Bag-ohay nga Pagtaliwan ni Frances J. Monson

“Sa unang adlaw nga nakita nako si Frances, ako nasayud nga nakit-an na nako ang eksaktong babaye,” miingon si Presidente Thomas S. Monson sa paghulagway sa ilang panaghigugmaay.¹ Kana nga kahibalo napamatud-an makadaghan atol sa pagserbisyo ug pagsuporta ni Frances Beverly Johnson Monson sa iyang bana.

Ang iyang mortal nga kinabuhi natapos niadtong Mayo 17, 2013, sa dihang si Sister Monson, 85, malinawong mitaliwan tungod sa katigulangon.

Bisan tuod dili niya gustong mahimong inila, kanunayng ubanan ni Sister Monson si Presidente Monson sa pagbisita sa mga tigulang ug masakiton. Siya ang tinubdan sa kalig-on ni Presidente Monson sa dihang gitawag siya isip bishop sa batan-on pa, ug miserbisyo uban niya sa dihang nagdumala siya sa Canadian Mission gikan 1959 hangtud 1962. Ang iyang pagserbisyo nagpadayon samtang ang iyang minahal nga si “Tommy” gitawag isip General Authority ug miserbisyo sa Korum sa Napulog Duha ka mga Apostoles, sa Unang Kapangulohan, ug isip Presidente sa Simbahan.

“Iyang gimahal pag-ayo ang akong amahan, ug miila sa iyang mga talento ug mga kahanas ug malipayong misuporta niya ug mitabang niya sa pagpalambo sa iyang mga talento,” miingon si Ann Monson Dibb, ilang anak nga babaye.²

Natawo niadtong Oktubre 27, 1927, si Frances anak nga babaye nila ni Franz E. Johnson ug Hildur Booth Johnson. Iyang giminyoan si Thomas S. Monson sa Salt Lake Temple niadtong Oktubre 7, 1948. Siya nagserbisyo sa Relief Society ug Primary, maayo kaayo sa musika, maayong mopakatawa, ug labaw sa tanan mahigugmaong asawa, inahan, apohan, ug apohan sa tuhod.

Gihulagway ni Sister Dibb ang iyang inahan nga “kanunay maminaw ug motambag og pipila ka pulong nga iyang buhaton kon siya ang anaa sa samang sitwasyon. … Ang iyang makanunayong ehemplo … nahimong dakong impluwensya sa akong kinabuhi. Dili gayud kadudahan kon unsay iyang gituohan, unsay iyang buhaton, ug unsay iyang gilauman nga buhaton sa uban. Iyang gipakita kon unsa mo isip usa ka Santos sa Ulahing mga Adlaw, isip Kristiyano.”³

“Wala ako sukad makabantay nga si Frances bisan kausa nagbagulbol kabahin sa akong mga responsibilidad sa Simbahan,” miingon si Presidente Monson. Gihulagway ni Presidente Monson si Frances nga “usa ka babaye sa hilum ug hugot nga pagtuo.”⁴