Tangataʻeiki, Papitaiso Muʻa Au!

ʻI heʻeku hū atu he matapaá he efiafi ʻe taha, ne tangutu mai hoku kiʻi ʻofefine taʻu ono ko Sesí ʻi ha sea ʻi homau peitó. Ne u hohaʻa heʻeku vakai atu ki hono matá. Naʻá ku ʻeke ange pe ko e hā e meʻa naʻe hokó.

Naʻá ne fehuʻi mai ʻi he loto hohaʻa moʻoni, “Tangataʻeiki, ko e moʻoni ko e fānau au ʻa e tēvoló?”

Ne u fuʻu moʻutāfuʻua ʻi heʻene fehuʻí. Ne pehē ʻe Sesi kuo ʻosi papitaiso e kiʻi tokoua māhina ʻe tolu ʻo hono kaungāmeʻá. Naʻe ʻohovale ʻa Sesi ʻo ʻeke ange ki hono kaungāmeʻá pe ko e hā kuo papitaiso kei siʻi ai hono kiʻi tehiná. Naʻe tali ange ʻe hono kaungāmeʻá ʻoku fie maʻu ke papitaiso e fanga kiʻi pēpē kotoa pē.

Ne fehuʻi ange leva ʻe hono kaungāmeʻá, “ ʻOku teʻeki ai ke papitaiso koe?” ʻI he ʻikai ange ʻa Sesí, naʻe talaange ʻe hono kaungāmeʻá ko ha fānau ia ʻa e tēvoló.

Ne kole mai ʻe Sesi, “Tangataʻeiki, papitaiso muʻa au! ʻOku ʻikai te u fie maʻu ke u hoko ko ha fānau ʻa e tēvoló!”

Ne u ʻiloʻi ʻoku fie maʻu ke fakaleleiʻi e meʻá ni he taimi pē ko iá. Naʻá ku fakamatalaʻi ange hono mahuʻinga ʻo e papitaisó mo e ʻikai fie maʻu ke papitaiso e fānaú kae ʻoua leva kuo nau taʻu valu (vakai, Molonai 8:11–23). Koeʻuhí naʻe kei taʻu ono pē ʻa Sesi, ne u talaange ʻe kiʻi tatali taimi lōloa ange pea toki papitaiso ia. Naʻá ku fakapapauʻi ange kiate ia ko e fānau ia ʻa e ʻOtuá pea ʻokú Ne ʻofa ʻiate ia. Naʻe taki atu kimaua ʻe heʻene fehuʻí ki he Molonai 10:4–5, ʻa ia ʻoku talamai ai ʻe Molonai ʻa e founga ʻe lava ke tau fakapapauʻi ʻaki “ ʻa e moʻoni ʻo e ngaahi meʻa kotoa peé.”

Hili ʻeku lau e ongo veesi ko ʻení, ne u fehuʻi ange pe naʻá ne fie lotu ki he Tamai Hēvaní ʻo fehuʻi ange pe naʻe moʻoni koā e ngaahi meʻa ko ia ne ma talanoa ki aí. Naʻá ne ʻio mai.

Naʻá ma tūʻulutui fakataha, pea punou e ʻulu ʻo Sesí ʻo ne lotu, “Tamai Hēvani, ʻoku ou fie ʻilo pe ʻoku moʻoni koā e ngaahi meʻa naʻe talamai ʻe heʻeku tangataʻeikí. ʻI he huafa ʻo Sīsū Kalaisí, ʻēmeni.”

Ne u ʻiloʻi naʻá ku takiekina ke fai ʻe hoku ʻofefiné ʻa e taha ʻo e ngaahi lotu mahuʻinga taha ʻi heʻene moʻuí. Ne u kamata kole ki he Tamai Hēvaní ʻi hoku lotó ʻo hangē ko ia ne teʻeki ke u fai ki muʻa, ke Ne tali ʻene lotú.

Hili ha ngaahi miniti siʻi, naʻá ne pehē mai, “Naʻe ʻikai ke u ongoʻi ʻe au ha meʻa.” Ne u puke mai ia peá u pehē ange, “Naʻe tuku mai ʻe he Tamai Hēvaní ʻa e Fakafiemālié kiate kitautolu, ʻa ia ʻokú ne tali mai …” Ne u hili hoku nimá ʻi hoku fatafatá. Naʻá ne lea hake ʻo pehē, “ ʻAki ha ongo māfana ʻi hoku lotó! Tangataʻeiki, ʻoku ou ongoʻi ia!”

Naʻá ku fāʻofua kiate ia mo fakamālō ki he Tamai Hēvaní ʻi hono tali mai ʻene lotú. Ne u ongoʻi foki ʻe au ha ongo māfana ʻi hoku lotó. Naʻá ku talaange kia Sesi ko e meʻa naʻá ne ongoʻí ko e tali ia ki heʻene lotú pea kuó ne ʻiloʻi ʻeni ko e ʻofefine ia ʻo e ʻOtuá pea ʻoku totonu ke papitaiso ia ʻi hono taʻu valú. Naʻá ne talamai ʻe tatali pē.

Kuo ʻosi atu ha ngaahi taʻu lahi mei he meʻa ko ʻeni naʻe hokó, ka ʻokú ne kei fakamanatu mai pē kiate au ʻoku tauhi ʻe he Tamai Hēvaní ʻEne ngaahi palōmesí.