Mangin Maayo ang Tanan Tungod sa mga Kasugtanan sa Templo

Pinalangga kong mga kauturan, ini nga sesyon sang pangkabilogan nga komperensya nangin sagrado nga tiyempo para sa akon. Nagapasalamat ako sa asaynment nga maghambal sa minilyon ka Santos sa Ulihing mga Adlaw kag sa aton mga kaabyanan sa bilog nga kalibutan. Palangga ko kamo, kag kabalo ako nga palangga kamo sang Ginuo.

Masobra 50 ka tuig na ang nagligad, may pribelihiyo ako nga magserbisyo bilang presidente sang Ricks College sa Rexburg, Idaho. Sang aga sang Hunyo 5, 1976, ako kag ang asawa ko nga si Kathy nagbiyahe halin sa Rexburg pakadto sa Idaho Falls Idaho Temple para magtambong sa pagselyo sang isa ka suod nga abyan. Siyempre, kay may apat kami ka bata nga lalaki sadto, matigayon lang ang amon paglakat sa templo sa bulig sang maisog nga manugbantay sang bata! Ginbilin namon ang pinalangga namon nga kabataan sa iya pag-atipan kag nagbiyahe sang 30 minutos.

Kanami sang amon eksperiyensya sa templo sina nga adlaw, pareho sang nagliligad. Pero, pagkatapos sang pagselyo—kag sang nagahanda na kami nga magpauli—nakita namon nga kadamo sang mga temple worker kag patron nga nagaistoryahanay nga ginakulbaan sa salamputan sang templo. Wala madugayi, isa ka temple worker ang naghambal sa amon nga ang bag-o tukod nga Teton Dam sa este sang Idaho narusdak! Masobra 80 bilyon ka galon (300 milyon cubic meters) sang tubig ang nagadaganas sa dam padulong sa 300 square miles (775 square km) sang tupad nga mga valley. Halos tanan sa siyudad sang Rexburg ginbaha, ang mga balay kag salakyan nagkalaanod sa baha. Saisinta porsyento sang 9,000 ka residente wala na sang maistaran.¹

Kabalo na kamo, nabalaka kami sa kaluwasan sang amon pinalangga nga kabataan, ginatos ka mga estudyante kag manunudlo sa kolehiyo, kag sa pinalangga namon nga komunidad. Wala mag-30 ka milya (50 km) ang amon kalayuon sa balay, pero sini nga adlaw, antes pa sang panahon sang mga cell phone kag text, wala gid kami sang paagi para matawgan dayon ang amon kabataan, ukon magbiyahe halin sa Idaho Falls pabalik sa Rexburg, kay ang tanan nga dalan sirado.

Ang opsyon lang namon amo nga magtiner sa isa ka lokal nga motel sa Idaho Falls. Nagluhod kami ni Kathy sa amon kuwarto sa motel kag mapainubuson nga nag-ampo sa Amay nga Langitnon para sa kaluwasan sang amon pinalangga nga kabataan kag linibo nga naapektuhan sang masubo nga trahedya. Nadumduman ko si Kathy nga nagapakadto-pakari sang kaagahon nga nabalaka sa iya mga kabataan. Sa pihak sang akon kabalaka, napakalma ko ang akon pensar kag nakatulog gid man.

Wala madugayi ginpukaw ako sang mahal ko nga asawa kag nagsiling, “Hal, paano mo nasarangan matulog sa amo sini nga tiyempo?”

Ining mga pulong nagsulod sing maathag sa akon tagipusuon kag hunahuna. Ginhambal ko sa akon asawa: “Kathy, bisan ano ang matabo, mangin maayo ang tanan tungod sa templo. Naghimo kita sang mga kasugtanan sa Dios kag ginselyohan bilang wala katapusan nga pamilya.”

Sina nga oras, daw ginkumpirma sang Espiritu sang Ginuo sa amon tagipusuon kag kaisipan ang nahibal-an na namon nga daan nga matuod: ang mga ordinansa sang pagselyo, nga makita lamang sa balay sang Ginuo kag ginahikot paagi sa husto nga awtoridad sang priesthood, nagbugkos sa amon bilang bana kag asawa, kag ang amon mga kabataan ginselyohan sa amon. Indi matuod namon kinahanglan mahadlok, kag nagapasalamat kami sang ulihi sang nabal-an namon nga luwas ang amon kabataan.

Siguro ining pahayag ni Pangulong Thomas S. Monson makalaragway gid kon ano ang nabatyagan namon ni Kathy sinang indi malimtan nga gab-i. “Sa aton pagtambong sa templo, may magaabot sa aton nga dugang nga espiritwalidad kag balatyagon sang paghidaet. … Mahangpan naton ang matuod-tuod nga kahulugan sang mga pulong sang Manluluwas sang Sia nagsiling: ‘Ang paghidaet ginabilin ko sa inyo; ang akon paghidaet ginahatag ko sa inyo. … Dili malisang ang inyo mga tagipusuon, ukon mahadlok. [Juan 14:27].’”²

Ginbugayan ako nga makabatyag sang paghidaet tagsa nga magsulod ako sa sagrado nga templo. Nadumduman ko sang primero ako nagsulod sa Templo sang Salt Lake. Lamharon pa ako sadto.

Nagtangla ako sa mataas nga puti nga kisami nga nagpasanag sang kuwarto nga daw halos bukas ini sa langit. Kag sa sina nga tion, nagsulod sa akon hunahuna ining maathag nga mga pulong: “Nakakadto na ako sa sining masanag nga lugar sadto.” Apang gilayon nagsulod sa akon hunahuna, indi sa akon kaugalingon nga tingug, ining mga pulong: “Wala, wala ka pa gid diri nakakadto. Nadumduman mo lang ang isa ka tion antes ka natawo. Ara ka sa sagrado nga lugar pareho sini kon diin maabot ang Ginuo.”

Mga kauturan, mapainubuson ako nga nagasaksi nga kon magkadto kita sa templo, padumdumon kita sang wala katapusan nga kinaiya sang aton mga espiritu, sang aton relasyon sa Amay kag sa Iya diosnon nga Anak, kag sang aton pinakahandum nga magbalik sa aton langitnon nga puluy-an.

Sang nagliligad lang nga mga mensahe sa komperensya, gintudlo ni Pangulong Russell M. Nelson:

“Ang lugar nga pinakamalayo sa disgrasya sa espirituhanon amo ang pagtiner sa sulod sang inyo mga kasugtanan sa templo!”

“Tanan nga aton ginapatihan kag tagsa ka promisa nga ginhimo sang Dios sa Iya katawhan sa kasugtanan nagaangot sa templo.”³

“Ang tagsa ka tawo nga nagahimo sang mga kasugtanan … sa mga templo—kag nagatuman sang mga ini—may mas dako nga ikasarang sa paglab-ot sang gahum ni Jesucristo.”⁴

Gintudlo man niya nga “sa tion nga maghimo kita sang kasugtanan kaupod sa Dios, ginabayaan naton ang pagka-neutral sa katubtuban. Indi pagtalikdan sang Dios ang Iya relasyon sa mga naghimo sining kaangtanan upod sa Iya. Ang matuod, ang tanan nga naghimo sang kasugtanan upod sa Dios makabaton sang espesyal nga gugma kag kaluoy.”⁵

Sa inspirado nga liderato ni Pangulong Nelson, ginpadasig sang Ginuo, kag padayon nga padasigon, ang pagpatindog sang mga templo sa bilog nga kalibutan. Hatagan sini ang tanan nga anak sang Dios sang oportunidad nga makabaton sang mga ordinansa sang kaluwasan kag pangkahitaasan kag maghimo kag magtuman sang sagrado nga mga kasugtanan. Ang pagkwalipikar sa paghimo sang sagrado nga mga kasugtanan indi isahay lang nga paghimud-os kundi bilog kabuhi nga kagawian. Ang Ginuo nagsiling nga kinahanglan sini ang bug-os naton nga tagipusuon, ikasarang, panghunahuna, kag kusog.⁶

Ang pagpartisipar pirme sa mga ordinansa sang templo makahimo sang gawi sang debosyon sa Ginuo. Kon ginatuman ninyo ang inyo mga kasugtanan sa templo kag ginadumdom ini, ginahagad ninyo ang pagpakig-upod sang Balaan nga Espiritu para pabakuron kag tinloan kamo.

Dayon maeksperiyensyahan ninyo ang mamag-an nga balatyagon kag paglaum nga nagasaksi nga ang mga promisa matuod. Mahibal-an ninyo nga ang kada kasugtanan sa Dios isa ka oportunidad nga mas magpalapit sa Iya, nga magapukaw sang handum sa inyo tagipusuon nga magtuman sang mga kasugtanan sa templo.

Ginpromisahan kita, “Tungod sang aton kasugtanan sa Dios, indi Sia matak-an sa Iya pagpaninguha nga buligan kita, kag indi naton maubos ang Iya maluluy-on nga pasensya para sa aton.”⁷

Paagi sa mga kasugtanan sang pagselyo sa templo mabaton naton ang kasigurohan nga ang mapinalanggaon nga koneksyon sang mga pamilya magapadayon pagkatapos sang kamatayon kag magalawig tubtob sa wala katapusan. Ang pagtahod sang kasal kag mga kasugtanan sang pamilya nga ginhimo sa mga templo sang Dios magahatag sang proteksyon batok sa kalainan sang pagkamaiya-iyahon kag bugal.

Ang sige-sige nga pag-atipan sang mag-ululutod sa kada isa matabo lamang sa padayon nga pagpaninguha nga pangunahan ang inyo pamilya sa pamaagi sang Ginuo. Hatagi ang inyo kabataan sang mga oportunidad nga ipangamuyo ang kada isa. Talupangda dayon ang panugod sang indi paghangpanay, kag kilalaha ang mga buhat sang maalwan nga pagserbisyo, ilabi na sa kada isa. Kon ang mag-ululutod magpangamuyo para sa kada isa kag magserbisyo sa kada isa, ang mga tagipusuon magahumok kag magaulikid sa kada isa kag sa ila mga gininakan.

Sa isa ka bahin, amo ina ang ginlaragway ni Malaquias sang naghambal sia parte sa pag-abot ni propetang Elijah: “Itanom niya sa mga tagipusuon sang mga anak ang mga promisa nga ginhimo sa mga amay, kag ang mga tagipusuon sang mga anak magaliso sa ila mga amay. Kon indi mangin amo sini, ang bilog nga duta lubos nga maguba sa iya pagkari.”⁸

Ang mga pagtilaw, mga kabudlayan, kag mga kasakit sigurado magaabot sa aton tanan. Wala sa aton sang indi madutlan sang “[tunok] sang unod.”⁹ Pero, kon magkadto kita sa templo kag magdumdom sang aton mga kasugtanan, makahanda kita sa pagbaton sang personal nga direksyon halin sa Ginuo.

Sang ginkasal kami ni Kathy kag ginselyohan sa Logan Utah Temple, si anay-Elder Spencer W. Kimball ang naghikot sang pagselyo sa amon. Sa pila ka tinaga nga iya ginhambal, ginhatag niya ining laygay: “Hal kag Kathy, magpangabuhi [kamo] sa bagay nga kon mag-abot ang tawag, mangin mahapos lang para sa inyo nga magbiya.”

Sang primero, wala namon maintiendihi kon ano ang buot silingon sinang laygay para sa amon, pero ginhimo naton ang tanan para magpangabuhi sa paagi nga mangin handa kami sa pagbiya sa pagserbsiyo sa Ginuo kon mag-abot ang panawagan. Sang mga 10 katuig na kami nga kasado, nag-abot ang wala ginapaabot nga tawag halin sa Commissioner of Church Education nga si Neal A. Maxwell.

Ang mapinalanggaon nga laygay nga ginhatag ni Pangulong Kimball sa templo nga “mangin hapos lang nga magbiya” nagmatuod gid. Nakabaton kami ni Kathy sang tawag nga bayaan ang daw manami kuntani nga kahimtangan sang pamilya sa California para mag-alagad sa isa ka tulumanon kag lugar nga wala ako sing may nahibaloan. Pero, ang amon pamilya handa sa pagbiya tungod isa ka propeta, sa balaan nga templo, sa lugar sang rebelasyon, nakakita sang palaabuton nga ginhanda sa amon.

Pinalangga kong mga kauturan, nagapamatuod ako nga wala sang mas importante pa sangsa pagtahod sa mga kasugtanan nga inyo ginhimo ukon pwede himuon sa templo. Bisan diin kamo subong sa dalan sang kasugtanan, ginaagda ko kamo nga mangin kwalipikado kag mangin angayan sa pagsulod sa templo. Magkadto pirme kon itugot sang sirkumstansya. Maghimo kag magtuman sang sagrado nga mga kasugtanan sa Dios. Ginapasalig ko sa inyo ang pareho nga kamatuoran nga ginhambal ko kay Kathy sa tungang-gab-i halos lima ka dekada na ang nagligad sa gamay nga kuwarto sa motel sang Idaho Falls: “Bisan ano ang matabo, mangin maayo ang tanan tungod sa mga kasugtanan sa templo.”

Ginahatag ko sa inyo ang sigurado ko nga saksi nga si Jesus amo ang Cristo. Buhi Sia kag ginapangunahan ang Iya Simbahan. Ang mga templo mga balay sang Ginuo. Si Pangulong Russell M. Nelson amo ang buhi nga propeta sang Dios sa duta. Palangga ko sia, kag palangga ko ang kada isa sa inyo. Sa sagrado nga ngalan ni Jesucristo, amen.