Mangin Isa kay Cristo

Madalom ang balatyagon ko parte sa Pagbayad-sala ni Jesucristo halin sang bata pa ako, pero naeksperiyensiahan ko ang epekto sang Pagbayad-sala sang Manluluwas sang 25 ako. Bag-o lang ako naggradweyt sa abogasiya halin sa Stanford Law School kag nagatuon para sa Californa bar exam. Gintawgan ako sang akon iloy kag nagsiling nga ang akon lolo, si Crozier Kimball, nga nagaistar sa Utah, tagumatayon. Nagsiling sia nga kon gusto ko nga makita sia, dapat magpauli ako. Ang akon lolo 86 kag grabe ang masakit. Nangin manami ang akon pagbisita. Nalipay gid sia nga makita ako kag mapaambit ang iya testimonya sa akon.

Sang si Crozier tatlo lang katuig, ang iya amay, si David Patten Kimball, napatay sa edad nga 44. Nagalaum si Crozier nga ang iya amay kag iya lolo nga nga Heber C. Kimball, nahamuot sa iya kabuhi kag mabatyagan nga nangin tampad sia sa iya palanublion.

Ang laygay gid sang lolo ko sa akon amo nga likawan ang bisan ano nga balatyagon sang pagkamay-diretso ukon pribelihiyo tungod sining tampad nga katigulangan. Ginhambalan niya ako nga ang akon tutok dapat sa Manluluwas kag sa Pagbayad-sala sang Manluluwas. Siling niya nga tanan kita mga anak sang mapinalanggaon nga Amay nga Langitnon. Bisan sin-o man ang aton dutan-on nga katigulangan, ang kada isa sa aton magahatag sang kasumahan kon ano katutum naton gintuman ang Iya mga kasugoan.

Ginatawag ni Lolo ang Manluluwas nga “Manugbantay sang Ganhaan” nga patuhoy sa 2 Nefi 9:41. Siling niya sa akon nga nagalaum sia nga nangin igo sia nga mahinulsulon agud magakabagay sa kaluoy sang Manluluwas.²

Natandog gid ako. Nakahibalo ako nga nangin matarong sia nga tawo. Nangin patriarka sia kag nakaserbe sa pila ka misyon. Gintudloan niya ako nga wala sang may makabalik sa Dios paagi lang sa maayong mga buhat nga wala sang bulig sang Pagbayad-sala sang Manluluwas. Madumduman ko asta subong ang daku nga gugma kag kapasalamatan ni Lolo sa Manluluwas kag sa Iya Pagbayad-sala.

Sang 2019 sa asaynment sa Jerusalem,³ nagbisita ako sa isa ka naibabaw nga kwarto nga mahimo malapit sa lugar sa diin ginhugasan sang Manluluwas ang mga tiil sang Iya mga Apostoles antes Sia ginlansang sa Krus. Natandog ang akon espiritu kag namensar kon paano Niya ginsugo ang Iya mga Apostoles nga magpalanggaanay.

Nadumduman ko ang Nagapakitluoy nga Pangamuyo sang Manluluwas para sa aton. Ini nga pangamuyo ginhatag malapit gid sa katapusan sang Iya kabuhi sa duta nga nasulat sa Ebanghelyo ni Juan.

Ang pangamuyo napatuhoy sa mga sumulunod ni Cristo, lakip na kita tanan.⁴ Sa pangamuyo sang Manluluwas sa Iya Amay, nagpakitluoy Sia “nga sila tanan mangin-isa; subong nga ikaw, Amay, sa akon, kag ako sa imo, nga sila man mangin-isa sa a aton.” Dayon ang Manluluwas nagpadayon, “Ang himaya nga nahatag mo sa akon ginhatag ko sa ila, agud nga mangin-isa sila subong nga kita isa.”⁵ Angpag-isa amo ang ginpangamuyo ni Cristo antes sang pagtraidor kag paglansang sa Iya sa krus. Ang pag-isa kay Cristo kag sa aton Amay nga Langitnon mahimo maagom paagi sa Pagbayad-Sala sang Manluluwas.

Ang nagaluwas nga kaluoy sang Ginuo wala nagadepende sa linahi, edukasyon, estado sa pangabuhi, ukon rasa. Nagadepende ini sa pagmangin isa kay Cristo kag sa Iya mga kasugoan.

Ang Propetang si Joseph Smith kag Oliver Cowdery nagbaton sang rebelasyon parte sa organisasyon kag pagdumala sang Simbahan sang 1830, wala madugay pagkatapos naorganisa ang Simbahan. Ang sa karon nga Seksyon 20 ginbasa ni Propetang Joseph sa una nga komperensya sang Simbahan kag amo ang una nga rebelasyon nga ginkompirma sa pagsugot sang kadam-an.⁶

Ang kaundan sining rebelasyon matuod gid nga talalupangdon. Nagatudlo ini sa aton sang importansya kag papel sang Pagbayad-Sala sang Manluluwas kag kon paano matigayon ang Iya gahum kag mga bugay paagi sa Iya nagabayad-sala nga grasya. Ang Propetang si Joseph 24 anyos sadto kag nakabaton na sang madamo nga rebelasyon kag nakatapos na sa paglubad sang Libro ni Mormon paagi sa dulot kag gahum sang Dios. Si Joseph kag Oliver ginkilala kag gin-ordin nga mga Apostoles, gani may awtoridad sa pagpamuno sa Simbahan.

Ang mga Bersikulo 17 asta 36 nagasumaryo sang importante nga doktrina sang Simbahan, lakip na ang katunayan sang Dios, ang Pagtuga sang katawhan, ang Pagkahulog, kag ang plano sang kaluwasan sang Amay nga Langitnon paagi sa Pagbayad-Sala ni Jesucristo. Ang bersikulo 37 nagaunod sang importante nga mga kinahanglanon para mabunyagan sa Simbahan sang Ginuo. Ang bersikulo 75 asta 79 nagapahamtang sang mga pangamuyo sa sakramento nga ginagamit naton kada Domingo.

Ang doktrina, mga prinsipyo, mga sakramento, kag mga kagawian nga ginpahamtang sang Ginuo paagi kay Joseph Smith, ang Propeta sang Pagpanumbalik, matuod gid nga pinasahi.⁷

Ang mga rekisito sa bunyag, samtang madalom, tuman ka simple. Labaw sa tanan nagalakip ini sang pagpaubos sa Dios, masinulub-on nga tagipusuon kag mahinulsulon nga espiritu,⁸ paghinulsol sang tanan nga sala, pagdala sa ila kaugalingon sang ngalan ni Jesucristo, pagpadayon tubtob sa katapusan, kag magpakita paagi sa ila mga buhat nga nabaton nila ang Espiritu ni Cristo.⁹

Importante nga ang tanan nga kinahanglanon para sa bunyag espirituhanon. Ang estado sa pangabuhi ukon sosyedad indi kinahanglanon. Ang imol kag manggaranon may palareho nga espirituhanon nga mga rekisito.

Wala sing rekisito sa rasa, kasarian, ukon kultura. Ang Libro ni Mormon nagaklaro nga ginaagda ang tanan nga mag-ambit sang kaayo sang Ginuo, “itom kag puti, ulipon kag hilway, lalaki kag babayi; … ang tanan palareho sa Dios.”¹⁰ “Ang tanan nga mga tawo may pribelihiyo ang isa subong sang sa isa, kag wala sing isa nga ginadumilian.”¹¹

Kon panumdumon ang aton “pagpalareho” sa atubang sang Dios, wala sing rason nga talupangdon ang aton mga kinalain. Sayop kita nga ginapaisog sang iban “nga hunahunaon nga daku ang kinalain sang iban nga tawo sa aton kag sa isa kag isa sangsa kon ano gid ang matuod. [Ang iban] ginakuha ang matuodtuod pero magagmay nga mga kinalain, kag ginapadaku ang mga ini agud mangin mga pil-as.”¹²

Dugang pa, ang iban sayop nga nagahaumhaum nga tungod ang tanan nga tawo ginaagda sa pagbaton sang Iya kaayo kag kabuhi nga wala katapusan, wala sing rekisito sa pamatasan.¹³

Pero, ang balaan nga mga kasulatan nagapamatuod nga ang tanan nga tawo nga may salabton kinahanglan nga maghinulsol sang mga sala kag magtuman sang Iya mga kasugoan.¹⁴ Ang Ginuo nagaklaro nga ang tanan may moral nga kahilwayan sa pagpili kag “hilway sila sa pagpili sang kahilwayan kag kabuhi nga wala’y katapusan, paagi sa dako nga Manugpatunga sang tanan nga katawhan, … kag magpamati sa iya dalagko nga mga kasugoan; kag mangin matutum sa iya mga pulong, kag magpili sang kabuhi nga wala’y katapusan.”¹⁵ Agud mabaton ang mga bugay sang Pagbayad-Sala sang Manluluwas, dapat gamiton naton sing husto ang aton moral nga kahilwayan sa pagpili nga pilion si Cristo kag tumanon ang Iya mga kasugoan.

Sa tion sang akon pagkabuhi, ang kahulugan sang “kahilwayan sa pagpili” kag “kahilwayan sa pagbuot” ginausisa kag ginadebatehan. May madamo nga intelektwal nga pagbinaisay sa sining mga topiko sadto kag karon.

Sa bag-o nga cover sang daku nga university alumni nga pamantalaan, isa ka bantog nga propesor sang biology ang nagsiling nga “Wala sang lugar sa pagbuot.”¹⁶ Indi katingalahan, ang propesor ginsambit sa artikulo nga nagsiling, “Wala sang ginatawag nga Dios, … kag wala sang pagbuot, kag isa ini ka daku, wala sing pasilabot, mamingaw nga uniberso.”¹⁷ Indi ako makapamatok sing mas mabaskog pa.

Isa ka panguna nga doktrina sang aton pagtuluohan amo nga may ara gid kita sang kahilwayan sa pagpili,¹⁸ nga nagalakip sang pagbuot.¹⁹ Ang kahilwayan sa pagpili amo ang ikasarang nga magpili kag mag-akto. Importante gid ini sa plano sang kaluwasan. Kon wala ang moral nga kahilwayan sa pagpili, indi kita makatuon, makauswag, ukon makapili nga mangin-isa kay Cristo. Tungod sang moral nga kahilwayan sa pagpili, “hilway [kita] sa pagpili sang kahilwayan kag kabuhi nga wala’y katapusan.”²⁰ Sa Konseho sa Langit antes sang kabuhi sa duta, ang plano sang Amay naglakip sang kahilwayan sa pagpili bilang importante nga bahin. Si Lucifer nagrebelde kag “nagtinguha sa pagguba sang kahilwayan sa pagpili sang tawo.”²¹ Bilang resulta, ang pribelihiyo nga mag-angkon sang lawas gindumili kay Satanas kag sa mga nagsunod sa iya.

Ang iban nga mga espiritu antes sang kabuhi sa duta naggamit sang ila kahilwayan sa pagpili sa pagsunod sa plano sang Amay nga Langitnon. Ang mga espiritu nga nabugayan nga matawo sa sining kabuhi sa duta nagapadayon nga may kahilwayan sa pagpili. Hilway kita nga magpili kag mag-akto, pero indi kita makapili sang mga konsikwensya. “Ang mga pagpili sang maayo kag matarong nagadala sa kalipay, kalinong kag kabuhi nga wala katapusan samtang ang mga pagpili sang sala kag kalainan sa ulihi magadala sa kalisod kag pag-antos.”²² Sa ginsiling ni Alma, “Ang kalainan wala gid nangin kalipayan.”²³

Sa sining tuman ka mapaindis-indison nga kalibutan, may padayon nga panikasog nga magpangibabaw. Ang magtinguha nga mangin aton pinakamaayo, isa ka matarong kag mapuslanon nga pagpanikasog. Nagasanto ini sa doktrina sang Ginuo. Ang mga pagpaninguha nga pagamayon ukon kontrahon ang iban ukon balabagan ang ila kadalag-an kontra sa doktrina sang Ginuo. Indi naton mabasol ang mga sirkumstansya ukon ang iban nga tawo sa desisyon nga mag-akto kontra sa mga kasugoan sang Dios.

Sa kalibutan karon, mahapos ang magtutok sa materyal kag propesyonal nga kadalag-an. Ang iban nagakalipat sang wala katapusan nga mga prinsipyo kag mga pagpili nga importante sa wala katapusan. Mangin maalam nga sundon ang laygay ni Pangulong Russell M. Nelson nga “mamensar sing selestiyal.”²⁴

Ang pinakaimportante nga mga pagpili pwede mahimo sang halos tanan wala sapayan sang mga sirkumstansya sa talento, abilidad, oportunidad, ukon sa pangabuhi. Ang paghatag-bug-at sa importansya nga unahon ang mga pagpili parte sa pamilya kinahanglanon gid. Klaro ini sa bilog nga balaan nga mga kasulatan. Pamensara ang istorya sa 1 Nefi sa diin si Lehi “nagpanglakaton padulong sa kamingawan. Kag ginbayaan niya ang iya balay, kag ang duta nga iya palanublion, kag ang iya bulawan, kag ang iya pilak, kag ang iya malahalon nga mga butang, kag wala sia sing gindala luwas sa iya panimalay.”²⁵

Sa pag-atubang naton sang mga pagbag-o sa kabuhi, madamo nga mga butang ang nagakatabo nga diutay lang ukon wala kita sing kontrol. Ang mga pagbag-o sa ikaayong lawas kag mga aksidente athagon nga maisip sa sini nga kategorya. Ang COVID-19 pandemic sang sini lang grabe ang epekto sa mga tawo nga ginhimo ang tanan nga husto. Ang laban sa pinakaimportante nga mga pagpili, makontrolar naton. Sang tiempo nga nagaalagad ako sa misyon, ginpamemorize kami ni Elder Marion D. Hanks, nga amon mission president, sang bahin sang binalaybay ni Ella Wheeler Wilcox:

Kon parte sa prinsipyo, pamatasan, pagsimba, kag matarong nga pagpangabuhi, may kontrol kita. Ang aton pagtuo kag pagsimba sa Dios nga Amay kag Iya Anak, nga si Jesucristo, isa ka pagpili nga aton ginahimo.²⁷

Palihog intiendiha nga wala ako nagasuporta sang kakulang sang interes sa edukasyon ukon pangabuhian. Ang ginasiling ko amo nga kon ang mga pagpaninguha sa edukasyon kag pangabuhian mas ginapalabi sangsa pamilya ukon pagmangin isa kay Cristo, ang wala ginatuyo nga mga konsikwensiya mahimo nga mangin indi gid maayo.

Ang klaro kag simple nga doktrina nga ginalaragway sa Doktrina kag mga Kasugtanan 20 makatalandog kag makakumbinsi samtang ginapasangkad sini kag ginaklaro ang sagrado nga espirituhanon nga mga konsepto. Nagatudlo ini nga ang kaluwasan maagom kon si Jesucristo magpakamatarong kag magpakabalaan sang mahinulsulon nga mga kalag tungod sang grasya sang Manluluwas.²⁸ Ginahanda sini ang mga kondisyon sa nagapanguna nga papel sang Iya Pagbayad-Sala.

Dapat naton tinguhaan nga ilakip ang iban sa aton komunidad sang pag-isa. Kon sundon naton ang laygay ni Pangulong Nelson nga tiponon ang nalapta nga Israel sa sini nga kabuhi kag sa pihak, kinahanglan naton ilakip ang iban sa aton komunidad sang pag-isa. Sa tuman katahum nga panudlo ni Pangulong Nelson: “Sa tagsa ka kontinente kag sa bilog nga mga isla sang dagat, ang tampad nga mga two ginatipon sa Simbahan ni Jesucristo sa Ulihing mga Adlaw. Ang mga kinalain sa kultura, lenggwahe, sari [gender], rasa, kag nasyonalidad nagakawad-an sang importansya sa pagsulod sang matinuohon sa dalan sang kasugtanan kag sa iya pagpalapit sa aton pinalangga nga Manunubos.”²⁹

Ginaisa kita sang aton gugma kag pagtuo kay Jesucristo kag bilang mga anak sang mapinalanggaon nga Amay nga Langitnon. Ang kahulugan sang matuod nga pagkalakip amo ang mangin isa kay Cristo. Ang mga ordinansa sang bunyag kag sakramento nga ginalaragway sa Doktrina kag mga Kasugtanan 20, upod sa aton mga kasugtanan sa templo nagaisa sa aton sa pinasahi nga mga paagi kag nagatugot sa aton nga mangin isa sa tagsa ka paagi nga importante sa wala katapusan kag agud magkabuhi sa paghidaet kag paghinangpanay.

Nagasaksi ako sing pat-od kag sigurado nga si Jesucristo buhi, kag tungod sang Iya Pagbayad-Sala, sarang kita mangin isa kay Cristo. Sa sagrado nga ngalan ni Jesucristo, amen.