Bom Ngara Budech Loltirakl er a Kristo

Kede kiei er a chelsel a taem el tirkel “ngara budech loltirakl er a Kristo”¹ a chemau a kora tokubets el teletael. Tirkel loumerang el, mengull loba ngariou el reng, e ouchais a klaumera el kirel a Jesus Kristo a blechoel mo chemau a ringel, ongarm me a cherarou.² A bechik er a, Mary, me a ngak a dirrek el mo chemau a ikang. Tial mla mo merek el rak, ea kimilsterir a betok el sechelimam er a high school me a mle keldemam sera kim misionari, el mla mad ma lechub, e sel lolekoi er ngii a President Russell M. Nelson el kmo, te mla mo er sel tara beluulechad. Kede mla mesterir tirkel mlukeroul er a Ikelesia e uluumerang engdi ngmla mo diak el ngarsel rael er a telbiil.

Ng mekngit a rengmam, ele ngelekel a ngelekam el sechal el mle lluich me a edei a rekil a mle aksident el ngara mlai meng mlad. A bebil ra kmeed er kemam el sechelimam, rechedemam, me a re keldemam me te dirrek el lotekangel a meringel el secherir.

Sel dubech a ringel,e kede ngara klengit el reng e melasm el mo ngosuir a tang ma tang er a chelengelel.³ Kede ngara klengit el reng el kirel a ikel tekoi el diak el sebechel meketmokl me a chelitakl el diak el sebechel mo mechitakl.⁴ A mekngit el omeruul a dubech el mo er a rungil chad el ngar tial klechad ra beluulechad. Sel klou el seseb el mlara Maui el ngara Hawaii, Diluches er a Chile, me a Ongos er a Canada a olechotel a mekngit el omeuul el rungil chad a m chemau a le bebil er a taem.

Kede menguiu er a Pearl of Great Price el kmo a Rubak a ulecholt er a Abraham a ikel diak a ulebengelel teletael er a redeleb . A Abraham a silubii el klengar er kid er uchei er a de mera beluulechad, milchedaol ruchei, Omeob, melilt er a mo Osobel, me tial klengar er a beluulechad, el ngii a ongeru el basio er a chad.⁵ A Osobel a millekoi el kmo:

Te mo rullii a beluulechad el ikaikid a mo kiei er ngii;

E te mo melasem er tir el mo medengei el kmo te meruul a ikel rokui el tekoi el Rubak el Dios a dmu er tir.⁶

Me chelechang e kid rokui el ngara ongeru el basio el kirel a omerolled el bedul a rengedel a klebkall el telengtengil a Dios er sel klou el uldasu er a mo suobel. Kede mukngeltengat el loba mimokl el omelilt e mo chemau a ringel er tial klengar. Tiang a taem el mla metutk el kired el mo mengedmokl er kid el mo mesa Dios.⁷ Kede mukngeltengat el medengelii a Jesus Kristo me a Ngerchelel er sel uldasu. Ngarngii a techeled el mo rechedal a mla moluut el Ikelesia er Ngii—Ikelesia er a Jesus Kristo er a Uriul-klebesei el Santo. Me sel de ngara budech loltirakl er a Kristo, kede melasem el mo oltirakl a Llechul. Ng kmal diak el beot el mo er tirkel loltirakl er Ngii. Me a kal blel beot er a Osobel el mle blak a rengul el mo meruul a ikel Urerel er tial klengar.

A chedaol llechukl a bleketakl, el betok a lousbech er tiakid el omelekoi el kmo “momengur, molim, e moldeu er a rengum, e le klukuk e kede mo mad.”⁸ A rebebil er a diak loumerang a mo teloi a cheldebechel el omdasu el uai tir el oldubech a “beches el teletael”⁹me a osisecheklel a chad.¹⁰ Ng diak lodengei el kmo te mo metik a klemerang er ker.¹¹

A re ngara budech loltirakl er a Kristo a diak loltirakl a ikal teblo el teletael. Kid a bekesechelei, e ungil chad er a bouai er a ikel de kiei er ngii. Kede ou beltikerreng, omerk, e siotai er a rokui el ngelekel a Dios el mo oltirakl a osisecheklel a Kristo.¹² Kede oltirakl a tekingel a betik er a rengud el profet er kid el, President Nelson; kede ngileltii a ngerchelel a “chad er a budech, er a chelecha el mo er medad.”¹³ Tia el ulekrael el lodubech a osisiu ngii me a ikel ngara chedaol llechukl me a ulekrael er a profet.

Sera 1829 ea mla moluut el Ikelesia a dirrekak el meteketek, me a Babier er a Momron a dirrekak el meluches. A kekerei el delbechelir a rechad el ngara ringel, a mlo omelchesuar a Chedaol Reng er a Dios, me te mlo oltirakl er a Profet Joseph Smith. A Rubak ulecholt a omellach el mora Joseph er a ikel meringel el taem el kmo: tial kekerei el delebechel a diak bol medakt; e mo moruul a ungil; e becherei a beluulechad me a beluu er a ngau me bol omtok er tir, ele a lsekum me te ulsirs er Ngii, e a beluulechad me a beluu er a ngau a diak el sebechir el mo mesisiich.¹⁴ Ngii a dirrek el lulsisechakl er tir:

“Momes er ngak er a bek luldasou; lak moumededenger, lak ko medakt.

Ng kirir el mo mui er a klaumerang, e oltirakl a Llechul, meng mo sebechir el mo nguu a dikesir er a rengedel a babeluades.¹⁵

Ng bleketakl, a chedaol bekesel a ochid a diak el bol mengodech sel bo de dongarm a ringel. Ngara Hebru, eng mellach er kid el mo “olekeed er kid er a kingall er a krasia, me bo de nguu er ngii a klechubechub, e de betik er a krasia el mo ngosukid sel dousbech er ngii.”¹⁶ A Jesus Kristo a “uchul a diak a ulebengelel osobel.”¹⁷

Ng kmal soak a ikel tekingel a Mormon, el ngelekel er a Moroni a millekoi el chemat er tirkal “ngara budech loltirakl er a Kristole kemiu el nga er a budech lomeroliu lobengterir a rengelekir a rechad.”¹⁸

Mo er tirkel rechedal a Ikelesia el melasem el mo ngara budech loltirakl er a Kristo, a ungil sils el doureng er ngii a mengiil er kid sel bo domes el bedul a Rubak e Osobeled, el Jesus Kristo. A ringel a telengtengil a klechad e mo dubech er a chelsel a klengar er a rokui el chad el meliuekl er a beluulechad. Tiang uldimukl a meklou el klautok er a delongelel a beluu me a dersta el chad.

A remerredel er a Ikelesia a blechoel loker er tir el kmo, “Ngera uchul me a Dios a mechei a mekngit el teletael mel dubech, tokuni el mo er tirkel lungil chad?” e “Ngera uchul me a tirkel ngara llemalt e meruul a urerel a Rubak a diak el sebechir lochib aikal ongarm?”

Kemam a diak ki modengei a rokui el nger; engdi, aki medengei a ikel meklou a belkul olisechakl el ngosukid el mo chemau a ringel, ongarm me a cheraro el loba klaumerang me a duch el reng el kirel sel ungil sils el mengiil er kid. Ng diak a ungil okesiu el ngara chelsel a chedaol llechukl el kirel a mo soiseb er a ringel el uai ikel tekingel a Rubak el mo er a Joseph Smith, el profet, sera le kelbus er a blil a kelbus er a Liberty.

A Rubak a ulechais er a teklib er a tekingel el kmo:

A lsekum a ngerel a beluu er a ngau a kmal meteu el sebechel merkeklii a chad, ea Joseph, el ngelekel a Dios, a kirel medengei el kmo a ikel rokui el tekoi bol chau a mo uchul a klungiolel.

A Rubak a milekoi el kmo a Ngelekel a Chad a mla ngosechekl er a ikal rokui. A Rubak a uleker er a Joseph Smith el kmo ngii ngarbab er Ngii?

… Diak el kirem medakt ra ikel chad a mo meruul, e le Dios a mo obengkel el mo cherechar.¹⁹

Ng bleketakl el kmo, ngarngii a Demad er a Babeluades el medengelkid e betik a rengul er kid e ungil medengei a ringel el dechau. A Ngelekel el Sechal, el Jesus Kristo, a Osobeled e mo Olsobel er kid.

A President Russell M. Nelson ma President M. Russell Ballard a diul el mesisiich el lomeketkakl e ra ultutelel sel beches e longerung el lechukl ra Preach My Gospel.²⁰ Bok kuchais ra klemeriar reng er tir. Tial beches el lechukl, a mo melisiich a chedaol llechukl, e mesisiich el louchais:

Sel melngakireng er Ngii, ea Jesus Kristo a ngilai a ringel, ongarm, me a chelitechetud. Eleng tia uchul, e Ngii a medengei el kmo ‘ng mekera a bo lolngeseu er a rechedal er a ikel chelitecheterir’ (Alma 7:12; mesa el dirrek bades 11). Ngii a siotai, ‘Mei er ngak,’ me sel derellii, e Ngii a meskid a ulengull, urunguled, klisiich, osenged er a tekoi, me a omekungil (Mateus 11:28; dirrek el mesa verses 29–30).

“Me sel dultuil er a Jesus Kristo me a Tngakireng er Ngii, e Ngii a sebechel ngosukid el lotekangel ikel longarem, secher, me a ringel. Ng sebeched el mo mui er a deureng, budech, me a ulserechakl el reng. A ikel rokui el metacher besul er a klengar a sebechel mo ungil besul lokiu a Tngakireng er a Jesus Kristo.”²¹

Ng sebeched el ungil a rengud el ngara budech loltirakl er a Jesus Kristo.

Sel moktek er a Chedam er a uldasu er a deurreng el kirel a Rengelekel a diak el dil luldimukl er a klengar er a uchei me a klengar er tial beluulechad eng dirrek el kirel diak a ulebengelel klengar, luldimukl er sel klebokel el sils e bo desterir tirkel mla mad. Rokui el chelbirukel a mo ngara llemalt, e kid a mo ungil lomes a ungil uldasu e ngarngii a klemedengei.

A remerredel er a Ikelesia a mengaisisiu er tial uladsu el kirel a chad er tial klengar el mora chad el merael soiseb er a melengel a edei-rellel a sibai.²² Tirkel diak a klemedengei er tir el kirel a uldesuel a Chedam a diak lodengei el kmo ngera dilubech er sel kot el rellel (a lechub e sel klengar ruchei) me a moktek el dilubech er sei; malechub lodengei a bleketakl me a milruul er sel temel a ongedei rellel, el ngii a sel kot el klebokel er a otutel a uldesuel a Chedam.

Te betok a diak loureng a saul el kmo ngara derdelel a Betlkil a Rengul me a cherrungel uldasu el mo er tirkel locha chemau a olibesongel, el ngii a diak el telmellir, a di mochib ra telmall.²³

A chedaol llechukl a bleketakl: ngara budech lottirakl er a Kristoel mellemalt el chad, a oltirakl er a Osobel, e oltirakl a Llechul a mo mukngeltengat. A tara kot el klou a belkul el chedaol llechukl el kirir tirkel mellemalt el chad, el diak el ior er a teletael er a chelsel a klengar er tir, a tebedechel sel cheldechedechal a King Benjamin el mo er a rechedal. Ng mle yaksok el kmo tirkel blak a rengrir loltirakl a llechul a Dios a mo mukngeltengat er a rokui tekoi er tial klengar e mengai el mo er a babeluades … [e] mo kiei lobengkel a Dios e ngara diak a ulebengelel deurreng.²⁴

Aki medengei el kmo ng betok er kid a mla mo chemau a ringel me a omelasm er a teletael er a tech ma teletael er a chedaol er a chelsel a klengar er kid, el bebil a kmal klou a telmellel. A oubeltikerreng el Chedam er a Babeluades ma Ngelekel Sechal, el Jesus Kristo, el ngii a btelul sel mla moluut el Ikelesia er Ngii, a mla meskid a chedaol llechukl me a re profet el mo olngeseu a keldmekled, e mengelechel er kid el kirel a ikel kengaol tekoi, e meskid a ulekrael el mo mengedmokl e mengeluoleu er kid. A bebil er a ulekrael a ousbech a di mereched el omeruul, ea bebil a mo mengeluolu el mo melai a rak el mo er a ngardemal taem. A uchelel a tekingel a Rubak el ngara Doctrine and Covenants, section 1, a mellach er kid el mo orrenges a tekingir a re profet.²⁵

Section 1 a dirrek el mengelechel er kid, el mo Mengedmokl er kid el kirel sel merael mei.²⁶ A Rubak a mesterir a Rechedal a techall el mo mengedmokl el kirel aikel ringel el bol chau.

A Rubak a milsa a mesisiich el chedaol locholt el mo er a President Brigham Young sera January 14, 1847, el ngara Winter Quarters.²⁷ Tial chedaol locholt a kot lungil okesiu er a Rubak el mengedmokl er tir el kirel sel merael mei. A mui a klaumerang er tir el re Santo a omechelang a omrollir el bedul a Rois el ngara Salt lake Valley. Te milkedecherur sel Templo er a Nauvoo e mlo ngmai a chedaol ruoll. Te chiliis el tuobed er a Missouri, e tirkel lomcherabech er tir a uleltoil loltobed er tir er a Nauvoo el kmal mle mekngit el temel a winter. A chedaol locholt el mlo er a Brigham a mle beot el teletelel omellach el mekera longedmokl er tir el kirel tial omerael. A Rubak a ulelsiich er sel tekingel el kirel a omengedmeklir a remechebuul, a remelakl el dil, diak a demerir, me a telungalek er tirkel mesiou loureor el Mormon Battalion sera betok er tirkal re Santo lomechel er tial meringel el omerollir.

Nguldimukl el mo er a ikel bebil er a omelekoi el mo kiei el ngara llemalt, ea Rubak a mlo ungil meketakl a lmuut el teblo el olisechakl el ngii a melemolem el ulsbechall er a chelechal taem.

Kot, Ng omekduch a rengrir mel loldanges er a Rubak el mengitakl, olab ongak, omeloik, me a nglunguuch el loldanges e oureng a saul.²⁸

Ongerung, a Rubak a millekoi el kmo a lsekum me te ngara klengiterreng e lomekedong er a Rubak el Dios lolab a rokui el klisichir, ma rengrir bo lemui er a deurreng.²⁹

A ikakid el teblong el omellach a kmal ungil olisechakl el merkid er a chelechal taem. A klengar a mui er a oldanges, chelitakl, ma omereng el saul a mo mukngeltengat. Mesel mngara deurreng lultuil er a ngesuil a babeluades lokiu a nglunguuch a kmal mesisiich el teletael me bom ngara budech loltirakl er a Kristo. Sel molasem el blechoel lungil a rengum a ngosukii meng diak el mekngit a rengum.

Sel mocha ulebongel er a omeklomes el chelitakl a meskid sel cheberdil a nger ra klebokel teletael: “A beluulechad a diak a kengtil a rengul el babeluades a diak el sebechel lomekungel.”³⁰

Me sel ngak a Apostol er a Rubak el Jesus Kristo, e ak kuuchais el kmo “om ngara budech loltirakl er a Kristo” a mo metik a budech er a chelsel tial klengar me a klebkoel el sils el bo mesterir tirkel rebeldekiu el mla mad. Ak meral sioning el kmo a Tngakireng er a Osobel a chedaol e klemerang. Ngii a Osobeled e mo Olsobel er kid. El ngara a ngklel a Jesus Kristo, amen.