a rengul me a krasia er a Jesus Kristo el merkid.

Me tiang a ngoikid el mo er sel tekoi er a ebangkelio el telbiil.

Kede kiei er a beluulechad el rechad a bechelechlingaol a rengrir e di omdasu el kirir. El bekl el taem e te di tir el uaisei “Ak ngiltak.” Ng kora uai ea lsekum ngdi kid el medengeii a ikel soad e mekerang a bo dolai .

Ngdi sei a diak el klemerang. A Jesus Kristo a olechotel tial mesisiich, el klemerang:

“Le ngidi chad el mo olsobel er a klengar er ngii a mo oridii: e a oridii a klengar er ngii el kirek a mo metik er ngii.

“Ngeral klungiaol a lenguu a chad [a lechub eng redil] a lsekum ,ng korekerengii a beluulechad er rokir, e oridii a klengar er ngii?”¹⁰

A Jesus Kristo a odersii a ungil teletael—el deluill a mlokdubech er a chedaol telbiil, el mesisiich er a kodall. Telbiil el lobengkel a Dios me a rebebil a sebechel omekungil e mengikiid er kid me a ikel kot el mekreos el deluill er kid. E sel klemerang, a Rubak ungil medengelkid e lmuut el betik a rengul er kid ra bai sel kuk dil kid ma klechad er kid. E sel klemerang, sel desiseb er a chelsel a telbiil, eng sebeched lmuut el ngosechekl el mo er bab. A klisichel me a llemsel a Dios a sebechel lomekngeltengat er kid lolab a bek el ungil sengk, el ultuil er a Temel me a omerelel.

Generative artificial intelligence (AI) a meral mla sumecheklii a oidel a tekoi. Mla remiid a ikel taem el computer a oidii sel dmolech a belkul tekoi “A reng a sebechel, engdi tech a mechitechut” el ua “A bilong a ungil, engdi a tech a mla mo beraum.” Mengasi reng, le sel momelekl a betok el okesiul a tekoi a osisecheklii a computer er a tekoi e bai kmal lungil a usbechelel ra bai molsisechakl ra computer er a teletelel a omelchesel.

Osisiu, ea kuk dil kid, e lomelekl a teleteled a locha sel kot el bkul rebab el chedaol teletael el mo mesuub a tekingel a ebangkelio er a delmedemk me a omengull, omesiou me a ringel, me a telbiil.

Ma le uaisei, e ngarker e mekerang a Jesus Kristo a longedecheduch er kau e loba beltikerreng?

Ngarker e mekerang a omrengesii a Beltkil a Rengul e domelchesiu er ngii tiang?

Bol sebeched el mesuub el mo mengedecheduch e orrenges er a Betlkil a Rengul er tiang, er a chelsel a rengud me a re ke blid, me a okedonged er a ebangkelio, omilil, odkngeled, me a dosiou.

Tiang a moktek er a Rubak, el kid a mo mad e lmuut el mo Obengkel. E sel bo desang a Rubak, e ak ombeberrous er Ngii el melekoi, a tekoi er a olisechakl me a yaksok, “A Beltkil a Renguk a momelchesiu er ngii er tiang.” El ngara chedaol ngklel a Jesus Kristo, amen.