Mga Kasinatian sa Hilabihang Pagsalig
Sa dihang si Claire (ang ngalan giusab) sayis anyos pa, ang iyang mga ginikanan nagdisborsyo. Sa musunod nga mga katuigan, siya nakasaksi og mga kaminyoon nga napakyas ingon man mga sakop sa pamilya nga nanlimbasug sa adiksyon, pagkadili aktibo sa Simbahan, ug depresyon. Nagguol ug naglibog, nawala ang pagsalig ni Claire sa pamilya.
“Miingon ko nga ang kaminyoon dili angay para nako,” siya miingon. “Apan ako lang gitago akong kahadlok nga ang akong umaabut mahisama sa akong nasinati.”
Dugang sa pagbati nga kasubo kabahin sa sitwasyon sa iyang pamilya, si Claire mibati nga nag-inusara. Usa ka adlaw isip tin-edyer, siya nagluhod tungod sa kasubo ug nag-ampo, nangamuyo aron masayud kon anaa ang Langitnong Amahan. “Sa dihang mihunong ko sa paghilak ug pagsulti, napuno ko sa mainitong pagbati nga malinawon, kusog, ug direkta kaayo,” miingon siya. “Nasayud ko nga anaa ang Langitnong Amahan ug kanunay mohigugma ug motabang kanako sa akong mga pagsulay.”
Ang tubag nga nadawat ni Claire mipasiugda sa tinguha sa pagpalambo sa iyang pagpamatuod ug pagsalig sa Ginoo ug sa Iyang mga sugo kabahin sa pamilya. Wala lang siya nagpadayon sa pag-ampo apan mibasa usab sa mga kasulatan, mitambong og seminary, ug misunod sa mga sugo.
Karon si Claire naminyo, ug siya andam sa pag-atubang sa iyang mga hagit nga may hugot nga pagtuo. “Wala ko mabalaka kon imposible ba nga magtukod og lig-ong pamilya kay ang akong bana ug ako mihukom nga kanunay amumahon among pagpamatuod, ilakip ang atong Langitnong Amahan ug Manluluwas sa among kinabuhi, ug hinumduman ang dili malimod nga kamatuoran sa ebanghelyo.”
Alang kang Claire, ang pagsalig sa Ginoo magsugod sa yano, kinasingkasing nga pag-ampo. Apan unsa pay atong mahimo aron makamugna og pagsalig sa Langitnong Amahan? Ang mga young adult gikan sa tibuok kalibutan—ang matag usa nag-atubang og mga pagsulay—mipakigbahin sa ilang mga kasinatian kon giunsa nila pagpalambo og pagsalig sa Ginoo ug nakakat-on sa pagsalig sa Iyang kabubut-on, sa Iyang pamaagi, ug sa Iyang tayming.
Kanunay nga Magmapasalamaton
Ang pagpamalandong sa iyang mga panalangin nakatabang ni Stefanie Egly sa Hesse, Germany, nga mosalig sa plano sa Langitnong Amahan ug sa Iyang panahon.
Si Stefanie misugod sa pagsulat sa iyang mga panalangin human wala molampus ang iyang relasyon sa usa ka buotang higala. “Bisan tuod wala mi mag-date, kanunay kong naglaum nga ang among relasyon mahimong mosobra pa sa panaghigala. Nawala akong paglaum sa dihang iya kong giingnan nga aduna na siyay hinigugma.”
Nasagmuyo, nakakaplag og kahupayan si Stefanie human og basa sa usa ka artikulo kabahin sa pasalamat diha sa Liahona. Siya nadasig sa pagsulat kon sa unsang paagi siya napanalanginan—ilabi na kon sa unsang paagi siya napanalanginan isip single.
Ang iyang listahan nakatabang kaniya sa pag-ila nga tungod lang wala siyay kahigayonan nga maminyo, kini wala magsabut nga nahikawan siya sa mga panalangin. Si Stefanie miila nga ang Ginoo mipanalangin kaniya og kahigayonan nga mahimong magtutudlo sa elementarya ug makatudlo ngadto sa mga bata. Siya nakabiyahe, nakatambong og kinatibuk-ang komperensya, ug miapil isip magtatambag sa programa sa Especially for Youth. Napalambo ang iyang relasyon sa pipila ka suod nga mga higala pinaagi sa mga young single adult conference nga iyang natambongan.
Apan ang pinadako nga panalangin, miingon siya, mao ang makagahin og panahon uban sa iyang lola sa wala pa kini mamatay, usa ka butang nga wala mabuhat sa iyang mga igsoon ug ig-agaw tungod kay nagpuyo sila sa layo o adunay mga pamilya nga giatiman.
Lima ka tuig ang milabay sukad gidokumento ni Stefanie ang iyang mga panalangin. Nagpaabut gihapon siya sa kahigayonan nga maminyo diha sa templo. Siya miingon, “Wala ko masayud kon kanus-a nako mahimamat akong mahangturong kompanyon, apan misalig ko nga moabut ang panahon. Hangtud niana, nasayud ko nga mopadayon ko sa pagbaton og mga kasinatian nga makatabang nako nga mokat-on ug molambo.” Ang Langitnong Amahan mipanalangin niya pag-ayo, ug nasayud siya nga Siya mopadayon sa pagpanalangin kon siya magmatinud-anon.
Mobasa sa Pulong sa Dios Matag Adlaw
Si Daniel Martuscello gikan sa Colorado, USA, bag-ohay nahuman ang iyang diborsyo ug naglisud nga mobati og kalinaw sa iyang bag-ong kahimtang. Dili lang nga dili na siya minyo apan siya usa usab ka bag-ong amahan ug walay trabaho. Wala siya makasabut nganong nahitabo kini—ilabi na nga kanunay siyang nagtinguha nga mahimong matarung.
Mibati nga nag-inusara ug nawala, si Daniel midangop sa kasulatan. “Nakahinumdom ko sa kahupay nga akong nabati sa nangagi gumikan sa pagbasa sa mga kasulatan, mao nga nag-focus ko niini matag adlaw,” miingon siya. Ang paggahin og panahon sa pagbasa sa kasulatan matag adlaw nagpasabut nga iyang limitahan ang telebisyon ug Internet. Apan dili kini sakripisyo, miingon siya. “Samtang nagbasa ko, nahupay ug nagiyahan ko. Ang ubang mga butang nahimong ikaduha na lang ang kaimportante. Wala lang ko magbasa para makabasa, nangita ko og mga tubag. Nagbasa ko nga may katuyoan.”
Si Daniel nakakaplag og paghupay diha sa kasulatan samtang nakaamgo siya nga ang tanan mosinati og kalisud. “Ang mga propeta ug ang uban mga matarung apan aduna gihapoy mga pagsulay,” miingon siya. “Ang pagbasa sa ilang mga kasinatian nakatabang nako nga makasabut nga may bahin sa kinabuhi, nga kitang tanan mag-antus, apan niana nga pag-antus kita mas maduol ni Kristo.”
Dugang pa, si Daniel miingon nga ang pagbasa sa kasulatan matag adlaw makapagaan sa iyang palas-anon tungod kini ang paagi nga iyang malakip ang Manluluwas sa iyang kinabuhi. “Samtang ang Dios namulong nako pinaagi sa mga bersikulo nga akong nabasa, misalig ko nga ang mga butang mas mamaayo ug uban sa Iyang panabang, adunay maayong butang ang moabut gikan niining kasinatian.”
Unahon ang Dios
Si Po Nien sa Kaohsiung, Taiwan, mibati og kahadlok human siya mi-proposed sa iyang hinigugma, si Mei Wah. “Naka-date ko og ubang mga tawo sa una, ug dili moubos tulo ka higayon, aduna koy seryuso nga relasyon nga napakyas lang sa katapusan. Kadto nga mga kasinatian nakapahuyang sa akong pagsalig nga makabaton og dugay nga relasyon nga magmahangturon,” miangkon siya.
Bisan tuod si Po Nien mibati og kalinaw sa dihang nag-ampo siya kabahin sa pakigminyo ni Mei Wah, siya nagduhaduha sa tubag. Nabati ba gyud niya ang kumpirmasyon gikan sa Espiritu? O gilibog lang siya sa iyang emosyon? Kini nga engagement mosangput ba ngadto sa templo? O kining relasyon mapakyas?
Niining higayona si Po Nien nakahimumdom sa usa ka kutlo ni Presidente Ezra Taft Benson (1899–1994) nga iyang nadunggan sa klase sa institute: “Kinahanglan natong unahon ang Dios kay sa ubang mga butang sa atong kinabuhi. … Kon atong unahon ang Dios, ang ubang mga butang mapahimutang sa tukma nilang dapit o dili gani mawala sa atong kinabuhi.”1
Kini nga tambag nakapausab sa kinabuhi ni Po Nien. “Nasayud ko nga kon ako lang unahon ang Dios sa akong kinabuhi ug kon ako magmatinud-anon ug matinuoron Kaniya, ang sayop nga mga butang mawala ug mahan-ay ang nindot nga mga butang,” siya miingon. Kon iyang unahon ang Dios ug ang iyang relasyon ni Mei Wah maayo, ang Langitnong Amahan motabang aron kini magmalampuson. Nagpadayon uban sa pagsalig, giminyoan ni Po Nien si Mei Wah sa Templo sa Hong Kong China. “Napanalanginan gyud ko pag-ayo pinaagi sa pagsalig sa Ginoo,” siya miingon.
Tinguhaon nga Buhaton Iyang Kabubut-on
Laing paagi sa pagmugna og pagsalig sa Langitnong Amahan mao ang pabuhat sa Iyang kabubut-on. Alang kang Marta Fernández-Rebollos sa Tarragona, Spain, ang pagkat-on sa pagsalig sa Langitnong Amahan naggikan sa iyang pagpili nga padayunon ang iyang mga sumbanan.
Ang batan-ong lalaki nga iyang ka-date dili miyembro sa Simbahan ug dili interesado nga magpamiyembro. “Nanlimbasug ang akong espiritu tali sa akong nakat-unan kabahin sa mahangturong kaminyoon ug sa gatusang mga pasumangil diha sa akong kasingkasing nga dili na lang kini kab-uton ug minyoan kini nga lalaki para niining kinabuhia lang,” miingon siya. “Kadto mga panahon sa kalibog, kasakit, ug daghang mga luha.”
Naglibog sa pagdesisyon, si Marta misulod sa iyang kwarto ug nangita og giya gikan sa iyang patriyarkal nga panalangin. Iyang nabasa ang saad para kaniya kon siya mopili sa husto. Naghilak pag-ayo, siya nasayud kon unsay angay niyang buhaton. “Ang sangputanan sa panagbulag dili na igsapayan para nako. Wala ko masayud kon unsay anaa sa unahan, apan ako adunay kombiksyon nga kon anaa lang ko sa habig sa Ginoo, siguradong nindot gyud kini. Akong nadiskobrehan nga kon atong ipataas ang atong panglantaw ug mosunod sa mga pagdasig sa Espiritu Santo, atong madiskobrehan nga ang mga bunga sa pagkamatarung mao ang ‘hilabihan ka tam-is, labaw pa sa tanan nga sukad [atong] natilawan’ (1 Nephi 8:11).”
Sa Proverbio 3:5–6, atong mabasa:
“Sumalig ka sa Ginoo sa bug-os mong kasingkasing, ug ayaw pagsalig sa imong kaugalingong salabutan.
“Sa tanan nimong mga dalan ilha siya, ug siya magamando sa imong mga alagianan.”
Ang pagmugna og pagsalig sa Dios ug sa Iyang plano dili kanunay sayon. Atong atubangon ang atong kaugalingong mga hagit. Tingali wala pa ninyo makaplagi ang tawo nga angay [compatible] nga inyong i-date sa inyong ward o branch. Tingali naminyo na, apan wala pay mga anak. Tingali nanlimbasug kamo sa diborsyo. O tingali ang mga kasinatian sa nangagi nakapahimo kaninyo nga mahadlok nga mopasalig. Ang Ginoo nasayud sa inyong mga panlimbasug ug mihangyo kaninyo sa pagsalig Kaniya. Samtang kamo magkat-on sa pagsalig sa Langitnong Amahan, ang kalinaw ug direksyon moabut.