Kompiansa sa Kasugtanan paagi kay Jesucristo

Pinalangga kong kautoran, ginapangamuyo ko nga espirituhanon kita nga mabag-o sa mga inspirado nga mga mensahe halin sa aton mga lideres sining katapusan sang semana kag magkalipay sa inang ginatawag ko nga “kompiansa sa kasugtanan paagi kay Jesucristo.” Ining kompiansa amo ang malinong apang segurado mga pasalig nga makabaton sang mga bugay nga ginapromisa sang Dios para sa ila nga nagatipig sang ila mga kasugtanan kag kinahanglanon gid kaayo sa tunga sang makahalangkat nga mga kahimtangan sa aton panahon.

Ang pagpatindog sang bag-o nga mga balay sang Ginuo sa bug-os nga kalibutan, sa idalom sang liderato ni Pangulong Nelson, naghatag sang dako nga kalipay sa mga miyembro sang Simbahan kag nagaserbe nga isa ka importante nga simbolo sang pagpasangkad sang ginharian sang Ginuo.

Nga ginabinagbinag ang akon makahalawhaw nga eksperiyensya sa pagdedikar sang Templo sa Feather River sa California sang nagligad nga Oktubre, nagkabalaka ako nga kon kis-a ginaagaw ang aton igtalupangod sang kalangkag nga makaangkon sang bag-o nga mga templo sa aton mga siudad kag mga kumunidad kag napatumbayaan ang mas balaan nga katuyoan sang paghimo sang sagrado nga mga kasugtanan sa templo.

Sa gwa sang kada templo, nakasulat ang maligdong nga pamulong “Balaan sa Ginuo.”¹ Ining inspirado nga imbitasyon, nga kon magsulod kita sa balay sang Ginuo, nagaumpisa kita sa sagrado nga pagpanglakaton sa pagtuon nga mangin mas putli kag mas balaan nga mga disipulo ni Jesucristo. Sa aton paghimo sang mga kasugtanan sa pagkabalaan sa atubang sang Dios kag nagakomiter sa pagsunod sa Manluluwas, makabaton kita sang gahum sa pagbag-o sang aton mga tagipusuon, pagbag-o sang aton mga espiritu, kag pagpadalom sang aton kaangatanan sa Iya. Ang kasubong sina nga pagpanikasog magatinlo sang aton mga kalag kag magaporma sang sagrado nga koneksyon sa Dios kag kay Jesucristo, nga nagpromisa nga sarang kita magpanubli sang regalo nga kabuhi nga wala katapusan.² Ang resulta sining sagrado nga pagpanglakaton amo nga makaangkon kita sang mas balaan kag mas putli nga kompiansa para sa aton adlaw-adlaw nga pagpangabuhi suno sa mga kasugtanan nga aton ginhimo paagi kay Jesucristo.

Ang kasubong sina nga kompiansa amo ang pinakamataas sang aton diosnon nga koneksyon sa Dios kag makabulig pabaskog sang aton debosyon sa, kag kapasalamatan para kay Jesucristo kag sa Iya sakripisyo sa pagbayad-sala. Nagapabakod ini sang aton ikasarang sa paghigugma kag pag-alagad sa iban [nga tawo], kag nagapabaskog ini sang aton kalag sa pagpuyo sa di-balaan nga kalibutan nga nagadulom nga nagadulom kag makapaluya. Nagapabakod ini sa aton agud daugon ang mga binhi sang pangduhaduha, kahadlok kag kapaslawan, kasakit kag pagkawalay paglaum nga ginatanom sang kaaway sa aton mga balatyagon ilabi na kon mabudlay ang pangabuhi, malawig ang mga pagtilaw, ukon mabudlay ang mga sirkumstansya. Isa ka bersikulo sa bibliya ang may manami nga laygay sa kada isa sa aton kon nagapakigbato kita sa mga mapintas kag mabug-at nga mga hangkat sa karon nga panahon: “Gani, indi ninyo pag-isikway ang inyo mga pagsalig.”³

Mahal nga kautoran, sila nga nagaangkon sang kompiansa sa mga kasugtanan nga ginhimo sa balay sang Ginuo paagi kay Jesucristo may ara sang gahum nga isa sa mga pinakadako nga pwersa nga sarang naton makuha sa sini nga kabuhi.

Sa aton pagtuon sang Libro ni Mormon sa Dali, Magsunod sa Akonsini nga tuig, aton nasaksihan kon ano katahum nga ginpakita ni Nephi ang gahum sining sahi sang kompiansa sa kasugtanan paagi sa iya katutom sang maatubang niya ang madamo nga kapaslawan kag mga hangkat, pareho sang pagkuha sang mga lamina suno sa sugo sang Ginuo. Si Nephi, wala sapayan sang tuman nga pangasubo sa kahadlok kag kakulang sa pagtuo nanday Laman kag Lemuel, nagpabilin nga determinado kag may pagsalig nga ihatag sang Ginuo ang mga lamina sa ila. Nagsiling sia sa iya mga utod, “Pareho nga nagakabuhi ang Ginuo, kag pareho nga nagakabuhi kita, indi kita manaog sa aton amay sa kamingawan tubtob nga mahimo naton ang butang nga ginasugo sa aton sang Ginuo.”⁴ Tungod sang kompiansa ni Nephi sa mga promisa sang Dios, natuman niya ang ginsugo sa iya nga iya himuon.⁵ Sang-ulihi, sa iya panan-awon, nakita ni Nephi ang impluwensya sining sahi sang kompiansa, nga nagasulat, “Ako, si Nephi, nakakita sang gahum sang Kordero sang Dios, nga nagpanaog ini sa mga santos sang simbahan sang Kordero, kag sa katawhan sa kasugtanan sang Ginuo kag sila naarmasan sang pagkamatarong kag kaupod ang gahum sang Dios sa dako nga himaya.”⁶

Nakita ko mismo ang mapinalanggaon nga mga promisa kag gahum sang Ginuo nga nagalab-ot sa mga kabuhi sang mga anak sang Dios, nga nagapabakod sa ila sa pag-atubang sang mga kabudlayan sa kabuhi. Sining karon lang ang akon asawa nag-abot halin sa pagsimba sa templo kag ginsugiran ako kon daw ano kadako ang epekto sa iya sang iya naeksperiyensyahan didto. Sang nagapasulod sia sa balay sang Ginuo, nakita niya ang isa ka lalaki nga naka-wheelchair nga nagagiho sing tuman kahinay kag isa ka babayi nga ginabudlayan maglakat gamit ang baston, ang duha maisog nga nagakadto sa pagsimba kag makig-upod sa Ginuo sa Iya balay. Pagsulod sang akon asawa sa may initiatory, nakita niya ang isa ka manami nga sister, nga wala sing isa ka butkon—kag may diutay lang nga parte ang pihak nga butkon—ginahimo sing maayo ang ano man nga ulobrahon nga ginahatag sa iya.

Sang naghambalanay kami sang akon asawa parte sinang eksperiyensya, amon ginhinakop nga ang tunay kag hugot lamang nga pagsalig sa walay katapusan nga mga promisa sang Dios ang makapahanabo paagi sa balaan nga mga kasugtanan nga ginhimo upod sa Iya sa Iya balay nga inang dalayawon nga mga disipulo ni Cristo magbiya sa ila mga puluy-an sa sinang matugnaw kaayo nga adlaw, walay sapayan sang ila personal nga mga kahimtangan.

Pinalangga kong mga kaabyanan, kon may isa ka importante nga bagay nga aton maangkon—kag pwede naton mapasa sa aton kabataan kag kaapohan nga makabulig sa tagsa sa ila sa mga pagtilaw kag mga kabudlayan sa ulihi—amo ining pagsalig sa mga kasugtanan nga ginhimo paagi kay Jesucristo. Ang mag-angkon sang kasubong sina nga diosnon nga ginapanag-iyahan magabulig sa ila nga magpangabuhi subong sang ginpromisa sang Ginuo sa iya mainunungon nga mga sumulunod: “Ang akon mga disipulo magatindog sa balaan nga mga lugar, kag indi maisdog.”⁷

Paano kita makaangkon sang kasubong sina nga pagsalig paagi kay Jesucristo? Nagaabot ini sa pagpaubos, pagsentro sang aton mga kabuhi sa Manluluwas, pagpangabuhi sang mga prinsipyo sang ebanghelyo ni Jesucristo, pagbaton sang ordinansa sang kaluwasan kag pangkahitaasan, kag pagtahod sang mga kasugtanan nga aton ginhimo upod ang Dios sa iya balay nga balaan.

Sa iya panghingapos nga pamulongpulong sang Oktubre 2019 nga pangkabilogan nga komperensya, ang aton mahal nga propeta nagpahanumdum sa aton parte sa importante nga tikang sa pag-angkon naton sang kompiansa sa kasugtanan, nga nagasiling: “Ang indibidwal nga katakos sa pagsulod sa balay sang Ginuo nagapangayo sang madamo nga indibidwal nga espirituhanon nga mga preparation. … Ang indibidwal nga katakos nagakinahanglan sang bug-os nga pagbag-o sang hunahuna kag tagipusuon nga mangin mas pareho sa Ginuo, nga mangin tampad nga pumuluyo, nga mangin mas maayo nga ehemplo, kag mangin mas balaan nga tawo.”⁸ Gani, kon aton bag-uhon ang aton pagpanghanda sa pagsulod sa templo, mabag-o naton ang aton eksperiyensya sa templo, nga magabag-o sang aton mga kabuhi sa gwa sang templo, “Tugoti ang pagkamatarong nga magpuno sang imo panghuna-huna sing wala untat; nian ang imo pagsalig magabakod sa presensya sang Dios; kag ang doktrina sang priesthood magatinlo sang imo kalag kasubong sang mga tun-og gikan sa langit.”⁹

Isa ka bishop ang kilala ko nga ang iya panawag sa pinakadaan nga klase sa Primary indi bilang klase sa “Primary” kundi klase sa “temple preparation [pagpanghanda sa pagsulod sa templo.” Pagka-Enero ginapakadto sang bishop sa iya opisina ang mga miyembro sang klase kag ang ila mga titser sa diin ginahambalan nila kon paano nila gamiton ang bilog nga tuig para sa paghanda sa pagsulod sa templo. Ang bishop nagahatag sang tion nga magrebyu sang mga pamangkot sa pag-interbyu para sa temple recommend, sa diin ang mga ini ginalakip sa ila mga leksyon sa Primary. Ginaagda niya ang mga bata nga mangin handa agud nga kon magkadto sila sa opisina sang bishop matapos ang isa ka tuig, may pagsalig sila, may pagsalig sa kasugtanan, handa nga magbaton sang temple recommend kag magsulod sa balay sang Ginuo. Sini nga tuig, ang bishop may apat ka magagmay nga bata nga babayi nga nalangkag kaayo, nakahanda na kag may pagsalig nga magkadto sa templo nga luyag nila i-imprinta sang bishop ang ila mga recommend sa Adlaw sang Bag-ong Tuig sa 12:01 a.m.

Ang pagpanghanda indi lamang para sa ila nga magakadto sa templo sa una nga tion. Dapat dalayon kita nga nagahanda sa pagkadto sa balay sang Ginuo. May nahibal-an ako nga isa ka stake nga may hulubaton nga “Nakasentro sa puluy-an, Suportado sang Simbahan, kag padulong sa templo.” Padulong [Bound]¹⁰ isa ka interesante nga pulong nga buot silingon nakatutok sa isa ka direksyon, pero nagakahulugan man ini nga gintapik sa ukon ginproteksyunan paagi sa, ginpat-od, kag ginpiho, ginsigurado. Gani ang magpadulong sa templo [temple bound] nagapalig-on sa aton sa Manluluwas, nagahatag sa aton sang husto nga paggiya kag kalig-unan samtang ginasiguro nga may kompiansa kita sa kasugtanan paagi kay Jesucristo. Gani, dapat gid naton tanan tuyuon nga mas mapabakod pa gid inang pagpadulong paagi sa pag-iskedyul sang aton pagbisita liwat sa Ginuo sa Iya balaan nga balay, malapit man o malayo ang templo.¹¹

Ang aton pinalangga nga propeta nga si Pangulong Russell M. Nelson, nagapahanundum sa aton parte sa sining importante nga mga prinsipyo nga nagsiling: “Ang templo ara sa sentro sang pagpabakod sang aton pagtuo kag espiritwal nga kapag-on tungod ang Manluluwas kag ang Iya doktrina amo ang sentro sang templo. Ang tanan nga ginatudlo sa templo, paagi sa panulin kag paagi sa Espiritu, nagapadugang sang aton paghangop kay Jesucristo. Ang Iya importante gid nga mga ordinansa nagabugkos sa aton sa Iya paagi sa sagrado nga mga kasugtanan sang priesthood. Dayon, samtang aton ginatipigan ang aton mga kasugtanan, ginabugayan Niya kita sang Iyanagapang-ayo, nagapabaskog nga gahum. Kag o, daw ano naton kakinahanglan ang Iya gahum sa mga adlaw nga maabot.”¹²

Handum sang Manluluwas nga mangin handa kita sa pag-intiendi, sing maathag kaayo, kon paano gid mag-akto kon maghimo kita sang mga kasugtanan upod ang aton Amay nga Langitnon sa Iya ngalan. Luyag Niya nga handa kita nga maekperiyensyahan ang aton mga prebilihiyo, mga promisa, kag mga responsibilidad; mangin handa nga makaangkon sang espirituhanon nga mga panan-aw kag pagpamukaw nga kinahanglanon naton sa sining kabuhi. Nakahibalo ako nga kon makita sang Ginuo ang bisan isa ka igpat sang handum ukon gamay lang nga matarong nga pagpanikasog sa aton kahanda nga isentro ang aton mga kabuhi sa Iya, kag sa mga ordinansa kag mga kasugtanan nga aton ginahimo sa Iya balay, pakamaayuhon Niya kita, sa Iya perpekto nga pamaagi, upod ang mga milagro kag mapinalanggaon nga kaluoy nga ginakinahanglan naton.

Ang balay sang Ginuo [amo ang duog] sa diin pwede kita mabag-o sa mas putli kag mas balaan nga mga paagi. Gani, kon maggwa kita sa templo, nga nabag-o paagi sa aton paglaum sa mga promisa sang mga kasugtanan, naarmasan sang gahum halin sa langit, ginadala naton ang templo upod sa aton pasulod sa aton mga puluy-an kag mga kabuhi. Ginapasalig ko kamo nga magabag-o kita sing lubos kon ara sa sulod naton ang espiritu sang balay sang Ginuo.

Nahibal-an man naton sa templo nga kon luyag naton nga ang Espiritu sang Ginuo indi mapunggan sa aton mga kabuhi, simple lang nga indi kita pwede kag indi dapat maghupot sang indi manami nga mga balatyagon sa iban. Ang pag-intertenar sang mga indi maayo nga mga balatygon ukon mga pamensaon magapagwa sang indi maayo nga mga tinaga kag mga buhat, sa social media man ukon sa aton mga puluy-an, nga magapapalayo sang Espiritu sang Ginuo sa aton mga tagipusuon. Gani, indi niyo palihog pag-isikway ang inyo kompiansa, sa baylo, pabakura ang inyo pagsalig.

Ang nagasige kag nagadamo nga pagpatindog sang mga templo magapadayon sa pagpalangkag, pag-inspirar, kay pagbugay sa aton. Pero ang mas importante, sa aton pagbag-o sang aton pagpanghanda sa pagsulod sa templo, mabag-o [man] naton ang aton eksperiyensya sa templo, nga magabag-o sang aton mga kabuhi sa gwa sang templo. Kabay nga ining pag-bag-o magahatag sa aton sang kompiansa sa mga sagrado nga mga kasugtanan nga aton ginhimo sa Dios paagi kay Jesucristo. Buhi ang Dios, si Jesucristo ang aton Manluluwas kag amo ini ang Iya ginpanumbalik nga Simbahan diri sa duta. Matinahuron ko nga ginapahayag ining mga kamatuoran sa sagrado nga ngalan sang aton Manluluwas nga si Jesucristo, amen.