Ko ha FaiakoTaʻu 10
“Te u ngaohi ʻa kimoutolu ko ha meʻangāue ʻi hoku nimá ʻa ia ʻe fakamoʻui ai ha kakai tokolahi” (ʻAlamā 17:11).
Naʻe hopohopo atu ʻa Sani ki he ʻapi hono mehikitangá hili ia haʻanau fakaʻuli lōloa mai. Naʻá ne fiefia mo ʻene faʻeé pea mo hono kiʻi tehiná ke ʻaʻahi ki ai. Naʻe fāʻofua ʻa Sani ʻi hono mehikitangá mo pehē ange, “Mālō e lelei! ʻOku ʻi ai haʻo kala mo ha helekosi?”
Naʻe malimali hono mehikitanga ko Papá peá ne fakatangutu ʻa Sani he tēpile ʻi peitó mo e ngaahi nāunaú.
Naʻe hila atu ʻa Papa ki he meʻa ʻa Sani naʻe faí lolotonga ʻene teuteuʻi e kai efiafí. “Ko e hā e meʻa ʻokú ke taá Sani?” ko ʻene fehuʻí ange ia.
Naʻe pehē ange ʻe Sani, “Ko ʻeku valivali ha fakatātā naʻá ku maʻu he Palaimelí.” Naʻá ne valivali e ngaahi fakatātā naʻe lanu ʻuliʻuli mo hinehiná ʻaki ha ngaahi lanu fakaʻofoʻofa. Naʻe fehuʻi ange ʻe Sani, “ʻE lava ke fai ʻetau efiafi fakafāmili ʻi ʻapí ʻi he ʻosi ʻetau kaí? ʻOku ʻi ai ha lēsoni ʻoku ou fie akoʻi.”
Naʻe pehē ange ʻe Papa, “ ʻE sai ʻaupito ia. Mālō, Sani!”
Hili e kai efiafí naʻe fakaafeʻi ʻe Papa ʻa e taʻahine naʻá na nofó ke kau mai ki he efiafi fakafāmili ʻi ʻapí. Naʻe ʻikai ke Siasi ʻe taʻahiné, pea naʻá ne fie ʻilo ki he fakataha fakafāmili ko ʻení.
Naʻe kamata ʻaki ʻe Sani e lēsoní haʻane fehuʻi, “Naʻa tau haʻú mei fē?” Hili ko iá naʻá ne pukepuke hake ha fakatātā ʻo e maama tataliʻanga ʻo e ngaahi laumālié ʻa ia naʻá ne tā valivalí. Naʻá ne toe fai mo ha ngaahi fehuʻi lahi ange mo fakaʻaliʻali ha ngaahi fakatātā lanu fakaʻofoʻofa ʻo e palani ʻa e Tamai Hēvaní. Naʻe fakaʻosi ʻaki hono fehuʻi ange ʻe Sani, “ ʻOku ʻilo ʻe ha taha ʻa e hingoa ʻo e palani ko ʻení?”
Naʻe pehē ange ʻe he taʻahine naʻe nofo mo Papá, “ ʻOku ʻikai te u ʻilo. Ko e hā hono hingoá?”
Naʻe malimali ʻa Sani mo pehē ange, “Ko e palani ia ʻo e fakamoʻuí. ʻE lava ke tau fakataha mo hotau fāmilí ʻo taʻengata koeʻuhí ko ia.”
Hili e lēsoní, naʻe ʻave ʻe Papa ʻa Sani ki he tafaʻakí. Naʻá ne pehē ange, “Sani, kuó ke tokoni ki he taʻahine ʻokú ma nofó ke ne ʻilo e palani ʻa e Tamai Hēvaní. Mālō.”
Naʻe ʻikai ke lea ʻa Sani ʻi ha kiʻi taimi siʻi. Hili iá naʻá ne fehuʻi ange, “Ko e hā ʻoku ou ongoʻi faikehe ai ʻi lotó? ʻOku ou ongoʻi māfana mo fiefia.”
Naʻe pehē ange ʻe Papa, “Ko hono fakamoʻoniʻi atu ia ʻe he Laumālie Māʻoniʻoní ʻoku moʻoni e meʻa naʻá ke toki akoʻí. ʻOku ou ʻiloʻi fakapapau ʻoku fiefia ʻa e Tamai Hēvaní ʻi he meʻa naʻá ke faí.”
Naʻe malimali ʻa Sani. Naʻá ne fiefia ʻi he lava ke ne akoʻi ki ha taha e palani ʻo e fiefia ʻa e Tamai Hēvaní.