Usa ka TV nga Gialsa ug Usa ka Espiritu nga Gibayaw

Ang akong bana hingpit nga bungol ug mapahinunguron gayud sa ebanghelyo. Apan, ang daghang mga tuig nga siya naglisud pagsabut sa mga gipangtudlo sa sinemanang miting sa Simbahan nakapaduha-duha kaniya sa pagtambong og uban pang mga miting sa priesthood ug mga sibya. Samtang ang mga miyembro sa among ward mahigalaon ug madasigon, ang ilang kakulang sa pagsabut sa teknikal nga tabang nga iyang gikinahanglan aron makaapil sa mga miting kanunay makapawala sa kadasig sa akong bana ug mobati nga nag-inusara.

Bag-o pa mi sa among ward, ug panahon kadto para sa kinatibuk-ang komperensya. Ang akong bana walay gana nga nangandam sa pag-adto sa kinatibuk-ang miting sa priesthood, naghunahuna sa mga problema nga iyang masinati kon siya motan-aw sa sibya. Sa iyang pag-abut, iyang nahibaloan nga walay nasayud unsaon sa pagbutang og mga subtitle sa dakong overhead projector, busa gipagawas ang tv ug gipahimutang sa kilid. Apan, adunay gamay nga problema. Ang kable nga ikonektar unta sa tv mao ang nagamit sa pag-set up sa projector, nakapahimo sa tv nga dili magamit. Ang akong bana, kinsa anad na niining mga sitwasyon, miadto sa librarya ug misugod sa pagpangita sa kable sa projector. Human sa pagpangita diha sa daghang mga kahon ug kabinet, iyang nakit-an ang mubong kable nga para sa projector.

Tungod ang sibya hapit na magsugod, ang tanan nagduha-duha sa pagdiskonektar ug sa pag-adjust sa projector. Ang kable nga nakit-an sa akong bana mubo ra kaayo nga dili makaabut sa tv diha sa rolling cart, busa ang TV kinahanglang ibalhin sa mubo nga lamesa. Iyang gitulod ang cart pagawas sa chapel ug gidala sa duol nga kwarto. Iya dayong gisugdan sa pagtangtang ang higot sa tv ug naghunahuna kon aduna bay tawo nga motabang niya sa pag-alsa niini. Nianang higayona, nakabantay siya nga adunay tawo misulod sa kwarto. Ang bishop kini. Ang akong bana nahupay samtang ilang gibalhin ang TV didto sa lamesa. Napasalida sa akong bana ang TV samtang ang bishop nagkuha og usa ka lingkuranan ug gibutang kini nga nag-atubang sa tv.

Gipasalamatan siya sa akong bana alang sa iyang tabang ug milamano, ug ang bishop mitalikod ug mipaingon sa pultahan. Sa dakong katingala sa akong bana, gilabyan sa bishop ang pultahan ug mikuha og lingkuranan nga nagsandig sa bong-bong. Mikuha siya og usa ug milingkod tapad sa akong bana. Silang duha nagtapad sa tibuok sesyon.

Karon ang akong bana maghinam-hinam sa pagtambong sa iyang mga miting. Ang yanong buhat sa pagkamabination sa bishop mibayaw sa espiritu sa akong bana ug nakapahimo niyang mapasalamaton. Samtang aduna gihapoy mga problema, siya wala na mobati nga nag-inusara o wala gi-abi-abi. Ang panglantaw sa akong bana nausab hangtud sa hangtud tungod sa dinasig nga buhat sa magbalantay sa karnero ni Kristo.