Tera Ae Ti Kakoaua
Are E Weteia te Uea E Anganna te Konabwai ni Kakoroa nanon te Wewete
Angiia membwa n te Ekaretia a na reke aia tai ni karekea te “nakoa”—te katabeaki ni beku. “E kantaningaira te Uea bwa ti na karekei nakoara n te Ekaretia bwa aonga ake tabeman ni kakabwaiaki man ara tarena ao ara konabwai ni karekea te bitaki,” e taku Beretitenti Ezra Taft Benson (1899–1994).1
Taan kairiiri n te Ekaretia, ake a tia ngaia ni weteaki bwa a na beku, a onimakiniia membwa ake tabeman ni kariaia ao ni kakoroi nanon nakoaia ake anganaki. Ni kabane nakoa aika boou bon te tai ni beku ao n rikirake ao e riai ni kakoroaki nanona ma te nanorinano ao n te botumwaaka n tataro. Wewete nakon te mwakuri n te Ekaretia a kanakoaki irouia taan kairiiri n te nakoanibonga imwiin ae a tia ni karekea te kariaiakaki mairoun te Uea. “Ko weteaki ibukin te Atua,” e kamatata Beretitenti Henry B. Eyring, te Moan ni Kauntira n te Moan ni Beretitentii. “E kinako te Uea. E ataia bwa antai ae E na beku n nakoa ni kabane n Ana Ekaretia. E rineiko.”2
N nakoara ao ti tei ibukin te Tia Kamaiu, ao te mwakuri ae ti karaoia—n aki taraa uarerekena—iai mwiina ae akea tokina. Ana kairoro te tia reirei n te Moanrinan ae nanomwaaka, te katoto, e kona n anaa nanon te ataei bwa e na mitinare n te bong teuana. Ke ana butimwai te tia butimwaia irua n te aro ae rangin n iraorao e kona ni buoka te membwa ae iai ana kanganga n namakina te butimwaeaki raoi nakon te ekaretia.
E na buokiira te Uea n nakoara, riki ngkana ti namakina te rawawata n te mwakuri. Ngkana ti tataro nakon te Tama are i Karawa ibukin te kairi, E na kairiira rinanon ana kairi te Tamnei ao e na kakabwaiaira ni karaoa raoi ara mwakuri. Te Uea e buokiia naake a mwakuri Ibukina ao E na karina mwakana nakon aia kekeiaki (taraa D&C 84:88). N aron are e a tia iai ni berita Beretitenti Thomas S. Monson “Ngkana ti mena n ana itera te Uea, ti tau ni karekea ana ibuobuoki te Uea. Uringa bwa antai are e weteia te Uea, te Uea e anganna te konabwai ni kakoroa nanon te wewete.”3
Ngkana ti ira ana katoto te Uea ibukin te mwakuri n ibuobuoki ao ni kakoroi nanon ara wewete ao tabera n te Ekaretia, maiura a na kakabwaiakaki ao ti kona n riki n ai aron te Atua (tara Moronaai 7:48; D&C 106:3).
-
Ti kona n tarai aeniboki, boki n reirei, aia reirei taan kairiiri n te Ekaretia, ao bwaai n reirei riki tabeua n reireiniira tabera ao ni buokia ni kaekai ara titiraki.
-
Ti aki ukoukori taian nakoa, ke n totokoi nakoa ake a roko rinanoia aika iai irouia te kariaiakaki n te nakoanibonga. (taraa Moses 6:31–32).
-
Ngkana ti ibuobuoki ni karaoa ana mwakuri te Uea, ti kona n tataro ibukina ao ni karekea Ana ibuobuoki (taraa D&C 84:88).
-
Kakoroan nanona ara wewete e na uoti kakabwaia ao te kimwareirei (taraa Mataio 25:23).
-
Nakoa ni kabane titebo kakawakiia, te Ekaretia e kainnanoia taan kairiiri n te neetiri n aroia naba beretitenti n te Bootaki n Aine (tara 1 I-Korinto 12:14–18). Ti kanga n ibuobuoki e kakawaki riki nakon ae ti na beku ia.