Nagtrabaho para sa Ginoo

Ang akong bana, si Cyrus, ug ako naminyo sa templo niadtong Mayo 23, 2006. Sa wala pa mi maminyo, kinahanglan siya nga motrabaho og Dominggo sa laboratoryo. Mag-usab-usab ang iyang eskedyul [shifting schedule], apan kasagaran magtrabaho siya gikan sa tunga-tungang gabii hangtud alas-otso sa buntag. Human sa trabaho mouli siya sa balay aron mag-ilis og pang-Dominggo nga sinina ug dayon mosimba, nga magsugod og alas-9:00 sa buntag. Nagpadayon nga ingon ini iyang eskedyul human sa among kasal.

Usahay mag-inusara ko nga mosimba tungod naa pa siyay buluhaton sa trabaho. Kanunay mi nangandoy nga dili na siya magtrabaho sa Igpapahulay. Niadtong unang Dominggo sa Hunyo 2006, nagpuasa mi sa unang higayon isip magtiayon. Nag-ampo mi nga may hugot nga pagtuo nga si Cyrus mapanalanginan og trabaho nga dili na siya kinahanglang magtrabaho ma-Dominggo.

Mga pipila ka adlaw ang milabay sa mga 10:00 sa buntag, natingala ko kon asa si Cyrus kay kasagaran moabut siya sa balay mga tunga-tunga sa alas-8 ug alas-9 sa buntag. Nakahunahuna ko dayon: “Tingali na-promote siya.” Si Cyrus miabut sa balay alas-11 na sa buntag. Sa iyang pagsulod sa among balay, siya miingon nga aduna siyay maayo ug bati nga balita.

Giingnan nako siya sa pagsulti una sa bati nga balita. Siya miingon nga sa dili madugay mobiya mi sa Iligan, Philippines, ug mobalhin sa Panay, Philippines. Sa sinugdanan wala ko maganahi kay gihigugma namo ang mga tawo sa among stake. Sila mabination kanamo ug gitratar mi ingon og ilang kapamilya, nasayud nga layo ang among pamilya.

Dihang nangutana ko nganong kinahanglan mi mobalhin ngadto sa Panay, siya mitubag tungod sa maayong balita. Giinterbyu siya sa iyang amo para sa laing trabaho nga naa sa Panay. Dayon gipangutana nako siya dili kabahin sa sweldo apan kon ang trabaho nanginahanglan ba nga motrabaho siya ma-Dominggo. Sa dihang mitubag siya og, “Dili!” Nalipay kaayo ko. Gigakos nako siya ug miingon nga ang iyang bag-ong trabaho tubag sa among mga pag-ampo ug pagpuasa. Duha ka bulan ang milabay, misugod na si Cyrus og trabaho sa Panay.

Ang Langitnong Amahan naghunahuna kanato, ug Siya mopanalangin kanato kon kita mobansay og hugot nga pagtuo ug mosunod sa Iyang mga sugo. Mapasalamaton ko sa mga baruganan sa pag-ampo ug pagpuasa. Ang trabaho sa akong bana panalangin kanamo. Karon aduna na siyay panahon sa pagbuhat sa iyang calling sa among ward, ug ang bugtong buhat nga iyang buhaton sa Dominggo mao ang buhat sa Ginoo.