Si Elder Cook Namulong sa mga Miyembro ug mga Investigator sa Ivory Coast

Si Elder Quentin L. Cook sa Korum sa Napulog Duha ka mga Apostoles mibiyahe sa Abidjan, Cote d’Ivoire (Ivory Coast), niadtong Pebrero 2013. Atol sa pagbisita nangulo siya sa usa ka priesthood leadership conference, mihimo og espesyal nga miting uban sa mga miyembro ug investigators, ug mibisita sa dagkong mga opisyal sa gobyerno.

Si Elder Cook gikuyugan sa pagbiyahe nila ni Elder L. Whitney Clayton sa Kapangulohan sa Seventy; Elder John B. Dickson sa Seventy, Presidente sa Africa West Area; ug ni Elder Joseph W. Sitati sa Seventy, Unang Magtatambag sa Africa West Area Presidency.

Ang total nga gidaghanon sa nanambong sa priesthood leadership conference ug sa miting alang sa mga miyembro ug inverstigator 9,693, nga naglakip sa 619 ka investigators. Daghang miyembro ang misakripisyo og dako sa pagtambong. Si Virginie Oulai Tongo sa Meagui Branch, Cote d’Ivoire Abidjan Mission, miingon nga ang iyang pamilya nagtigom og kwarta aron lang makaadto ug makakita sa Apostol. “Mibiyahe mi og 12 ka oras, apan nalipay ko,” miingon siya.

Daghan sa nanambong sa komperensya mireport sa talagsaong kabuhong sa Espiritu nga ilang natagamtam. Si Bishop Leon Kouadio sa Dokui Ward, Cocody Stake, miingon, “nahibalo ko nga anhion mi sa inila nga sulugoon sa atong Manluluwas.”

Ang gidaghanon sa mga miyembro sa Cote d’Ivoire milambo gikan sa usa ka pamilya niadtong 1984 ngadto sa lima ka stake ug usa ka district karon.

Sa bag-o lang nga tuig ang kamatinud-anon sa mga Santos sa Ivoire makita pinaagi sa ilang buhat sa family history ug buhat sa templo. Ang tulo sa lima ka stake sa Cote d’Ivoire stakes mao ang nanguna sa 25 ka stake sa Simbahan sa porsyento sa mga adult nga misumiter og mga pangalan alang sa mga ordinansa niadtong 2012. Sa tanang stake sa Simbahan, ang Cocody Stake dunay pinakataas nga porsyento sa mga adult kinsa, sa usa ka higayon o sa lain, misumiter og mga ngalan alang sa buhat sa templo.

Ang mga batan-on mibuhat sab sa ilang bahin. Ang porsyento sa mga batan-ong Ivorian nga mihimo sa pag-index kaduhaon pang milabaw sa average sa Simbahan, bisan hapit tanan kanila walay personal nga akses sa computer ug sa Internet apan kinahanglang moadto pa sa stake family history center sa paghimo sa buluhaton.

Ang mga miyembro gitudloan nga ang buhat sa family history usa ka mahinungdanong bahin sa pagsunod sa ebanghelyo. Mitrabaho gayud sila aron maandam ang mga ngalan sa wala pa sila mosakay sa bus alang sa layo nga biyahe ngadto sa Accra Ghana Temple—ug siyempre dili lang diyutay nga ngalan, apan daghan.

Giawhag ni Elder Cook ug Elder Clayton ang mga Santos sa pagpadayon sa upat ka importanting buluhaton: pagpalambo sa ilang pagtuo sa Ginoo nga si Jesukristo, paglig-on sa ilang mga pamilya, aktibong makigbahin sa ebanghelyo sa uban, ug padayon sa talagsaon nilang paningkamot sa buhat sa family history ug buhat sa templo.