ʻI ha Fanga Kiʻi Founga Iiki mo Faingofua

ʻI he taimi ʻoku ou fakakaukau ai ki he ngaahi meʻa ne u ʻausia ʻi heʻeku kei finemuí, ʻoku ou fakakaukau ki he lahi fau ʻa e fanga kiʻi meʻa iiki mo faingofua naʻa nau fakamālohia ʻeku fakamoʻoní (vakai, ʻAlamā 37:6–7). Naʻe hangē pē e uooti ʻi heʻeku finemuí ha fuʻu fāmilí. Ko ʻene fai pē haʻamau kai fakauooti, naʻe haʻu e tokotaha kotoa pē ki ai. Ko e taimi naʻe fai ai ha pasā ʻa e Fineʻofá pe laka ʻa e Palaimelí, naʻe haʻu e tokotaha kotoa ki ai. Ko ʻemau moʻui fakasōsialé ʻa homau uōtí.

ʻI he foki ʻeku manatú ki he fuofua fakaʻaliʻali ʻa e uōtí ne u kau aí, ʻoku ou manatuʻi ʻemau faʻa ako faiva hengihengiá, ʻa e ngaahi lotú, ʻa e talanoa ki he niʻihi kehé lolotonga ʻemau tatali ke hoko ʻemau kongá, mo ʻemau feongoʻiʻaki loto-māfana ʻi heʻemau vali e ʻū fakatātā ki he faivá, fakaangaanga, mo mau ako fakatahá. Ko e ngaahi taimi ʻeni ne u vakai ai ki he ngāue moʻoni ʻa e ongoongoleleí ʻi he moʻui ʻa ha kakai moʻoni. Ne u sio he founga hono fakaleleiʻi ʻe heʻeku kau ʻetivaisá e ngaahi palopalemá, ʻa e meʻa naʻe fai ʻe he kau takí ʻi he lahi e ngaahi meʻa ke faí, ʻa e fengāueʻaki ʻa e ngaahi hoa malí, pea ne u fai ha ngaahi fili fakalongolongo ke u moʻui ʻaki e ngaahi tefitoʻi moʻoni ʻoku akoʻi kiate au ʻi he ʻaho Sāpaté. Naʻá ku ongoʻi e laumālié ʻi he taimi ne mau lotu ai ke hoko ha maná, hangē ko hano manatuʻi ʻemau ngaahi kongá pe ko e moʻui lelei ʻa ha taha ʻo e toʻu tupú.

ʻOku ʻikai te u manatuʻi ʻe au e ngaahi lea ne u fai he fakaʻaliʻalí, pe manatuʻi kotoa e ngaahi meʻa kehe naʻe hokó. Ka ʻoku ou manatuʻi ʻa e ongo ne u maʻu ʻi heʻemau fakahoko iá pea mo ʻeku mamata ki he fofonga ʻo e kau mēmipa ʻo homau uōtí ʻo sio ki heʻenau saiʻia aí mo ongoʻi ʻa ʻenau ʻofá.