Mga Haligi kag Mga Silak

Ang akon mensahe para sa mga nabalaka sa ila testimonya kay wala sila sang dalagko nga espiritwal nga mga eksperiyensya. Kabay nga makahatag sa inyo sang kalinong kag kasigurohan.

Ang Pagpanumbalik sang ebanghelyo ni Jesucristo nagsugod sa pagsabwag sang kasanag kag kamatuoran! Isa ka solterito sa norte sang New York, nga ordinaryo kaayo ang ngalan nga Joseph Smith, nagsulod sa kakahuyan para mangamuyo. Nabalaka sia sa iya kalag kag sa iya estado sa atubang sang Dios. Nagapangayo sia sang kapatawaran sang iya mga sala. Kag nagapalibog sia kon diin nga simbahan maupod. Kinahanglan niya sang kaathagan kag kalinong—sang kasanag kag kaalam.¹

Sang nagluhod si Joseph para mangamuyo kag “[naghalad] sang mga handum sang [iya] tagipusuon sa Dios,” ginpalibutan sia sang madamol nga kadulom. May malain, pugoso, kag matuodtuod nga nagapugong sa iya—nga nagapugong sang iya dila para indi sia makahambal. Grabe ang pwersa sang kadulom nga abi ni Joseph mapatay na sia. Pero “[nanikasog] sia sa tanan [niya] nga ikasarang nga magpanawag sa Dios sa pagluwas sa [iya] halin sa gahum sining kaaway nga naggapos sa [iya].” Pagkatapos, “sa tion mismo nga handa na [sia] nga malumos sa kawala’y paglaum kag pabay-an ang [iya] kaugalingon sa kalaglagan,” sang indi na niya mabal-an kon makabato pa sia, may mahimayaon nga kasanag nga nagtuhaw sa kakahuyan, nga nagtabog sang kadulom kag sang kaaway sang iya kalag.²

Isa ka “haligi sang kasanag” nga mas masanag pa sangsa adlaw ang amat-amat nga nagpanaog sa iya. Isa pa persona ang nagpakita, kag dayon isa pa.³ Ang Ila “kasanag kag himaya imposible nga ilaragway.” Ang una, ang aton Amay nga Langitnon, naghambal sang iya ngalan, “nga nagatudlo sa isa—[Joseph!] Ini ang Akon Hinigugma nga Anak. Pamatii Sia!”⁴

Kag sa sina nga gulpi nga pagsabwag sang kasanag kag kamatuoran, nagsugod ang Pagpanumbalik. Ang pagbaha sang diosnon nga rebelasyon kag mga bugay magasunod: bag-o nga balaan nga kasulatan, ginpanumbalik nga awtoridad sang priesthood, mga apostoles kag mga propeta, mga ordinansa kag mga kasugtanan, kag ang pagtukod liwat sang matuod kag buhi nga Simbahan sang Ginuo, nga sa pila ka adlaw magapuno sang duta sang kasanag kag saksi ni Jesucristo kag sang Iya ginpanumbalik nga ebanghelyo.

Ina tanan, kag madamo pa, nagsugod tungod sa desperado nga pangamuyo sang isa ka solterito kag sang haligi sang kasanag.

May desperado man kita nga mga panginahanglan. Kinahanglan man naton sang kahilwayan sa espiritwal nga kagamo kag kalibutanon nga kadulom. Kinahanglan man naton nga makilala ang aton mga kaugalingon.⁵ Isa ina sa mga rason nga ginhagad kita ni Pangulong Russell M. Nelson nga “magpaayaw [kita] sa mahimayaon nga kasanag sang Pagpanumbalik.”⁶

Isa sa dalagko nga mga kamatuoran sang Pagpanumbalik amo nga bukas ang mga langit—nga pwede man kita makabaton sang kasanag kag ihibalo halin sa ibabaw. Nagapamatuod ako nga matuod ina.

Pero kinahanglan naton mag-andam sa espiritwal nga siod. Kon kaisa ang tampad nga mga miyembro sang Simbahan nagaluya kag nagakadula tungod wala sila sang dalagko nga espiritwal nga mga eksperiyensya—tungod wala sila sang ila kaugalingon nga haligi sang kasanag. Nagpaandam si Pangulong Spencer W. Kimball, “Kay pirme nagapaabot sang tumalagsahon, kadamo sang wala makatalupangod sang sige-sige nga ilig sang ginapahayag nga komunikasyon.”⁷

Siling ni Pangulong Joseph F. Smith, “Ang Ginuo naglipod sang mga katanhagaan sa akon [sang bata pa ako], kag ginpakita sa akon ang kamatuoran sing dinalan sa dinalan, pagsulundan sa pagsulundan, diutay diri kag diutay didto.”⁸

Amo ina ang kinaandan nga sulundan sang Ginuo, mga kauturan. Imbes nga padalhan kita sang haligi sang kasanag, ginapadalhan kita sang Ginuo sang isa ka silak sang kasanag, kag isa pa, kag isa pa.

Ina nga mga silak sang kasanag padayon nga ginabubo sa aton. Ang balaan nga kasulatan nagatudlo nga si Jesucristo amo ang “kasanag kag … kabuhi sang kalibutan,”⁹ nga ang Iya “Espiritu nagahatag sang kasanag sa tagsa ka lalaki [kag babayi] nga mabun-ag sa kalibutan,”¹⁰ kag ang Iya kasanag “[nagapuno] sang kasangkaron sang kahawaan,” nga nagahatag “kabuhi sa tanan nga butang.”¹¹ Ang Kasanag ni Cristo literal nga ara sa aton palibot.

Kon nabaton naton ang dulot sang Balaan nga Espiritu kag nagatinguha nga maggamit sang pagtuo, maghinulsol, kag magtahod sang aton mga kasugtanan, angayan kita sa pagbaton pirme sining diosnon nga mga silak. Sa indi malimtan nga hambalanon ni Elder David A. Bednar, “‘nagapangabuhi kita base sa rebelasyon.’”¹²

Pero, ang kada isa sa aton lain. Wala sang duha ka tawo nga pareho gid ang eksperiyensya sa kasanag kag kamatuoran sang Dios. Hatagi sang tiyempo nga hunahunaon kon paano ninyo naeksperiyensyahan ang kasanag kag Espiritu sang Ginuo.

Mahimo nga naeksperiyensyahan ninyo ining pagsabwag sang kasanag kag testimonya bilang “paghidaet [nga ginhambal] sa inyo panghunahuna parte [sa] butang” nga nagatublag sa inyo.¹³

Ukon sang panghunahuna—sang tingug nga mahinay—nga nagpahamtang “sa imo panghunahuna kag sa imo tagipusuon”¹⁴ kag nagtulod sa inyo nga maghimo sang maayo, pareho sang pagbulig sa iban.

Siguro nagsulod kamo sa klase sa simbahan—ukon sa youth camp—kag nakabatyag sang mabaskog nga handum nga sundon si Jesucristo kag magpabilin nga matinuohon.¹⁵ Basi gani nagtindog na kamo kag nagpakigbahin sang testimonya nga ginalauman ninyo nga matuod kag nakabatyag nga matuod gid man ini.

Ukon basi nagapangamuyo na kamo kag nakabatyag sang malipayon nga pasalig nga palangga kamo sang Dios.¹⁶

Mahimo nga nakabati man kamo sang iban nga naghatag sang testimonya parte kay Jesucristo, kag natandog sini ang inyo tagipusuon kag napuno kamo sang paglaum.¹⁷

Siguro nagabasa kamo sang Libro ni Mormon sang may bersikulo nga naghambal sa inyo kalag, nga daw ginbutang gid ini sang Dios didto para sa inyo.¹⁸

Mahimo nga nabatyagan ninyo ang pagpalangga sang Dios sa iban samtang nagaserbisyo kamo sa ila.¹⁹

Ukon basi ginabudlayan kamo nga mabatyagan ang Espiritu tungod sa depresyon ukon kabalaka pero may dulot nga magbalikid kag kilalahon ang nagliligad nga “mapinalanggaon nga kaluoy sang Ginuo.”²⁰

Ang punto ko amo nga kadamo sang pamaagi nga makabaton sang langitnon nga mga silak sang testimonya. Pila lamang ini sa ila, siyempre. Indi man ini ma-drama, pero ini tanan parte sang aton mga testimonya.

Mga kauturan, wala ako makakita sang haligi sang kasanag, pero pareho sa inyo, nakaeksperiyensya ako sang madamo nga diosnon nga mga silak. Sa tinuig, gintinguhaan ko nga palanggaon ina nga mga eksperiyensya. Natalupangdan ko nga kon himuon ko ini, mas makilala kag madumduman ko pa gid ang kalabanan sini. Ari ang pila ka halimbawa halin sa akon mismo kabuhi. Indi man ini matahum kaayo para sa iban, pero malahalon ini para sa akon.

Nadumduman ko nga kagihuan gid sa akon nga tin-edyer sa isa ka bunyag. Sang manugsugod na ang miting, nabatyagan ko ang Espiritu nga naghambal sa akon nga magpungko kag maghipos. Nagpungko ako kag naghipos hasta matapos ang miting.

Antes ako nagmisyon, nahadlok ako nga ang akon testimonya indi amo sina kabakod. Wala gid bisan isa sa akon pamilya ang naglakat sa misyon, kag wala ako sang ideya kon mahimo ko ini. Nadumduman ko nga nagtuon ako kag desperado nga nangamuyo para makabaton sang mas sigurado nga saksi parte kay Jesucristo. Dayon isa ka adlaw, sang nagaampo ako sa Amay nga Langitnon, nabatyagan ko ang mabaskog nga kasanag kag katawhay. Kag nahibal-an ko. Nahibal-an ko lang.

Nadumduman ko nga ginpukaw ako isa ka gab-i sang pamatyagan sang “puro nga kaalam” nga nagasiling nga tawgon ako nga magserbisyo sa elders quorum.²¹ Pagligad sang duha ka semana gintawag ako.

Nadumduman ko sa pangkabilogan nga komperensya kon diin isa ka miyembro sang Korum sang Dose ka Apostoles ang naghambal sang mismo mga tinaga sa testimonya nga ginsugid ko sa isa ka abyan nga gusto ko mabatian.

Nadumduman ko ang pagluhod upod sa ginatos ka kauturan sa pagpangamuyo para sa isa ka pinalangga nga abyan nga wala sang animo nga natakod sa ventilator sa isa ka gamay kag malayo nga hospital pagkatapos nga mag-untat pitik ang iya corazon. Tungod nagahiusa ang amon mga tagipusuon sa pag-ampo para sa iya kabuhi, nakabugtaw sia kag ginkakas ang ventilator sa iya tutunlan. Nagaserbisyo sia karon bilang stake president.

Kag nadumduman ko nga nagbugtaw nga may mabaskog nga espiritwal nga mga balatyagon pagkatapos sang maathag nga damgo parte sa isa ka abyan kag mentor nga temprano napatay, nga [ang iya kamatayon] naghatag sang dako nga kasubo sa akon kabuhi. Nagayuhum sia kag malipayon. Nakahibalo ako nga OK lang sia.

Amo ini ang iban sang akon mga silak. May ara man kamo sang inyo mga eksperiyensya—sang inyo puno-sing-kasanag nga mga testimonya. Kon kilalahon naton, dumdumon, kag tipunon ining mga silak “sa pagtingob sang tanan,”²² may matahum kag mabaskog nga masugod nga matabo. “Ang kasanag nagapanguyaput sa kasanag”—“ang kamatuoran nagahakos sa kamatuoran.”²³ Ang pagkamatuod kag gahum sang isa ka silak sang testimonya nagapabakod kag nagaupod sa isa pa, kag isa pa, kag isa pa. Dinalan sa dinalan, pagsulundan sa pagsulundan, silak diri kag silak didto—sa kada ginagmay nga espiritwal nga tinion—magatubo sa aton ang haligi sang puno-sang-kasanag nga espiritwal nga mga eksperiyensya. Siguro kulang ang isa ka silak para mangin mabaskog ukon bug-os nga testimonya, pero kon gintingob, mahimo ini nga kasanag nga indi masarangan sang kadulom sang pagduhaduha.

“O gani, indi bala ini matuod-tuod?” Pamangkot ni Alma. “Ginasiling ko sa inyo, Huo, tungod kasanag ini.”²⁴

“Inang halin sa Dios kasanag,” ginatudlo sa aton sang Ginuo, “kag sia nga nagabaton sang kasanag, kag nagapabilin nga tampad kag matinumanon sa Dios nagabaton sing dugang nga kasanag; kag ang ina nga kasanag nagasilak nga nagasilak tubtob nga mag-abot ang perpekto nga adlaw.”²⁵

Mga kauturan, sa kadugayan kag paagi sa “dako nga katutom,”²⁶ kita man makabaton sang aton haligi sang kasanag—isa ka silak, sing amat-amat. Kag sa tunga sinang haligi, makita man naton ang mapinalanggaon nga Amay nga Langitnon, nga nagatawag sang aton ngalan, nga nagatudlo sa aton sa aton Manluluwas nga si Jesucristo, kag ginahagad kita nga “Pamatii Sia!”

Nagasaksi ako kay Jesucristo, nga Sia ang kasanag kag kabuhi sang bilog nga kalibutan–kag sang inyo personal nga kalibutan kag akon kalibutan.

Nagasaksi ako nga Sia ang matuod kag buhi nga Anak sang matuod kag buhi nga Dios, kag nagatindog Sia sa ulohan sining matuod kag buhi nga Simbahan, nga ginagiyahan kag ginadumalahan sang matuod kag buhi niya nga mga propeta kag apostoles.

Kabay nga makilala naton kag batunon ang mahimayaon Niya nga kasanag kag dayon pilion Sia sa pihak sang kadulom sang kalibutan—tubtob sa katubtuban. Sa ngalan ni Jesucristo, amen.