Rodam ma Rodos el ngara Kristo

Betik e ra renguk el re sechelik, kede melchesuar ra tokubets el longdibel er chelechal sils. Kede rokui el melchesuar ra Reng e ra Rubak ma beltikelreng reng er Ngii e lokiu ra ikel lungil el klumech el lomeskid a re meredeled. Ak dmeu a renguk el mo mengedecheduch er kemiu er chelechal kesus el mo merekui er tial longdibel. Ak meluluuch ma Reng ra Rubak e lolemolm e lobengked e de ngara deurreng el dmak el meral rodam ma rodos el ngara Kristo.

A betik e ra rengud el profet, Russell M. Nelson, a milekoi: “A kumekedong er a rechad er a ikelesia ra bekl el basio elmo muchel el mo mengoit a teletael me a omeruul er a ongarm. Ak kulengit er kau me bom moltaut a tekoi ra omengull el kirir a rokui el ngelkel a Dios.”¹ Ng liueklii a beluulechad el rokir e melmolm el lomdois tial Ikelesia, e oltirakl er tial siotai el mlara profet er kid a orechudel e ketmekill el kirel a okedecherul a rengedel a Osobel e ra bek el beluu e ra beluulechad.

A ebangkelio ra Jesus Kristo a olisechakl el kmo kid a rokui el ngelekel a reng el re sechal ma redil lokiu a rechad ra blid ra babeluades e tir a meral betik a rengrir er kid² e kid a mle kiei e longalk e ra medal a Dios e ruchei ra de mechell el mei er tial beluulechad. A ebangkelio dirrek el lolisechakl el kmo kede ulbeob el di ua medal ma teletelel a Dios.³ Ma le uaisei, e kede rokui el diosisiu ra medal,⁴ leng Ngii “el mla kutmeklii meng di chimol rasech el ngara bekl el beluu me a rsechal [ma redil].”⁵ Ma le uaisei, e kede rokui el di ngarngii er kid a chedaol blekerdeled, dikesed, ma klisiched, leng ngarngii a “di chimol Dios e Demad el rokui, el ngarbab e ra rokui, el molmuut er a rokui el tekoi, el me [er kid] el rokui.”⁶

Mesel doltirakl e ra Kristo, e te siotai er kid el meleketek a klaumerang er kid el kirir, e ou beltikelreng el mora, re bebil ra rodam- ma rodos er kid ra reng el meral mo smau a rengud el mo tang e kau beltikelreng, e diak el ior ra klekakerous er kid, luchul e kede mengai el meleketek el mo sebeched e lokiu omengull e deues a rengrir a rokui el sechal me a redil el ngelekel a Dios.⁷

Seng diak el blel losisiu el teletael el tirkel chad e ra Nephi a milchesuar er ngii el kmeed el lerul senturii ra uriul ra Kristo ra bo loldingel er tir?

“Eng meral dimlak a rengara deureng el chad el mo uai tir er a chelsir a rokui el chad el mla obeob er a chimal a Dios …

“Me a lechub el blarngii a re Lamanites, me a ka di le ngodech el cheldebechel; te bai di mlo tang el ngelekel a Kristo, el telechull er a mo ra rengedel a Dios.

“Me te meral mle ngeltengat!”⁸

A President Nelson a liluut el smodii sel lultutelel a domerek ra omengull el bedul a rebebil er kid sera le dul kmo: “A Ulemeob er kid el rokui a omekedong er kid elmo imikl a mekngit el lomilkinged el kirir a ngidil chelchad el ngelekel a Dios. A ngidil ta rekid el mekngit omilkingel el kirel a tara chelchad e kirel mo uchul a rengul! … Ng kirel a derta er kid el mora ikel sebechel ra ikel de ngarngii el louedikel el lodersii a omengull el mora rokui el ngelekel a Dios.”⁹ Ea klemerang, a klechad ra chad a ultuil ra omengull el kirel a mo kle kakerous er kid.¹⁰

Domes a ikel chedaol el deliongel el lomsau er kid el lobengkel a Dios el ngelekel, tial rael lokiu ra ulauch el mlodars e ra President Nelson a diak el cheluid el dodai el bakes el merael bedul a okedecherur a didelboi ra omengull ra bai dongetmokl a kbekbel a mekikiongel lomilkinged ma dorakl er kid.¹¹ Meng uaisei, el ua Paulus e ra lomeklatk e ra re Ephesians, kid a kired el mesang el kmo alsekum meng kired el ngoriakl ra uai tial moktek, eng mocha kirel ngerechelel a dertal chad el mobang a kle ngariou el reng, chubechub, me a kllou el reng el mora re bebil.¹²

Ngarngii a cheldecheduch el kirel a tal rabbii ra Yudeya el luletkeu er a ngesechel a sils lobengterir a terung ra re sechelil. Nguleker er tir, “Ko mekerang e medengei sel sekum a klebesei a mo merek e a llomes a kuk omuchel?”

A ta er tir e ulenger, “Sel sekum eng sebechem e lomes el bedul a diluches e ke mesang a kle kakerous e ra sib ma kaming.”

Ngkel kuk tang a ulenger, “Sel sekum eng sebechem el lomes el bedul a bital beluu e mesa kle kakerous e ra kerekar ra olive ma kerekar ra fig.”

Me tobult el mor ngikal mellomes el rabbi e oker er ngii ra osisiu el ker. Kelteketel lomdasu, e ngonger, “Sel sekum eng sebechem el lomes el bedul a diluches e mesa medal a redil malechub a medal a sechal e kmul kmo, ‘Ngke ochedak; ngke odam er ngak.’”¹³

Betik e ra renguk e re sechelik, ng sebechek el subedemiu el kmo sel llomes e ra beches el sils a omekllomes el tmuich a klengar er kid sel sekum e kede mesterir e ungil ra re bebil er kid e loba omengull ma ungil blekeradel el meral lodam ma rodos el ngara Kristo.

Sera le temel el losisechakl, ea Jesus a mlo ungil mechesngar tiakid el losisechakl sel “lorael el meruul a ungil tekoi”¹⁴ el mora rechad, siotai er tir mel Rengesii el lenguu a beches el klengar, el diak el ior ra kmo te reua techang, deruchelir, malechub eng siukang er tir. Ngii a milesiou, omekungil, e di mle blechoel el lorenges ra rokui el chad e ra ikel lousbechir, tokuni tirkel ersel taem a mle lomes er tir el ngodech, delnguul, malechub e te ileakl. Ng dimlak el chetil a ta er tir ngdi bai ungil er tir e loba selebech el reng ma beltikelreng, le Ngii el milsterir el bebil er Ngii, el rengelekel a diosisiu el Chedam.¹⁵

A tara kot el bleketakl el dilubech el tekoi a sera Osobel e ra lorael el mora Galilee, el kldmokl elmo merael ersel rael elmo melobech e lokiu ra Samaria.¹⁶ A Jesus a mlo soal elmo dengchokl ersel madedok e ra Jakob el lolenguul. Ngar seikid, a tal redil ra Samaria a mlong elmo mekeik e ra blil a bekai e ra ralm. Ngii el medengei a rokui el tekoi, a Jesus mengedecheduch er ngii, el kmo, “Beskak a ralm me kulim.”¹⁷

Ngkal redil a mechas a rengul el chad ra Udea a olengit ra redil ra Samaria ra ngeseu e ulechotii ra teletelel, el kmul kmo, “Mekerang el kau el chad e ra Udea, a olengit a ralm er ngak, el ngak a redil ra Samaria? le rechad ra Udea a diak a tekingir tir ma re Samaritans.”¹⁸

Ngdi Jesus, el mla rekorek el emoit a ikel meketeket el siukang e ra kelsibelreng e ra delongelir a re Samaritans ma re Udea, a ulbeltikelreng el mesiou elmo ngikal redil, lolengeseu er ngii elmo medengelii el kmong Ngii ngkmal techang—e bleketakl, ngkel Messiah, ngii ngkel mouchais a rokui el tekoi esel lomerolel mei a lulengiil er ngii.¹⁹ A klisichel sel lungil lomesiou a rirelii ngikal redil meng ngulereched el mora beluu el mlo ouchais ra rechad e ra dilubech el tekoi, el kmo, “Ngkang ngdiak el ngkel Kristo?”²⁰

Ngarngii a tmolech el beltikelreng ra elsel a renguk el kirir tirkel chad el blol le meterekakl er tir, mildenguul, malechub e te mlokcharem lokiu ra re cheldeng e mekngit a bterir el chad, e leng, chelsel a klengar er ngak, e ak mla mes e ra medak a ikel ringel el rungil chad a mlo cheuarem el kirel lulekiu a chelebirukel el luldasu malechub te mileakl er tir le te mengedecheduch, ng osengir, malechub eng ngodech a klengar er tir. Ak dirrek el melchesuar ra meral klengitelreng er a renguk el kirir tirkel luldesuir a melmolm el milkolk, e a osengir a tedeb, e melmolm el mekedidai a rengrir le tultuil ersel lomerang er ngii el kmo te me chebuul tirkel chad el ngodech er tir. Sel kedeb el losengir e ra rebebil a merang er ngii a bai molibesongel meng diak el lesterir el kmo te ngelekel a Dios.

Me tiang a lulemlauch er ngii a re profet, le kid a kiei e ra chetituokel el taem lomtutek el kirel sel Longerung el Lomrolel a Osobel.²¹ A beluulechad ersel cherengelel a mla meterakl leng ngokiu ra mesisiich el lomeliakl, e mlamo ultebechel leng ngokiu ra kle kakerous ra rechad, palatiks, ma ruungerachel a oretel a tekoi el buai ma udoud. A ikal blingelel a tekoi a le bebil ra taem eng bai ngmodech a teletelir a rechad sel lomdasu e louedikel a delongelir el mora rebebil er tir. Ngokiu er tial moktek, eng diak el ngodech el tekoi a desterir a rechad sel lolechedech meng teletelir a lomdasu, loruul, ma lolekoi ra bebil ra siukang, rechad, ma cheldebechel el kora metacherbeserir, e lousbech a ikel delbochel, chelebirukel, e lou mesind e lotuub el luldasu, el soksakt a mekngit el blekeradel, klekakebosech, el diak a omengulll, molmuut e ra mekngit el lomelkoi el kirir. A uai ikal blekeradel a delalem a risel ra keldidai el reng, mead, chelechei, ma kikiongel el reng, eldi omilkingir a re bleiuul ra tech,²² ea ikang a kmal klou el ngodech ra blekerdelel a Kristo. Tial blekeradel a diak el melmalt el kirir tirkel melasem el meral mo oltirakl er Ngii.²³ Ea klemerang, e betik er a renguk el rodam me a rodos, ngdiak a basio el kirel a mekngit el luldasu malechub eng ngomeruul ersel basio ra re Santo.

Mesel de ngalk e ra telbiil, eng sebeched el lolengeseu el mengeroid a ikaikid el bedengel a reng e omes a ikel keltukl el kle kakerous el ngarngii ra delongeled me a ikel leues a Osobel²⁴ e lultuil e ra ikel bo dosisiu er ngii—kid kede techang mesel delongeled. E dirrek, el sebeched el melasem el lomes er kid el lultab e ra berusir, urungulir, kengtil a rengrir, ma ringel ra re tonarii. Kede bekl el chad el ngara tal lomerael el ngelekel a Dios, diosisiu ra ikel ngesengesed ma teleteled a doloseb. Kede kaukledem e tmak el merael, el ngara budech, el mui a rengud e ra beltikelreng el mora Dios ma re bekl el chad—malechub, eng uai sel Abraham Lincoln a dilii, “ngdiak a mekngit el reng el kirel a ngidil chad e ou beltikelreng el mora rokui chadl.”²⁵

Ngarngii a tal bla momtab el mekerang a ikel losisechakl ra omengulll el kirel a omilkingel a chad ma lemeltel a emolt el lokiu ra beot el rolel sel dou bail e ra elsel a blil a Dios? Kede bekl el chad el mora templo el tmak eldi imong a moktek e mui ra klemeriar reng elmo klikiid e chedaol el ngar medal. Kede oubail a becheleleu, el bekl el chad el lolai er kid Ngii el Rubak el betik ra rengul ngelekel, rsechal ma redil ra Dios, loltirakl e ra Kristo.²⁶ Kede sebeched el mengetmokl a ikel losisiu el chedaol lureor, kutmokl osisiu el telbiil, tuib a rengud elmo kiei ra ngarbab e chedaol klengar, e ngmai a osisiu el diak a ulebengelel telbiil. Meng tang a moktek, e kede kaseues eldi tang a osenged, me kede imol chad, e kede oldeu a rengud le kede kakerous el chedaol ngelekel a Dios.

Ak dirk ulengeseu el lomekrael e ra re ngarbab el chad ma re menguteling ra amt e ra open house er sel Templo ra Brasília Brazil. Ak mlo chelelakl ersel basio el domail er kid e lobengkel a vice president ra Brazil, e aki mesaod a ikal becheleleu el bail el rechad ou bail ra elsel a templo. Ak silodii el morngii el kmo tial klou e lusbechelel a becheleleu el bail a olechotel el kmo kid el rokui el diosisiu el mora Dios, esel de ngara templo, eng diak kede cholt el kmo ke vice president malechub e ke mengeteklel a ikelesia ngdi sel kau el chad el ngelekel a betik e ra rengul el Demad ra Babeluades.

siasing/Llecheklel

Iguaçú Falls.

Sel Lomeuachel ra Iguaçú a omaoch el mora Brazil e merael mora ikel meklou chutem el blebelel a rolel a omeuachel el merael a isel ra beluulechad el Iguaçú Falls—tara kot el klebokel e mengasireng el blebelel a Dios er tial beluulechad, el tara belsachel e likel leuid el longasireng el tekoi ra beluulechad. A klou el ralm a omaoch eldi mora imol lomeuachel e obii, e omaoch elmo betok el diak a mo uai ngii. Me tiang a dio kesiul a tekoi, tial longasireng el lurelel omeuachel a okesiul a telungalk e ra Dios el ngara beluulechad, le kede kerous el ua uchelel a diosisiu el reng ma tekoi, el milngai ra chedaol dikesed ma deluill. Engdi, a derta er kid a omaoch e lokiu ra kakerous el siukang, chelechad, beluu, lolab a kakerous el luldasu, duch, ma reng. Meng uaisei, e kede merael bedul luchei el ngelekel a Dios el rodam ma rodos el ngara Kristo, el diak ke doridii sel chedaol deliongel, el rulid me kede tokubets el chad e kau beltikelreng el beluu.²⁷

Betik er a renguk el rodam me a rodos, dodak a rengud ma uldesued e loba sel klaudengei ma klaumerang el kmo kid a rokui el diosisiu ra medal a Dios, el kid a mui el cheledaol e loba osisiu el diak a ulebengelel el klisiich ma dikesed. Bol mui a deurreng er kid e ra deliongel ra reng el ngarngii e ra delongeled ma belkul aikel klekakerous el teleteled ma bekbedengel a sengk el dolab el rokui. Alsekum meke de otireklii tiang, e ak yaksok er kau el kmo kede mo maoch ersel kuk teleteled, eldi uai sel ralm e ra Iguaçú Falls, el diak el loridii sel chedaol el deliongel el meketeklii el kmo kid a ngodech el chad, “el rengelekel a Kristo, el ou diukes e ra rengedel a Dios.”²⁸

A kuuchais er kau el kmo sel dolemolm el lomaoch el uaisei er tial klengar er kid, e a beches el sils a mo muchel loba beches el lloms elmo mekelemsii a klengar er kid e tmuich a ungil techall elmo mes a meklou a belkul, el lmuut elmo mui ra klengeltengat e lokiu, ra kle kakerous el tekoi e lulebeob e ra Dios el ngara rengelekel.²⁹ Kedultebechel elmo dongu er Ngii el lomecheliu a omengull ma chetengakl ra delongelir a rengelekel sechal ma redil. A Dios a ngar. A Jesus a Osebelel a beluulechad. A President Nelson a profet ra Dios er chelechal taem. A kuuchais a ikal klemerang e loba chedaol ngklel a Jesus Kristo, amen.