Ng Kol Mo Uangerang a Deuil a Rengum
Ak mengemedaol er kau er chelechang el mo ngmai aikel “omodengei-omeduch,” el lobengkel a meketeket el olechotel a klaumerang er kau, el mora mision.
Rodam me a rodos, chelechal sils e ak melbedebek er a cheldelel a Israel, el uai sel lomekedong er ngii a President Russell M. Nelson el “kot el klou a ultutelel el tekoi el lultaut er a beluuchad er chelechal taem. Ng diak a mengaisisiu er ngii er a klungel, ng diak a mengaisisiu er ngii er a ultutelel, ng diak a mengaisisiu er ngii er a klebekelel.”1
Tial longdibel a kot el olengchelel a kmo “a belkul a delebenged a le mekreus er ngii er a osengel a Dios.”2 Ng uaisei el kmal beot. Kede mengudel er a rengelekel a Dios er aika el uriul klebesei me bol ngai a “klengeltengat el omaoch el mo er tir”3 me a yaksok er a iltetel a diak a ulebengelel klengar.”4 Ng otireklii sel kmo a dongudel e ra Israel e kede ousbech e ra re misionariis—betok e ra re mesiou er chelechang.5 Chelechang, e ak mengedecheduch er a rebetok el kakerous el mechuodel er a Ikelesia el tir a sebechir el mesiou el misionari. A Rubak ousbech er kemiu. Kede ousbech er kemiu er a New York me a Chicago, Australia me a Africa, Thailand me a Mexico, me a rokui basio el ngara delongelel.
Mek ngikemiu el mora rak er a 2015. Ak direk mle beches el mokedong el mora Chelechad er a Teruich me a Terung el Apostol. A tara kmal klebokel el ngerachel el kemam obang el Apostol a melutk ra remisionari el mora ikel urererir. Ak mla merutech er ngii lurreor ser ak ngara Rokeuid,6 eng di chelechang, el blak bok Apostol, ak mlo melechesuar a mui el berredel tial okedong. Ak ulemuchel el ngara nglunguuch e omii er tirkal betok el rengeasek el elders ma re sisters, el ou dersta er tir, er aikal mision er a beluulechad el meliuekl. E mocha, er tirkal remechuodel el obekel. Te mle teruich a beldukl a ngklir. Ng diak el sal kmal betok. Ak mlo mechas a renguk, me ak mocha oker er a tara chad el loureor ra Misionari Department, “Ng tela dousbech er chelechal sandei e ng mo tabesul ongit?
Ngulenger, “Edei el dart.”
Seikid el tekoi el blo kulebedebek er ngi er sel taem a direke ngara uldesuek: Teruich el lobekel el mo mesiou a edei el dart el longit.
President Russell M. Nelson a mla mengesuseu er a robekel “el mo outubaruach e oker er a Chedam ra Babeluades alsekum eng ungil taem el bo losiou el misionari.”7 Chelsel aike el rokui el dauch er a mo soiiseb, ng ouchais el kmo, “sel meral ngara rengul a chad el mo mesiou sei a kot el ngaruchei.”8
A chedaol llechukl a ouchais, “Alsekum eng ngarngii er a rengum a mo mesiou ra Dios e kau a mokedong el moureor.”9 Tia el ureor a kmal di kirel a llechul a omeritm. Kede chiliuii er a Johanes, “Tirke el terung el melalm me a meritm a mo dmak el ngara deuelreng.”10
Ak mla mesa tia el llechul a omeridm el mekedmokl er a chelsel a telungalek er ngak.
A rak er a memong, ak uleldingel er a tara telungalek sera Bisop a lolengit er ngak el mo omtebechel er a temel a sakrament.11 Tia er a bekbetengel, e a tara mechas a ulsiueklak ngii me a reteuid el rengelekel e ulechisa er a ngklel el Sister Rebecca Guzman.
Ng uleker, “Elder Rasband, ke medengelii a Rulon ma Verda Rasband?”
Ak mlo klikmechur e melkingang, “Te rechad er a blik.”
Kom sebechiu el mesa el kmo tiang merael bedul ker. El oba kengei er a Rebecca, el ngii a ngar tia el Conference Center ngii ma telungalek er ngii, ak ouchais er a cheldechedechal a telungalek er ngii er a lluich me a eim el rak er a mla memong.12
A delak ma demak, Elder Rulon me a Sister Verda Rasband, a mle mesiou el mechuodel el obekl er a Florida Fort Lauderdale Florida.13 Te ulsisechakl e ulkiu chedaol ongesuseu e te millengod er a chesmerel a blil a Rebecca. Ng dirk ngeasek el redil el soal orrenges a cheliteklir a re Osmonds, ea mera er ngii a sechelik er a Donny—el ngii a ngar tiang er chelechal sils.14 Ng mla orrenges er a media e mlo medengei el kmo te rechedal a Ikelesia er a Jesus Kristo er a Uriul-klebesei el Santo. Ng milchesuar el kmo te kora mle ngodech, e ulemdasu el kmo ng locha klechelid er tir, a Rebecca a chiloit a eru el rak el mesuub el kirel a klaumerang er a Ikelesia er a bill a omenguiu ra skuul. Meng uaisei, e tirka el teru el ngariou a rengrir el obekel sera lolengod er a chesmerel a blil e bocha louchisa er tir el kmo te misionari er a Uriul klebesei el Santo, eng kilurs bedengel.
“A delak a dilu er ngak me kuldik er tir,” a Rebecca a uriul eng milluches, “eng di a renguk a dilu el kmo ‘Ng Diak.’ Ak ulemes a mederir, e mlo omelechesuar a delemedemek me a beltik el reng. Sel bo kumtab er tiang eng mo merael iuosech er a medak e mo oberaod a renguk.”15
A Rebecca a mocha siotai er tir el me tmuu, me tirkal misionari el rechad er a blik a mocha ouchais er a klumech el mo er ngii, ma re teru el merrengel, me a delal, el ngii a mle chetil.
A Rebecca uluuchais er ngak, “Tir el terung a kmal mle ungil smaod a rokui el kermam. Ak direk sebechek lomes a mederir el uai a le ngarngii a llomes el milliuekl er tir. Aki mle blechoel el kabechull kemam me a delam e sel lorael eng blechoel el rullii me a delak a mle ungil besul e ulekereu. A demam a mle blechoel semeriarl sel lolsisechakl er kemam el kirel a Jesus Kristo. Ng milasm el mengesuseu er a demak er a omesubam ea uriul eng nguremlii. A demak a mle chad er a omeruul el kall er a kekerei el blil omilil e mocha meruul a kelir a rechad er a blim, luldimukl er ngii sel kmal mle soal a demem, key lime pie.”16
Sera Elder ma Sister Rasband er a lolengit er a Rebecca me a telungalek er ngii el mo menguiu er a Babier er a Mormon, a Rebecca a mlo merek er a di chelsel a eim el klebesei. Ng mle soal di mereched el metecholb, e ng di a rebebil er a rechedal a telungalek er ngii a dimlak el kldmokl. Uriul er a eua el buil, a Rebecca a di mle soual mo metecholb el mo chedal a meral Ikelesia. Ng ulemtab, “A renguk el rokir a mle medengei el kmong klemerang.”17 Sera April 5, 1979, a re misionari a tilchelbii a teruich me a etiu a rekil el Rebecca, me a delal, me a re teru el merrengel. A demak a mle sioning er tial techolbechelid.
Sera bok kebetech er a Ikelesia ngak ma Rebecca me a telungalek er ngii, aki dilak el ngara siasing. Ak ngiluu a siasing el mo remei el mora delak, eng mlo mechulii el mera rengul. E melkinga er ngak, “Ronnie, tia e a tara kmal kot el dmeu a renguk er ngii el sils er a klengar er ngak.”
Tia el omelekingel a delak a ongit el mora re bebil er kid ra remechuodel, “Ke mekerang er tial dauch er a klengar er kau?” Ng kmal betok el tekoi a sebechir a remechuodel el misonari el remuul el diak a ngodech el chad el sebechir. Kemiu a kmal klou el mesisiich loldubech a ungil, ulsemuul er a Ikelesia, e keltmokl elmo mengesuseu e olsobel er a rengelekel a Dios.
A bebil er kemiu a locha omdasu, “E ngdi mekera aki bechititerir a rengelekir a rengelekam? Kede mo dibus meng diak deues a bekesel a telungalek, tansiobi, resechelid, me a dirrek el chermed.” Ulekum ma kuleker er a delak el kmo ngera me ngii me a Demak a mlora mision, ak medengei el kmo ngonger el kmo: “Ngarngii a rengelekel a rengelekek. Ng soak a bo lodengei el kmo ngak me a demam a mlo mesiou el misionari, e somam el mo ungil lokesiu el moera rengelekir a rengelekam, aki ngilai a klengeltengat, el lulis el mle ngeltengat.”
Mak mla omais el mesarch a betok el mision er a beluuchad el meliuekl, e mla mes a klebokel el urerir a rebetok el mechuodel el misionari er kid. Ng bleketakl el kmo te dmeu a rengrir el meruul “er a urungulel a Rubak” e ngara “urerel a Rubak.”18
A denguu er a rebebil, aki dirrek el loureng ma dertelael er kemiu, el mui el mesiou el misionari a mora cheroid el beluu er a beluulechad e sei ea mo ungil basio el borngii.19 E a rebebil, a mesiou er a Ikelesia er a rekeblirir sei a kuk sorir. E leng mo uchul a secher me a bebil er a chetituokel el duubech, e ngarngii tirkel tir a diak el sebechir elmo mesiou. Aki ungil medengei, e ak kureng meke mosiik rolel e olengeseu er tirkel tir a mesiou. Moltirakl a omellach er a profet e moluluuch el mo medengei aike el Rubak a soal omoruul.
A urerel a klemisionari el meliuekl er a beluuchad a olengit er a ngelsuim. A President Nelson a mla ouchais el kmo a remechuodel el misionari, “Tir a ngeasek er a reng, e uldellomel, e kongei el mo oureor.”20
Sel temir el oldingel, eng bek el bedengel a techall: ke locha mesiou er a obis er a mision ma lechub a templo, melisiich er a rengeasek el misionari, olngeseu er a mekekerei el rechelel a ikelesia, oureor er a center ra FamilySearch me a lechub a ibetel a cherechar, olischakl a institute, olengeseu er a rebebil, oureor lobengterir a rengeasek el chad, me a lechub a obis er a ureor ra Ikelesia me a lechub a sers er a Ikelesia. Aika el bedengel a omesiou, ngera er ngii a kot el tabesul er kau, el ker a kmal lousbech er kau, e mekera omongedmokl er kau a rokui a selaod er a website “Senior Missionary.”21 Ng dirrek el sebechem el mengedecheduch ra bisop ma lechub a branch president er kau.
Ak mla omekedong er a betok el obekl e mla omes er a Llemesel a Kristo er a mederir.23 Sel lemei e te ouchais el kmo te mlo kmeed er a Rubak e dirrek el ta me a tang, e melchesuar er a Reng er a Rubak el omaoch el mo er tir, e lodengei el kmo te ngilodech a bebil ra klengar.23 Techa diak el soal tiang?
A mision a locha kot el ungil dauch er a chelsel a klengar er a robekel. A ungil dai a locha “A Rubak a Locha mo Ousbech er Ngak.”24Ke locha mo ngara diak modengelii el basio; e ngdi, a klisichel a Chedaol Reng a mo ngosukau el mo melechesuar el kmo ke ngara blim.
A delak me a demak, me a re teruich el telael el mla mei el misionari a mla mekdubech a klaumerang er tir er sel deuelreng el biltik er ngii er a ureor ra kle misionari. A Rubak a mla ouchais er a chedaol llechukl er a ikal uriul klebesei, “Me a omoureor er a rokui el sils er kau el kirel a ngebetel a kngterir tirkal chad, e mnguu, a di chimol chad el mo suobel el mer ngak, eng kol uangerang a deuil a rengum lobengkel er a rengedel a Demak!”25
A Isaia a mileskid a kedeb el omesodel el kmo ngera belkul sel dosiou er a mision er a ikel “basio” er kid. A chedaol llechukl a ouchais er kid el kmo “a basio sei a beluulechad.”26 Ngkal lungil profet a milluches, “El kirem el mo tuobed el ngara deureng, e mo melemolem el ngara budech: a rois me a ked a mo mecherad er medam omongitakl, me a rokui el kerrekar a mo omrotch chimorir.”27 A rois, bukl, me a kerrekar a domekesiu el mora re mission president, bishop, district leader, rechedal a ikeleisa, metirkel losiik a klemerang engdi “te diak lodengei el kmo te osiik er ngii er ker.”28 Te mo sioning lel kmo a re mechuodel el misionari a ngildechii a teletelel a klaumerang er tir er a Osobel el Mengikiid el, Jesus Kristo.
Ngak el Apostol er a Rubak el Jesus Kristo, a olengit er kau el mo mesiou el misionari er a cheldellel a Israel e locha lmuut el mo mesiou. Aki ousbech er kau—aki ousbech er kau. Aki mui ra omereng el saul lekor kemiu el mechuodel, el kirel a klengar el bla momekrael me a okesiu el kemiu a mla remuul er a rekeblimiu, ward, ma stake. Ak mengemedaol er kau el mo ngmai aikel omodengei-omeduch, luldimukl e ra meketeket el olechotel a klaumerang er kau, e bora mision. Ak meluluuch mesel kluut el mo dengchokl e kulutk ra le borngii a re mechuodel el lobekel e le ngarngii a betok er a redart er kemiu el semeriar el mengiil el mo mosiou.
Ak dirrek el yaksok er kau el kmo sel bo mosiou, e ke mo melechesuar er a beltikelreng er a Rubak er a chelsel a klengar er kau, me kemo medengelii, Ngii a mo medengelkau, meng “kol mo ua ngera sel deuil a rengum.”29 Sel blakelreng er kau er a omesiou el mora Jesus Kristo a mo omekllomes a rengrir e omekngeltengat er a telungalek er kau, me a rengelekir a rengelekem, me a rengelekir a rengelekir a rengelekem. “Budech, me a beltikelreng [a mo] obdois”30er a klengar tir er a merael mei el betok er rak. Ak yaksok; El ngara a ngklel a Jesus Kristo, amen.