Bunga nga Nagapadayon

Nanamian gid ako sang preska, luto nga peaches sang bata pa ako. Asta subong, nagalaway ako magpanumdum nga magkagat sa maduga, luto nga peach. Kon luto na gid nga puksion ang peach, nagatiner ini sing duha asta apat ka adlaw antes madunot. Indi ko gid malipatan ang akon eksperiyensia upod kay nanay kag sa akon mga utod sa amon kusina samtang ginapreserba ang ginpang-ipo nga peaches para sa maabot nga tigtulugnaw paagi sa pagselyo sang mga ini sa botelya. Kon ensakto ang pagpreserba namon sang peaches, ining manamit nga prutas magatiner sing pila ka tuig, indi lang duha ukon apat ka adlaw. Kon husto ang pagpreparar kag pag-init sang peaches, ang prutas mapreserba mientras nakaselyo.

Si Cristo nagsugo sa aton nga “maglakat kamo kag magpamunga, … kag ang inyo bunga magpadayon.”¹ Pero wala Sia nagahambal parte sa peaches. Nagahambal Sia parte sa mga bugay sang Dios sa Iya mga anak. Kon nagahimo kag nagatuman kita sang mga kasugtanan sa Dios, ang mga bugay nga naangot sa aton mga kasugtanan magapadayon sa pihak nga kinabuhi kag maselyo sa aton, ukon mapreserba, sa katubtuban, nga mangin bunga nga nagapadayon sa wala katapusan.

Ang Balaan nga Espiritu, sa Iya diosnon nga tulumanon bilang Balaan nga Espiritu nga Ginpromisa, magaselyo sang tagsa ka ordinansa sa mga tampad sa ila mga kasugtanan agud nga mabaton ang mga ini sa pihak nga kinabuhi.² Dapat gid selyohan sang Balaan nga Espiritu ang aton mga ordinansa kon gusto naton maangkon ang ginpromisa nga mga bugay sa bilog nga wala katapusan, agud mangin bunga nga nagapadayon.

Importante gid ini kon luyag naton nga mapahitaas.³ Sa gintudlo ni Pangulong Nelson, “dapat anay hangpon ang aton katuyoan antes magsugod. … Piho gid, para sa aton tanan, ang ‘katuyoan’ nga gusto naton malab-ot amo ang magpangabuhi sa katubtuban upod sa aton mga pamilya sa napahitaas nga kahimtangan sa diin ara kita sa presensya sang Dios, nga aton Amay nga Langitnon, kag Iya Anak nga si Jesucristo.”⁴ Si Pangulong Nelson nagsiling man: “Ang selestiyal nga pag-asawahay importante nga bahin sang paghanda para sa kabuhi nga wala katapusan. Nagapangayo ini nga ang isa ka tawo makasal sa husto nga tawo, sa husto nga lugar, kag paagi sa husto nga awtoridad, kag tumanon inang sagrado nga kasugtanan sing tampad. Dayon makasalig sia sang pangkahitaasan sa selestiyal nga ginharian sang Dios.”⁵

Ano ang mga bugay sang pangkahitaasan? Upod diri ang pagpuyo sa presensya sang Dios sa wala katapusan bilang bana kag asawa, nga nagapanubli sang “tanan nga trono kag mga ginsakpan, tanan nga pamunoan kag mga gahum, … kag pagpadayon sang mga kaliwatan tubtob sa wala’y katapusan,”⁶ nga nagabaton sang tanan nga may ara ang Dios nga Amay.⁷

Ang Ginuo nagpahayag paagi kay Joseph Smith:

“Sa selestiyal nga himaya may yara sing tatlo ka langit ukon lebel;

“Kag agud malab-ot ang pinakamataas, ang isa ka tawo kinahanglan magsulod sa sining paagi sang pagkapari [nga amo ang bag-o kag wala’y katubtuban nga kasugtanan sang pag-asawahay];

“Kag kon indi niya ini paghimuon, indi niya ini malab-ot.

“Makasulod sia sa iban apang ina lamang ang dulonan sang iya ginharian; indi sia makadugang sang kaliwat.”⁸

Matun-an naton diri nga ang isa ka tawo pwede makakadto sa selestiyal nga ginharian, ukon magpuyo sa presensya sang Dios, bisan single. Pero para mapahitaas sa pinakamataas nga lebel sang selestiyal nga ginharian, dapat sia makasal paagi sa husto nga awtoridad kag mangin tampad sa mga kasugtanan nga ginhimo sa sinang pag-asawahay. Kon tampad kita sa sining mga kasugtanan, ang Balaan nga Espiritu nga Ginpromisa makaselyo sang aton kasugtanan sa pag-asawahay.⁹ Inang naselyohan nga mga bugay mangin bunga nga nagapadayon.

Ano ang ginapangayo agud tampad nga matuman ang bag-o kag wala katapusan nga kasugtanan sang pag-asawahay?

Si Pangulong Russell M. Nelson nagtudlo nga may duha ka klase sang kaangtanan kon magsulod kita sa sining wala katapusan nga kasugtanan sang pag-asawahay: palapad nga kaangtanan sa tunga sang bana kag asawa; kag paibabaw nga kaangtanan upod sa Dios.¹⁰ Agud maselyohan ang mga bugay sang pangkahitaasan sa aton kag magpadayon tapos sang kamatayon, dapat kita mangin tampad sa aton palapad kag paibabaw nga mga kaangtanan sa kasugtanan.

Agud magpadayon ang palapad nga kaangtanan sa imo bana/asawa, ang Dios naglaygay sa aton nga “higugmaon ang [imo] asawa [ukon bana] sa bug-os mo nga tagipusuon, kag … magpabilin nga tampad sa iya lamang kag wala na sing iban pa.”¹¹ Para sa mga kasado, ang pagpabilin nga tampad sa iya lamang kag wala na sing iban pa nagakahulugan nga magsugilanon kamo sing mahigugmaon, palanggaon kag ulikdan ang isa kag isa, unahon ang tiayon labaw sa iban pa nga mga interes sa gwa, kag magpangamuyo sa Dios agud madaug mo ang imo mga kahuyang.¹² Nagakahulugan man ini nga wala sang bisan ano nga emosyonal ukon sekswal nga kaangtanan sa gwa sang inyo pag-asawahay, upod ang pag-flirt ukon pagdeyt, kag dapat wala sang pornograpiya nga ginahalinan sang kaibog.¹³

Agud matipigan ang palapad nga kaangtanan sa kasugtanan, dapat gustuhon sang mag-asawa nga magpabilin sa pag-asawahay. Si Pangulong Dallin H. Oaks nagtudlo sang sini lang: “Nakahibalo man kita nga indi Niya [Dios] pagpiliton ang bisan sin-o nga magpaselyo nga kontra sa iya pagbuot. Ang mga bugay sang naselyo nga mga relasyon ginpasalig sa mga nagatuman sang ila mga kasugtanan pero indi paagi sa pilit nga pagselyo sang relasyon sa tawo nga indi bagay ukon indi gusto.”¹⁴

Ano ang pa-ibabaw nga kaangtanan nga ginatumod ni Pangulong Nelson? Ang pa-ibabaw nga kaangtanan amo ang ginahimo naton upod sa Dios.

Agud matipigan ang paibabaw nga kaangtanan sa Dios, dapat mangin tampad kita sa mga kasugtanan sa templo nga aton ginhimo parte sa mga layi sang pagtuman, sakripisyo, sang ebanghelyo, kaputli, kag pagkonsagrar. Nagapakighisugot man kita sa Dios nga batonon ang aton wala katapusan nga kaupod kag mangin matarong nga tiayon kag ginikanan. Sa pagtipig naton sang paibabaw nga kaangtanan, kwalipikado kita sa mga bugay tungod bahin kita sang pamilya sang Dios paagi sa kasugtanan kay Abraham, upod ang mga bugay sang kaliwatan, ebanghelyo, kag pagkapari.¹⁵ Ining mga bugay mga bunga man nga nagapadayon.

Samtang nagalaum kita nga ang tanan nga nagasulod sa bag-o kag wala katapusan nga kasugtanan magpabilin nga tampad kag maangkon ang mga bugay nga ginselyo sa ila para sa wala katapusan, kon kis-a indi perpekto ang tanan. Sa bilog ko nga pag-alagad nakakilala ako sang mga miyembro nga nagahimo kag nagatuman sang mga kasugtanan, pero ang ila mga tiayon wala. May ara man nga mga single, nga wala sang oportunidad nga makasal sa sini nga kabuhi. Kag may ara pa gid nga indi tampad sa ila mga kasugtanan sa kasal. Ano ang matabo sa mga indibwal sa tagsa sining mga sirkumstansya?

1. Kon mangin tampad ka sa mga kasugtanan nga ginhimo mo sa endowment, mabaton mo ang personal nga mga bugay nga ginpromisa sa imo sa tion sang endowment bisan pa nga ang imo tiayon wala nagtuman sang iya mga kasugtanan ukon naggwa sa pag-asawahay. Kon naselyohan kamo kag sang ulihi nagdiborsyo, kag kon ang pagselyo sa inyo wala nakansela, ang personal nga mga bugay sinang pagselyo magapabilin nga epektibo para sa imo kon magpabilin ka nga tampad.¹⁶

   Kon kis-a, tungod sa mga balatyagon sang pagluib kag tuman nga kasakit, ang tampad nga tiayon mahimo nga gusto ipakansela ang pagselyo sa iya maluib nga tiayon agud magpakalayo sa ila, sa sini nga kabuhi kag sa wala katapusan. Kon nabalaka kamo nga basi mahigot kamo sa wala nagahinulsol nga tiayon sadto, dumduma, indi ka mahigot! Ang Dios indi magpilit sa bisan sin-o nga magpabilin sa naselyohan nga relasyon sa bilog nga wala katapusan nga kontra sa iya pagbuot. Ang Amay nga Langitnon magasiguro nga mabaton naton ang tagsa ka bugay nga itugot sang aton mga handum kag mga pagpili.¹⁷

   Ugaling, kon gusto magpakansela sang pagselyo, ginarespeto ang kahilwayan sa pagpili. May mga proseso nga pwede sundon. Pero indi ini dapat himuon nga pasapayan! Ang Unang Pangulohan ang nagakapot sang mga yabi nga nagaselyo sa duta kag sa langit. Kon ang pagkansela sang pagselyo natugotan sang Unang Pangulohan, ang mga bugay angot sinang pagselyo wala na sing epekto; kanselado na ang mga ini palapad kag paibabaw. Importante nga mahangpan nga agud mabaton ang mga bugay sang pangkahitaasan, dapat naton ipakita nga handa kita magsulod kag tipigan sing tampad ining bag-o kag wala katapusan nga kasugtanan, sa sini nga kabuhi ukon sa pihak.

2. Para sinang mga single nga miyembro sang Simbahan, palihog dumduma nga “sa nagakaigo nga pamaagi kag tion sang Ginuo, wala sing bugay nga indi pag-ihatag sa Iya tampad nga mga Santos. Hukman kag padyaan sang Ginuo ang tagsa ka tawo suno sa hugot-tagipusuon nga [mga handum] kag amo man mga buhat.”¹⁸

3. Kon wala ka nangin tampad sa mga kasugtanan sa templo, may paglaum pa bala? Huo! Ang ebanghelyo ni Jesucristo ebanghelyo sang paglaum. Inang paglaum nagaabot paagi kay Jesucristo upod ang sinsero nga paghinulsol kag matinumanon nga pagsunod sa mga panudlo ni Cristo. Nakakita ako sang mga tawo nga nakahimo sang grabe nga mga sayop, nga naglapas sang sagrado nga mga kasugtanan. Padayon ako nga makakita sinang mga sinsero nga naghinulsol, napatawad, kag nagbalik sa dalan sang kasugtanan. Kon nalapas ninyo ang inyo mga kasugtanan sa templo, ginalaygayan ko kamo nga magbalik kay Jesucristo, makighambal sa inyo bishop, maghinulsol kag buksan ang inyo kalag sa daku nagapang-ayo nga gahum tungod sang Pagbayad-sala ni Jesucristo.

Mga kauturan, ang aton mapinalanggaon nga Amay nga Langitnon naghatag sa aton sang mga kasugtanan agud nga matigayon naton ang tanan nga ginatigana Niya para sa aton. Ining sagrado nga mga bugay halin sa Dios mas manamit sangsa bisan ano pa nga dutan-on nga bunga. Mapreserba ini sila para sa aton sa katubtuban, nga mangin bunga nga nagapadayon, kon tampad kita sa aton mga kasugtanan sa templo.

Nagapamatuod ako nga ang Dios nagpanumbalik sang awtoridad sa pagselyo sa duta agud nga maselyo ini sa langit. Ina nga awtoridad makita sa Ang Simbahan ni Jesucristo sang mga Santos sa Ulihing mga Adlaw. Ginakaptan ini sang Unang Pangulohan kag Korum sang Dose kag ginagamit sa paggiya ni Pangulong Rusell M. Nelson. Ang mga nagasulod sa bag-o kag wala katapusan nga kasugtanan sang kasal kag nagatuman sinang kasugtanan mahimo maperpekto kag sa ulihi makabaton sang kabug-osan sang himaya sang Amay, bisan ano pa man ang mga sirkumstansya nga indi nila makontrolar.¹⁹

Ining ginpromisa nga mga bugay nga angot sa aton mga kasugtanan mahimo maselyo sa aton paagi sa Balaan nga Espiritu nga ginpromisa kag mangin “bunga nga nagapadayon” sa wala katubtuban. Nagasaksi ako sini sa ngalan ni Jesucristo, amen.