“Magpahimuyong kag Kilalaha nga Ako ang Dios”
Pwede kita magpahimuyong kag hibal-on nga ang Dios amo ang Amay nga Langitnon, kita mga anak Niya, kag si Jesucristo ang aton Manluluwas.
Sining karon lang nga open house kag media day [adlaw para sa media] sang bag o nga balay sang Ginuo, ginpangunahan ko ang isa ka grupo sang mga journalist sa isa ka paglibot sa sagrado nga istruktura. Ginlaragway ko ang mga katuyuan sang mga templo sa Ang Simbahan ni Jesucristo sang mga Santos sa Ulihing mga Adlaw kag ginsabat ang ila madamo nga manami nga mga pamangkot.
Antes magsulod sa selestiyal room, ginpaathag ko nga ining partikular nga hulot sa balay sang Ginuo simboliko nga nagarepresentar sang kalinong kag katahom sang langitnon nga puluy-an nga mahimo naton pulian pagkatapos sining kabuhi. Ginsiling ko sa amon mga bisita nga indi kami maghambalanay samtang ara sa selestiyal room, apang luyag ako magsabat sang ano man nga mga pamangkot pagkatapos nga makasaylo kami sa masunod namon nga kadtoan sa amon paglibot.
Pagkatapos nga maggwa sa selestiyal room kag sang nagtipon kami sa dason nga lugar, ginpamangkot ko ang amon mga bisita kon may ara sila naobserbahan nga luyag nila ipaambit. Isa sang mga journalist may dako nga kakunyag nga nagsiling, “Wala pa gid ako nakaekspireyensya sang subong sina sa bilog ko nga kabuhi. Wala ako kahibalo nga ang kalinong nga amo sina nagaluntad sa kalibutan; wala lang gid ko ya nagpati nga ang amo sadto nga pagpahimuyong posible.”
Nagdayaw gid ako sang kasinsero kag kasimple sang ginhambal sini nga tawo. Kag ang reaksyon sang journalist nagpadaku sang isa ka importante nga aspeto sang pagpahimuyong—pagdaog kag pagbalewala sang mga kinagamo sang aton panggwa nga kapalibotan.
Sang akon ginpulopamensar sang ulihi ang komento sang journalist kag ginbinagbinag ang aton masako nga moderno nga kabuhi—ang kasakuon, kagahod, pagkinatuhay, mga pagtublag, kag mga paliko-liko nga sa masami nagapangayo sang aton atensyon—isa ka balaan nga kasulatan ang nag-abot sa akon hunahuna: “Magpahimuyong kag kilalaha nga Ako ang Dios.”1
Ginapangamuyo ko nga ang tagsa sa aton pasanagan sang Balaan nga Espiritu sa aton pagbinagbinag sang mas mataas kag mas sagrado nga aspeto sang pagpahimuyong sa aton mga kabuhi—pangsulod nga espirituhanon nga pagpahimuyong sang kalag agud aton mahibal-an kag madumduman nga ang Dios amo ang aton Amay nga Langitnon, kita mga anak Niya, kag si Jesucristo ang aton Manluluwas. Ining dako nga bugay makuha sang tanan nga mga miyembro sang Simbahan nga matutom nga nagatinguha nga mangin “katawhan sang kasugtanan sang Ginuo.”2
Magpahimuyong
Sang 1833, ang mga Santos sang Missouri amo ang puntariya sang dako nga paghingabot. Gintabog sila sa ila mga puluy-an sa Jackson County sang mga nagapanggamo nga guban, kag ang iban nga mga miyembro sang Simbahan nagplastar sang ila mga kaugalingon sa iban nga malapit nga mga pungsod. Apang ang paghingabot nagpadayon, kag ang mga pamahog sa pagpatay madamo. Sa sining mahangkaton nga mga sitwasyon, ang masunod nga panulin ginpahayag sang Ginuo kay Propetang Joseph Smith sa Kirtland, Ohio:
“Gani, pasulhayon ang inyo mga tagipusuon parte sa Sion; kay ang tanan nga unod yara sa akon mga kamot; magpahimuyong kag kilalaha nga ako ang Dios”3
Nagapati ako nga ang laygay sang Ginuo nga “magpahimuyong” nagalakip sang sobra pa sa indi lang paghambal ukon indi paggiho. Mahimo nga ang Iya tuyo amo nga magdumdum kita kag magsalig sa Iya kag sa Iya gahom “sa tanan nga tion kag sa tanan nga butang, kag sa tanan nga lugar nga mangin yara [kita].”4 Gani, ang “magpahimuyong” mahimo nga pamaagi sa pagpahanumdum sa aton nga magtutok sa Manluluwas nga wala sing pagpalya bilang ginahalinan sang espirituhanon nga pagpahimuyong sang kalag nga nagapabakod sa aton sa pag-akto kag paglampuwas sang mga kabudlayan.
Magpasad sa Bato
Ang matuod nga pagtuo masami nagatutok kay Ginuong Jesucristo—sa Iya bilang ang Diosnon kag Bugtong nga Inanak sang Walay Katapusan nga Amay kag sa Iya nagatubos nga misyon nga Iya gintuman.
“Kay ginsabat niya ang mga katuyoan sang layi, kag gin-angkon ang tanan nga may pagtuo sa iya; kag sila nga may pagtuo sa iya magakapyot sa tagsa ka maayo nga butang; gani ginaapinan niya ang kawsa sang mga anak sang katawhan.”5
Si Jesus amo ang aton Manunubos,6 aton Manugpatunga,7 kag aton Mananabang8 sa Walay Katapusan nga Amay kag ang bato sa diin dapat naton ipasad ang pundasyon sang aton mga kabuhi.
Si Helaman nagpaathag, “ Dumduma, dumduma nga sa bato nga aton Manunubos, nga si Cristo, ang Anak sang Dios, nga kinahanglan ninyo ipasad ang inyo pundasyon; agud kon ang yawa magapadala sang iya mabaskog nga hangin, huo, sang iya mga baslay sa buhawi, huo, kon ang tanan niya nga ulan nga yelo kag ang iya mabaskog nga unos magtupa sa inyo, mangin wala ini sing gahum sa inyo sa pagguyod sa inyo paidalom sa kadadalman sang kalisud kag nagapadayon nga kasubo, tungod sang bato nga sa diin kamo napasad, nga amo ang pat-od nga pundasyon, isa ka pundasyon nga kon ang mga tawo magpasad diri indi sila mahulog.”9
Ang simbolismo ni Cristo nga amo ang “bato” nga kay sin-o dapat naton ipasad ang aton mga kabuhi mapuslanon kaayo. Palihog tandai nga sa sini nga bersikulo ang Manluluwas indi ang pundasyon. Kundi, ginalaygayan kita nga ipasad naton ang aton personal nga espirituhanon nga pundasyon sa Iya.10
Ang pundasyon amo ang parte sang bilding nga nagaangot sini sa duta. Ang mabakod nga pundasyon nagahatag proteksyon gikan sa mga kalamidad kag madamo pa nga mga makahalalit nga pwersa. Ang husto nga pundasyon nagabahin-bahin man sang kabug-aton sang istruktura sa isa ka dako nga lugar agud malikawan ang sobra nga pagpabug-at sa duta sa idalom kag magtigana sang tapan nga duta para sa konstruksion.
Ang isa ka mabakod kag masaligan nga koneksyon sa ulot sang duta kag sang pundasyon importante agud ang istruktura magapabilin nga mapag-on kag estable sa madugay nga panahon. Kag sa partikular nga mga klase sang konstruksion, ang mga kabilyada kag mga kabilya mahimo nga itabid sa pundasyon sang bilding agud “banigan,” ang matig-a, solido nga bato sa idalom kasubong sang duta kag graba.
Sa kasubong man nga paagi, ang pundasyon sang aton mga kabuhi kinahangalan makonekta sa bato ni Cristo agud magpabilin kita nga malig-on kag mabakod. Ang sagrado nga mga kasugtanan kag mga ordinansa sang ginpanumbalik nga ebanghelyo sang Manluluwas mahimo nga ikumparar sa mga kabilyada kag mga kabilya nga ginagamit sa pagkonekta sang isa ka bilding sa palatukodan. Sa kada tion nga kita matinuohon nga nagabaton, nagarebyu, nagadumdum, kag nagabag-o sang sagrado nga mga kasugtanan, ang aton espirtiuhanon nga mga kabilyada naseguru sing mas malig-on kag mas mabakod sa “bato” ni Jesucristo.
“Gani, kon sin-o man ang magpati sa Dios mahimo nga maglaum sing pat-od sa isa ka mas maayo nga kalibutan, huo, bisan isa ka lugar sa tuo nayon nga kamot sang Dios, nga ang amo nga paglaum nagaabot tungod sang pagtuo, nagaserbe nga angkla sa mga kalag sang mga tawo, nga magahimo sa ila nga mabakod kag malig-on, nga dalayon nga nagabugana sa maayo nga mga binuhatan, nga natuytuyan sa paghimaya sa Dios.”11
“Sa pagligad sang panahon,”12 mas naganami kag nagamuad “ang pagkamatarong [magaadorno sang aton] mga panghunahuna sing wala’y untat,” ang aton “pagsalig [magabakod nga magabakod] sa presensya sang Dios,” kag “ang Balaan nga Espiritu [mangin dalayon naton] nga kaupod.”13 Mangin mas dalayon kita nga napasad, nakapanggamot, nakaplastar, kag naglig-on.14 Kon ang pundasyon sang aton mga kabuhi napasad sa Manluluwas, ginpakamaayo kita “nga magpahimuyong”—agud makaangkon sang espirituhanon nga pagpasalig nga ang Dios amo ang aton Amay nga Langitnon, kita mga anak Niya, kag si Jesucristo ang aton Manluluwas.
Sagrado nga Tinion, Balaan nga mga Duog, kag ang Puluy-an
Ang Ginuo nagaaman sang mga sagrado nga tinion kag balaan nga mga duog agud buligan kita nga makaeskperiyensya kag makatuon parte sining pagpahimuyong sang aton mga kalag.
Halimbawa, ang Aldaw sang Inugpahuway adlaw sang Dios, isa ka sagrado nga tion nga ginpain sa pagdumdum kag pagsimba sa Amay sa ngalan sang Iya Anak, sa pagpartisipar sa mga ordinansa sang priesthood, kag pagbaton kag pag-bag-o sang mga sagrado nga mga kasugtanan. Kada semana aton ginasimba ang Ginuo sa tion sang aton pagtuon sa balay kag subong man bilang “mga makigbanwahanon upod sa mga balaan”15 sa tion sang pang-sakramento kag iban pa nga mga miting. Sa sini nga adlaw, ang aton mga hunahuna, mga ginabuhat, kag panghulaghulag mga senyales nga ginahatag naton sa Dios kag indikasyon sang aton pagpalangga sa Iya.16 Kada Dominggo, kon luyag naton, pwede kita magpahimuyong kag hibal-on nga ang Dios amo ang Amay nga Langitnon, kita mga anak Niya, kag si Jesucristo ang aton Manluluwas.
Ang sentro nga presentasyon sang aton pagsimba sa Adlaw nga Inugpahuway amo ang “magkadto sa balay sang pagpangamuyo kag maghalad sang [aton] mga sakramento sa balaan nga adlaw [sang Ginuo].”17 Ang“[mga] balay sang pagpangamuyo” kon sa diin kita nagatipon sa Adlaw nga Inugpahuway amo ang mga meetinghouse kag ang iban pa nga ginpahanugotan nga mga pasilidad—balaan nga mga duog sang pagtahod, pagsimba, kag pagtuon. Ang kada meetinghouse kag pasilidad ginadedikar paagi sa awtoridad sang priesthood bilang balaan nga duog sa diin ang Espiritu sang Ginuo mahimo magpuyo kag sa diin ang mga anak sang Dios magkaara sang “ihibalo sang ila Manunubos.”18 Kon luyag naton, pwede kita “magpahimuyong” sa aton balaan nga mga duog sang pagsimba kag hibal-on sang mas pat-od nga ang Dios amo ang aton Amay nga Langitnon, kita mga anak Niya, kag si Jesucristo ang aton Manluluwas.
Ang templo isa pa ka balaan nga duog espesyal nga ginpain para sa pagsimba kag pag-alagad sa Dios kag pagtuon sang wala katapusan nga mga kamatuoran. Nagahunahuna kita, nagagiho, kag nagabiste sing pinasahi sa balaan nga balay sang Ginuo sangsa iban nga duog sa diin kita nagapirme. Sa Iya balaan nga balay, kon luyag naton, pwede kita magpahimuyong kag hibal-on nga ang Dios amo ang aton Amay nga Langitnon, kita mga anak Niya, kag si Jesucristo ang aton Manluluwas.
Ang panguna nga mga katuyuan sang sagrado nga tion kag balaan nga mga duog eksakto gid nga magkapareho: agud liwat-liwat nga itutok ang aton atensyon sa Amay nga Langitnon kag sa Iya plano, sa kay Ginuong Jesucristo kag sa Iya Pagbayad-Sala, sa nagatinlo nga gahom sang Balaan nga Espiritu, kag sa mga promisa nga naangot sa sagrado nga mga ordinansa kag mga kasugtanan sa ginpanumbalik nga ebanghelyo ni Jesucristo.
Karon, suliton ko ang isa ka prinsipyo nga sang nagligad akon gindagmit. Ang aton mga puluy-an dapat mangin labing maayo nga kombinasyon sang pareho sagrado nga tion kag balaan nga duog sa diin ang mga indibidwal kag mga panimalay pwede “magpahimuyong” kag hibal-on nga ang Dios amo ang aton Amay nga Langitnon, kita mga anak Niya, kag si Jesucristo ang aton Manluluwas. Ang pagbiya sang aton mga puluy-an agud magsimba sa Ginuo sa Adlaw nga Inugpahuway pat-od nga importante. Apang lamang kon makabalik kita sa aton mga puluy-an nga may espirituhanon nga panan-aw kag kusog nga nabaton halin sadtong mga balaan nga duog kag aktibidades nga sarang kita makapadayon sa aton pagtutok sa mga panguna nga katuyoan sang dutan-on nga kabuhi kag lampuwasan ang mga nagalapnag nga mga pagsulay sa aton napukan nga kalibutan.
Ang aton nagapadayon nga mga eksperiyensya sa Adlaw nga Inugpahuway, templo, kag puluy-an dapat magpalig-on sa aton paagi sa gahom sang Balaan nga Espiritu, nga may nagapadayon nga mas mabakod nga koneksyon sa kasugtanan sa Amay kag sa Anak, kag “may perpekto nga kasanagan sang paglaum”19 sa walay katapusan nga mga pangako sang Dios.
Kon ang puluy-an kag ang Simbahan gintingob agud mag-isa kay Cristo,20 mahimo nga ginaipit kita sa tagsa ka kilid apang wala kita mapioti sa aton mga hunahuna kag balatyagon. Mahimo nga ginaligban kita sang aton mga sikumstansya kag mga hangkat, apang indi kita mawad-an sang paglaum. Mahimo nga ginahingabot kita, apang aton marealisar nga wala kita nagaisahanon.21 Mahimo kita makabaton sang espirituhanon nga kusog agud magpabilin nga malig-on, matutom kag tampad.
Promisa kag Panaksihon
Ginapromisa ko nga sa pagpasad naton sang pundasyon sang aton mga kabuhi sa “bato” ni Jesucristo, pagapakamaayuhon kita sang Balaan nga Espiritu nga makabaton sang pang-indibidwal kag pang-espirituhanon nga pagpahimuyong sang kalag nga nagatugot sa aton nga mahibal-an kag madumduman nga ang Dios amo ang aton Amay nga Langitnon, kita mga anak Niya, kag si Jesucristo ang aton Manluluwas, kag sarang kita bugayan nga malampuwasan ang mabudlay nga mga butang.
Malipayon ako nga nagasaksi nga ang Dios amo ang aton Amay nga Langitnon, kita mga anak Niya, kag si Jesucristo ang aton Manunubos, kag ang “bato” sang aton kaluwasan. Ako nagapamatuod gid sa sagrado nga ngalan ni Ginuong Jesucristo, amen.