Mga Milagro, Mga Anghel, kag Gahum sang Priesthood

Madamo subong ang nagahambal nga wala na sang mga milagro, nga himohimo lang ang mga anghel kag ang mga langit sirado. Nagapamatuod ako nga ang mga milagro nagapadayon, ang mga anghel kaupod naton, kag ang mga langit matuod nga bukas.

Sang ang aton Manluluwas nga si Jesucristo, ari sa duta, ginhatagan Niya sang mga yabi sang priesthood ang Iya puno nga Apostoles nga si Pedro.¹ Paagi sining mga yabi, ginpangunahan ni Pedro kag iban pa nga Apostoles ang Simbahan sang Manluluwas. Pero sang napatay atong mga Apostoles, ang mga yabi sang priesthood ginkuha sa kalibutan.

Nagapamatuod ako nga ang dumaan nga mga yabi sang priesthood ginpanumbalik na. Si Pedro, Santiago kag Juan kag iban pa nga mga propeta sang una nagpakita bilang nabanhaw nga mga persona, nga nagtugyan kay Propetang si Joseph Smith sang ginlaragway sang Ginuo nga “mga yabi sang akon ginharian, kag dispensasyon sang ebanghelyo.”²

Inang amo man nga mga yabi ang ginpasa sa tanan nga propeta asta subong. Ang 15 ka tawo nga ginasakdag naton bilang mga propeta, manugpanan-aw,kag manugpahayag nagagamit sini agud pangunahan ang Simbahan sang Manluluwas. Pareho sang dumaan nga panahon, may puno nga Apostoles nga nagakapot kag awtorisado nga maggamit sang tanan nga mga yabi sang priesthood. Sia si President Russell M. Nelson, propeta kag pangulo sang ginpanumbalik nga Simbahan ni Jesucristo sa aton panahon: Ang Simbahan ni Jesucristo sang mga Santos sa Ulihing mga Adlaw.

Paagi sa Simbahan sang Manluluwas, mabaton naton ang mga bugay sang priesthood—pati na ang gahum sang Dios nga buligan kita sa aton mga kabuhi. Sa idalom sang awtorisado nga mga yabi sang priesthood, nagahimo kita sang sagrado nga mga promisa sa Dios kag nagabaton sang sagrado nga mga ordinansa nga nagahanda sa aton nga magkabuhi sa Iya presensya. Sugod sa bunyag kag kumpirmasyon, kag dayon sa templo, nagauswag kita sa dalan sang kasugtanan nga nagadala sa aton pabalik sa Iya.

Paagi sa mga kamot nga ginatungtong sa aton mga ulo, ginabaton man naton ang mga bugay sang priesthood, lakip na ang paggiya, pagpaumpaw, laygay, pag-ayo, kag gahum nga sundon si Jesucristo. Sa bilog ko nga kabuhi nabugayan ako sining daku nga gahum. Subong nga napahayag sa balaan nga mga kasulatan, ginatawag naton ini bilang ang gahum sang balaan nga Melchizedek Priesthood.³

May daku ako nga respeto sa sining gahum sang lamharon ako, labi na gid kon makita ini sa mga bendisyon sang priesthood. Samtang nagaalagad bilang lamharon nga misyonero sa Chile, kami sang akon companion gin-aresto kag ginhamulag. Wala kami ginhambalan kon ngaa. Tion ato sang daku nga kinagamo sa politika. Linibo ka tawo ang ginpangdakop sang pulis-militar kag wala na nakita pa liwat.

Pagkatapos gin-usisa, nagpungko ako nga isahanon sa akon selda, nga wala nakahibalo kon makita ko pa liwat ang akon mga pinalangga. Nangamuyo ako sa Amay sa Langit, nga hugot nga nagpangabay: “Amay, pirme ako natudloan nga nagabantay Ka sa Imo mga misyonero. Palihog, Amay, indi ako importante, pero nangin matinumanon ako kag kinahanglan ko ang Imo bulig subong nga gab-i.”

Ang binhi sini bulig natanom na madamo nga tinuig nga nagligad. Pagkatapos sang akon bunyag, ginkompirma ako nga miyembro sang Simbahan kag ginhatagan sang dulot sang Balaan nga Espiritu. Samtang nagapangamuyo nga isahanon sa prisohan, gilayon ko nabatyagan ang Balaan nga Espiritu kag nagpaumpaw sa akon. Ginpadumdum Niya ako sang isa ka partikular nga dinalan sa akon patriarchal blessing, nga isa pa ka bugay sang priesthood. Diri ginpromisahan ako sang Dios nga paagi sa akon katampad maselyohan ako sa templo sa kabuhi kag sa wala katapusan sa babayi nga matahum, maayo kag mapinalanggaon, nga mangin mga ginikanan kami sang manami nga kabataan, kag pakamaayohon ako kag dayawon bilang amay sa Israel.

Atong inspirado nga mga tinaga parte sa akon palaabuton nagpuno sa akon kalag sang kalinong. Nakahibalo ako nga naghalin ato sa akon mapinalanggaon nga Amay sa Langit, nga pirme gid nagatuman sang Iya mga promisa.⁴ Sadto nga tion, ginpasalig ako nga mahilway ako kag mabuhi agud makita atong mga promisa nga matuman.

Pagligad sang isa ka tuig, ang Amay sa Langit nagbugay matuod sa akon sang asawa nga matahum, maayo kag mapinalanggaon. Si Lynette kag ako ginselyohan sa templo. Ginbugayan kami sing manami nga kabataan nga tatlo ka lalaki kag apat ka babayi. Nangin amay ako, tanan suno sa mga promisa sang Dios sa nabaton ko nga patriarchal blessing sang 17 anyos ako.

“Gani, pinalangga kong mga kauturan, nag-untat bala ang mga milagro tungod si Cristo nagkayab sa langit? …

“… Wala; kag wala man ang mga anghel nag-untat sa pag-alagad sa mga anak sang katawhan.”⁵

Nagasaksi ako nga ang mga milagro kag mga pagtatap padayon nga nagakatabo sa aton mga kabuhi, masami bilang direkta nga resulta sang gahum sang priesthood. Ang pila ka mga bugay sang priesthood nagakatuman gilayon, sa mga paagi nga makita naton kag mahangpan. Ang iban amat-amat ang katumanan kag indi lubos nga maagom sa sini nga kabuhi. Pero ang Dios nagatuman sang tanan Niya nga promisa, pirme, pareho sang ginapakita sini nga istorya halin sa kasaysayan sang amon pamilya:

Ang akon lolo sa amay, si Grant Reese Bowen, isa ka tawo nga may daku nga pagtuo. Klaro ko madumduman nga ginasugid niya kon paano niya nabaton ang iya patriarchal blessing. Sa iya journal, ginsulat niya: “Ang patriarka nagpromisa sa akon sang dulot sang pagpang-ayo. Siling niya, ‘Ang nagamasakit magaayo. Huo, ang patay pagabangonon sang imo mga kamot.’”

Pila ka tuig ang nagligad, si Lolo nagatumpok sang dagami sang nabatyagan niya nga dapat sia magbalik sa balay. Ginsugata sia sang iya tatay. “Grant, napatay bag-o lang si nanay mo,” siling ni tatay niya.

Sambiton ko liwat halin sa journal ni Lolo: “Wala ako nagpundo kundi nagdali-dali sulod sa balay pagwa sa atubang nga balcon sa diin nagahigda sia. Gintan-aw ko sia kag nakita nga wala na sia sang kabuhi. Nadumduman ko ang akon patriarchal blessing kag ang promisa nga kon tampad ako, paagi sa akon pagtuo ang nagamasakit magaayo; kag ang patay magabangon. Gintungtong ko ang akon kamot sa iya ulo,kag ginhambalan ang Ginuo nga kon ang promisa nga ginhatag Niya sa akon paagi sa patriarka matuod, ipakita ini sa sini nga tion kag buhion liwat si nanay. Nagpromisa ako nga kon himuon Niya ini, indi gid ako magduha-duha nga himuon ang akon masarangan agud itukod ang Iya ginharian. Samtang nagapangamuyo ako, ginbuksan niya ang iya mga mata kag nagsiling, ‘Grant, pabangona ako. Ato na ako sa kalibutan sang espiritu, pero ginpabalik mo ako. Himoa ini nga imo panaksihon kag sang iban pa sa pamilya.’”

Si Pangulong Russell M. Nelson nagtudlo sa aton nga pangitaon kag magpaabot sang mga milagro.⁶ Nagapamatuod ako nga tungod ang priesthood napanumbalik, ang gahum kag awtoriad sang Dios ara sa duta. Paagi sa mga calling kag mga konseho, ang mga lalaki kag babayi, bata kag tigulang, makapasakop sa mga buluhaton nga ginahikot paagi sa gahum sang priesthood. Buhat ini sang mga milagro, nga ginabantayan sang mga anghel. Buhat ini sang langit, kag ginabugayan sini ang tanan nga anak sang Dios.

Sang 1989, ang amon pamilya nga ginatapoan sang pito nagapauli halin sa ward outing. Gab-i na sadto. Si Lynette nagabusong sang ika-anum namon nga bata. May mabaskog sia nga pagpabatyag nga itakod ang iya seat belt nga nalipatan niya himuon. Wala madugay pagkatapos, nagliko kami kag may sugata nga awto nga nagkadto sa amon linya. Sa kadasigon nga 70 milyas (112 km) kada oras, naglikaw ako agud indi mabunggoan ang nagasugata nga awto. Ang amon van nagligid, nagdahog sa highway kag nagdalus-os sa kilid sang dalan, nga sang ulihi nagpundo, pagtupa sa duta sa bahin dapit sang pasahero.

Pagkatapos nabatian ko si Lynette nga nagahambal: “Shayne, dira kami magwa sa imo puwertahan.” Nasab-it ako sa pulungkuan tungod sang seatbelt. Pila pa ka segundo kag nakamarasmas ako. Ginsugdan namon alsa ang kada bata pagwa sa van paagi sa akon bintana, nga amo na karon ang nahimo nga atop. Nagahibi sila, nga natingala kon ano ang natabo.

Wala madugay kag nadiparahan namon nga wala ang amon 10 ka tuig nga bata nga si Emily. Ginsinggit namon ang iya ngalan, pero wala may nagasabat. Ang mga miyembro sang ward, nga nagapauli man, kag ara sa lugar sang aksidente nagasala-sala pangita sa iya. Tama kadulom. Gamit ang flashlight ginlantaw ko liwat ang van kag, sa akon daku nga kahadlok, nakita ang diutay nga lawas ni Emily nga napit-alan sang van. Desperado ako nga nagpanawagan, “Alsahon naton ang van halin kay Emily.” Ginkaptan ko ang atop kag ginbutong. Diutay lang ang nagbulig alsa, pero ang van milagroso nga nabaliskad pabalik sa iya ruyda, kag nakita ang wala-kabuhi nga lawas ni Emily.

Wala nagaginhawa si Emily. Ang iya guya nagapalanggit-om. Siling ko, “Kinahanglan naton sia bendisyunan.” Isa ka mahal nga abyan kag miyembro sang ward ang nagluhod upod sa akon, kag sa awtoridad sang Melchizedek Priesthood, sa ngalan ni Jesucristo, ginsugo sia namon nga mabuhi. Sa sina nga tion, madalum nga nagginhawa si Emily nga nagasagrak.

Pagligad sang sa pamatyag namon inoras, nag-abot gid man ang ambulansya. Ginhingagaw si Emily sa ospital. Nagkupos ang iya baga kag nautod ang lanitlanit sa iya tuhod. Ang halit sa utok ginkabalak-an tungod sang kalawigon nga nawad-an sia sang oxygen. Nagcoma si Emily sing isa ka adlaw kag tunga. Padayon kami nga nagpangamuyo kag nagpuasa para sa iya. Ginbugayan sia nga lubos sia nga nag-ayo. Subong, si Emily kag ang iya bana nga si Kevin ginikanan sang anum ka anak nga babayi.

Milagroso nga ang tanan nga iban makalakat. Ang bata nga ginabusong sadto ni Lynette amo si Tyson. Sia man naluwas sa bisan ano nga halit kag natawo pagkadason nga Pebrero. Pagligad sang walo ka bulan nga natawo sia, si Tyson napatay kag nagbalik sa Amay sa Langit. Sia ang bata namon nga anghel de la gwardia. Mabatyagan namon ang iya impluwensia sa amon pamilya kag nalangkag nga makaupod sia liwat.⁷

Ang mga nag-alsa sang van agud maghilway kay Emily nakanotisya nga ang van mamag-an kaayo. Nakahibalo ako nga ang langitnon nga mga anghel nagbuylog sa mga tawo nga nag-alsa sang salakyan halin sa lawas ni Emily. Nakahibalo man ako nga si Emily nabuhi liwat paagi sa gahum sang balaan nga priesthood.

Ang Dios nagpahayag sang sining kamatuoran sa Iya mga alagad: “Magapanguna ako sa inyo. Mangin yara ako sa inyo tuo nga kamot kag sa inyo wala, kag ang akon Espiritu mangin yara sa inyo mga tagipusuon, kag ang akon mga anghel sa palibot ninyo agud magtatap sa inyo.”⁸

Nagasaksi ako nga “ang Balaan nga Pagkapari, suno sa Paagi sang Anak sang Dios”⁹—ang Melchizedek Priesthood—upod sang iya mga yabi, awtoridad, kag gahum ginpanumbalik sa duta sini, sa ulihing mga adlaw. Nakahibalo ako nga bisan indi tanan nga sirkumstansya nagakatabo suno sa aton ginalauman kag ginapangamuyuan, ang mga milagro sang Dios nagakatabo gid pirme suno sa Iya pagbuot, tiempo, kag Iya plano para sa aton.

Kon gusto ninyo ang mga bugay sang priesthood, lakip na ang mga milagro kag pag-alagad sang mga anghel, ginaagda ko kamo nga maghimo kag magtuman sang mga kasugtanan nga ginpatigayon sang Dios para sa aton. Ang mga miyembro kag mga lider sang Simbahan nga nagapalangga sa inyo magabulig sa inyo nga magpadayon.

Nagasaksi ako nga si Jesucristo, ang Anak sang Dios, buhi kag nagapanguna sang Iya Simbahan paagi sa buhi nga mga propeta nga nagakapot kag nagagamit sang mga yabi sang priesthood. Ang Balaan nga Espiritu matuod. Ang Manluluwas naghatag sang Iya kabuhi agud ayohon, bawion, kag dal-on kita pauli.

Nagapamatuod ako nga ang mga milagro nagapadayon, ang mga anghel kaupod naton, kag ang mga langit matuod nga bukas. Kag bukas gid ini katama! Sa ngalan ni Jesucristo, amen.