Si Jesucristo sa Sentro sang Aton mga Kabuhi

Samtang nagapagpanglakaton kita sa mortal nga kabuhi, sa panalagsa ginatublag kita sang mga pagtilaw: ang tuman kasakit nga mawad-an sang mga hinigugma, makakalapoy nga pagbato sa balatian, ang kasakit sang kawalay hustisya, ang makatulublag nga mga eksperiyensia sang pagpanggamo ukon pagpang-abuso, ang kawala sing trabaho, pangpamilya nga mga kapipit-an, ang tago nga mga bakho sang kapung-aw, ukon ang mga makahalanusbo nga mga konsikwesya sang mga armado nga pag-ilinaway.¹ Sa kasubong sina nga mga sitwasyon, ang aton kalag nagahandum sang dalangpan.² Hanuot kita nga nagapangita agud mahibal-an: Diin ako mangita sang paghidaet?³ Sa kay sin-o naton pwede ibutang ang aton pagsalig agud buligan kita nga may kompiansa kag kusog sa paglampuwas sining mga hangkat?⁴ Sin-o ang may ara sang pasensya, sang nagapaisog nga gugma, kag sang labing gamhanan nga kamot agud maglugpay kag magsakdag sa aton?

Ang madalom nga mga pamangkot sang kalag, inang nagguluwa sa panahon sang tuman nga kalisud kag kasakit, ginasabat sang tayuyon nga gugma ni Jesuscristo.⁵ Sa Iya, kag paagi sa ginpromisa nga mga bugay sang Iya ginpanumbalik nga ebanghelyo,⁶ makita naton ang mga sabat nga aton ginapangita. Paagi ini sa walay dulonan nga Pagbayad-sala nga ginatanyagan kita sang walay tupong nga regalo—isa sang paglaum, pag-ayo, kag ang pasalig sang Iya wala-nagaliwat, nagapadayon nga presensya sa aton mga kabuhi.⁷ Ini nga regalo para sa tanan nga nagatinguha nga may pagtuo, nga nagabaton sang paghidaet kag pagtubos nga Iya ginatanyag sang libre.

Ang Ginuo nagatanyag sang iya paghidaet kag pagtubos sa kada isa sa aton, isa ka akto nga amo ang pinakakahulugan sang Iya diosnon nga pagpalangga kag kaayo. Ang Iya pangagda sa aton labaw pa sangsa isa ka panawagan; isa ini ka diosnon nga pangako, ginpabaskog sang nagapadayon nga gahum sang Iya grasya. Sa balaan nga mga kasulatan, mapinalanggaon Niya kita nga ginapasalig:

“Kari sa akon, tanan kamo nga ginabudlayan kag ginabug-atan, kag papahuwayon ko kamo.

“Itakod ang akon gota sa inyo, kag magtuon kamo sa akon; kay ako mapainubuson kag malulo sa tagipusuon: kag makakita kamo sang kapahuwayan sa inyo mga kalag.

“Kay ang akon gota mahulas, kag ang akon lulan mamag-an.”⁸

Ang kaathag sang Iya pangagda “magpalapit sa akon” kag “itakod ang akon gota” nagapamatuod sang daku nga kinaugali sang Iya promisa—promisa nga tuman kadaku kag kabug-os nga nagasakop ini sang Iya gugma, nga nagatanyag sa aton sang balaan nga pagpasalig: “Makakita kamo sang kapahuwayan.”

Kon matutom kita nga nagapangita sang espirituhanon nga paggiya,⁹ nagasugod kita sa proseso sang personal nga pagtubo kag pag-uswag nga nagapabaskog sang aton testimonya. Kon aton ginahangop ang kasangkaron sang himpit nga gugma sang aton Amay nga Langitnon kag ni Jesucristo,¹⁰ ang aton mga tagipusuon puno sang kapasalamatan, pagpaubos,¹¹ kag ginbag-o nga handum sa pagpadayon sa dalan sang pagkadisipulo.¹²

Si Pangulong Russell M. Nelson nagtudlo nga “kon ang tutok sang aton mga kabuhi yara sa plano sang kaluwasan sang Dios … kag kay Jesucristo kag sa Iya ebanghelyo, makabatyag kita sang kalipay walay sapayan sang nagakatabo—ukon wala nagakatabo—sa aton mga kabuhi. Ang kalipay nagahalin sa Iya kag bangud sa Iya.”¹³

Si Alma, nga nagahambal sa iya anak nga si Helaman, nagpahayag: “Kag karon, O Helaman, anak ko, tan-awa, yara ka sa imo pagkapamatan-on, kag gani, nagapakitluoy ako sa imo nga pamatian mo ang akon mga pulong kag magtuon sa akon; kay nakahibalo ako nga kon sin-o man ang magbutang sang ila pagsalig sa Dios pagasakdagon sa ila mga pagtilaw, kag sa ila mga kabudlayan, kag sa ila mga pag-antos, kag pagabayawon sa katapusan nga adlaw.”¹⁴

Si Helaman, nga nagahambal sa iya mga anak, nagtudlo parte sining wala katapusan nga prinsipyo sa pagbutang sang Manluluwas sa sentro sang aton mga kabuhi: “Dumduma, dumduma nga sa bató nga aton Manunubos nga si Cristo, ang Anak sang Dios, nga kinahanglan ninyo ipasad ang inyo pundasyon.”¹⁵

Sa Mateo 14 aton matun-an nga sang mabatian ang parte sa pagkamatay ni Juan Bautista, si Jesus nangita sang higayon nga mag-isahanon. Apang ang daku nga kadam-an nagsunod sa Iya. Natandog sang kaluoy kag pagpalangga, kag wala ginatugotan ang Iya pagpangasubo nga magtublag sa Iya sa Iya misyon, gin-abiabi sila ni Jesus, ginpaayo ang may sakit sa ila. Sang mag-abot ang gab-i,ang mga disipulo nag-atubang sang mabudlay nga hangkat: may madamo nga tawo pero diutay ang pagkaon. Ginpanugyan nila nga papulion ang kadam-an agud mangita sang ila pagkaon, apang si Jesus, naluoy sa ila, [gani] Iya ginhambalan ang Iya mga disipulo nga pakan-on na lang sila.

Samtang masako ang mga disipulo sa ila nga problema, ginpakita ni Jesus ang Iya pagsalig sa kag pagpalangga sa Iya Amay, upod sang Iya malig-on nga pagpalangga para sa katawhan. Ginpapungko Niya ang mga tawo sa hilamon, kag nagkuha lamang sang 5 ka tinapay kay 2 ka isda, ginpili Niya nga magpasalamat sa Iya Amay, nga ginakilala ang pag-aman sang Dios labaw sa Iya awtoridad kag gahum.

Pagkatapos Niya nga magpasalamat, gintipiktipik ni Jesus ang tinapay, kag ginpanagtag ini sang mga disipulo sa mga tawo. Milagroso nga, ang pagkaon indi lang bastante kundi may nabilin pa nga 12 ka basket. Ang mga napakaon sang grupo naglakip sang 5,000 ka tawo upod ang mga babayi kag kabataan.¹⁶

Ining milagro nagatudlo sang isa ka maathag nga leksyon: kon makasugata sang mga hangkat, mahapos magtutok sing lubos sa aton mga kabudlayan. Apang, si Jesus ehemplo sang gahum sa pagtutok sa Iya Amay, pagpasalamat, kag pagkilala nga ang mga solusyon sang aton mga pagtilaw wala pirme nagadepende sa aton, kundi sa Dios.¹⁷

Kon makasugata kita sang mga kabudlayan, natural sa aton ang magtutok sa mga sablag nga aton ginaatubang. Ang aton mga kabudlayan matuodtuod kag nagakuha ang aton atensyon, pero ang prinsipyo agud daugon ang mga ini amo ang kon sa diin ang aton tutok. Paagi sa pagbutang kay Cristo sa sentro sang aton mga hunahuna kag mga ginabuhat, aton ginapahisanto ang aton kaugalingon sa Iya panan-aw kag kusog.¹⁸ Ini nga pagbag-o wala nagabalewala sang aton mga paghimud-os; kundi, nagabulig ini sa aton sa pagmaniobra sang mga ini sa bulig sang diosnon nga paggiya.¹⁹ Gani, nagadiskubre kita sang mga solusyon kag suporta nga nagahalin sa mas mataas nga kaalam. Ang pagsunod sang panan-aw nga nasentro-kay-Cristo nagahatag sa aton sang gahum nga may kabakod kag panan-aw nga nagahimo sang aton mga pagtilaw nga mga kadalag-an,²⁰ nga nagapahanumdum sa aton nga upod sa Manluluwas, and dawsa kadaku nga problema sarang mangin isa ka mas daku nga espirituhaon nga pag-uswag.

Ang istorya ni Alma nga lamharon sa Libro ni Mormon nagapresentar sang makapakumbinsi nga istorya sang pagtubos kag daku nga epekto sang pagsentro sang kabuhi sang isa ka tawo kay Cristo. Sa una gid, si Alma isa ka pangontra sang Simbahan sang Ginuo, nga nagadala sang madamo nga tawo palayo sa dalan sang pagkamatarong. Ugaling, ang diosnon nga pagpatunga, nga ginpakita sa pagbisita sang anghel, nagparealisar sa iya sang iya mga nahimo nga sala.

Sa iya pinakamasubo nga tinion, nga ginpaantos sang iya kabasulanan kag kadesperado nga makagwa sa iya espirituhanon nga kasakit, nadumduman ni Alma ang mga panudlo sang iya amay parte kay Jesucristo kag ang gahum sang Iya Pagbayad-sala. Nga nabatyagan ang pagkinahanglan sang bulig, sinsero sia nga naghinulsol kag nagpakitluoy sa Ginuo. Ining importante nga tion sang pagbaton, nga nagkinahanglan sang bulig ni Cristo sang si Alma hugot nga pagpapangyo sang Iya kaluoy amo ang nagpahanabu sang iya daku nga pagbag-o. Ang iya mabug-at nga mga sala kag kasubo nadula kag nabuslan sang makahalawhaw nga kalipay kag paghidaet.²¹

Si Jesucristo ang aton pag-asa kag sabat sa pinakahapdi nga mga kasakit. Tungod sa Iya pagsakripisyo, Iya ginbayaran ang aton mga sala kag ginpas-an Niya ang tanan naton nga pag-antos—kasakit, pagkawalay hustisya, kasubo, kag kahadlok—kay Iya kita ginapatawad kag ginaayo kon nagasalig kita sa Iya kag nagapangita sang pagbag-o sa aton mga kabuhi para sa kaayohan. Sia ang aton Manug-ayo,²² nga nagapaumpaw kag nagaayo sang aton mga tagipusuon paagi sa Iya gugma kag gahum, pareho nga Iya gin-ayo ang madamo nga tawo sang Iya panahon sa duta.²³ Sia ang tubig nga buhi, nga nagabusog sang dalagku nga mga panginahanglan sang aton mga kalag paagi sa Iya padayon nga gugma kag kaayo. Pareho ini sa Iya ginpromisa sa babaying Samariahanon sa may bubon, nga nagatanyag sang “tuman nga kaumpawan sa wala katapusan.”²⁴

Maligdong ako nga nagasaksi nga si Jesucristo buhi, nga Sia ang nagapanguna sini, ang Iya sagrado nga Simbahan, Ang Simbahan ni Jesucristo sang mga Santos sa Ulihing mga Adlaw.²⁵ Nagapamatuod ako nga Sia ang Manluluwas sang kalibutan, ang Prinsipe sang Paghidaet,²⁶ ang Hari sang mga hari, ang Ginuo sang mga ginuo,²⁷ang Manunubos sang kalibutan. Ginapamatud-an ko nga ara kita pirme sa Iya panghunahuna kag tagipusuon. Bilang pamatuod sini, Iya ginpanumbalik ang Iya Simbahan sa sining ulihing mga adlaw kag gintawag si Pangulong Russell M. Nelson bilang Iya propeta kag Pangulo sang Simbahan sa sini nga panahon.²⁸ Nakahibalo ako nga ginhatag ni Jesucristo ang Iya kabuhi agud mahimo kita makaangkon sang kabuhi nga wala katapusan.

Kon magtinguha kita nga ibutang Sia sa sentro sang aton mga kabuhi, amat-amat nga magaabot sa aton ang mga rebelasyon, ang Iya bug-os nga paghidaet magalikop sa aton, kag ang iya walay dulonan nga Pagbayad-sala magadala sang aton kapatawaran kag pag-ayo.²⁹ Tungod sa Iya nga aton makadiskubrehan ang kusog sa paglampuwas, ang kaisog sa pagpadayon, kag ang paghidaet nga nagalabaw sa tanan nga paghangop. Kabay nga magtinguha kita kada adlaw nga magpalapit sa Iya, ang ginahalinan sang tanan nga kaayohan,³⁰ ang kasanag sang pag-asa sa aton pagpanglakaton pabalik sa presensya sang aton Amay nga Langitnon. Sa sagrado nga ngalan ni Jesucristo, amen.