Te kabureaki ma te Nanoanga
E anaaki man te taromauri ni Botaki n Reirein te Aro are e karaoaki n Tebetembwa 9, 2012. Ibukin ana atureti ae bwanin n te Ingiriti, ae e atunaki “Iteraera, Iteraera, te Atua e Wewete,” kawara cesdevotionals.lds.org.
Ti kangaara ni kaeka nakoia aomata ao aroia e na kaota bwaninin ara onimaki n ara aro ao kabaeakira n ara euangkerio.
Tabeua taai aika a nako I bon kaoaki bwa N na taetae n aia taromauri n te titeiki irouia kairake n ikawai aika a tuai n iein. Ngke I a rinnanko man te mataroa are i buki n te titeiki tienta, te kairake n ataeinaine ae e mena ana ririki imarenan 30-ao 39 e rinnako naba n te tai naba anne. E ngae ngke i nanon te botanaomata ae uanao are a mwananga nakon te umantabu, e bon aki kangaanga bwa ko na aki nooria. N aron are I uringnga, iai uoua ana taitai, ana tabia aika kakaokoro ao mwamwan bwairina, ma irana aika taraa ni kateketeke ma karana aika kakaokoro aika a bon karaoaki, te kamumun ae e rangi ni kororo, ao te kabaraaki ae kabwakabwaka.
Bon te aine aio are te tamnei ae rawawata, tiaki kaain ara ekaretia, are e a tia ni kairaki—ke ae e raoiroi riki, e a tia ni kairaki iroun temanna—i aan ana kairiri te Uea nakon te taromauri aio n te mwakuri are e na buokia ni kunea te rau ao ana kairiri te euangkerio are e kainnanoia i nanon maiuna? Ke bon ngaia te membwa are e a tia ni bua kawaina teutana man ana kantaninga tabeua ao ana kainibaire te Ekaretia are e kaunga ibukia ana membwa ma are, te kakaitau, e bon teimatoa ni kaina ao n tia n rineia ni kaea te waaki ni kakukurei n te tairiki anne n te Ekaretia aio?
E ngae n anne temanna e na kaeka nakon te kairake n ataeinaine anne, te tua n aki toki bon anne bwa i nanon ara bootaki ao mwakuri, ti riai ni kaota te katoto ae bwanin ibukin ara onimaki n ara aro ao kabaeakira n ara euangkerio. Ai ngaia are, arora ni kaitara n taabo nako e riai ni katamaroaki, ao n aki kabuakaka. Ti aki kona ni kaeka ke ni kaitarai n te aro are ti na karaoa ae bure riki nakon, n te keiti aio, bon neiei. Anne tiaki nanona bwa akea ara iango, bwa akea ara kainibaire, bwa ngaira ni bukina aika aki ataaki ti bon kakeai tuua mai karawa n aron “tuua ibukin bwaai ake ti riai ni karaoi” ao “tuua ibukin bwaai ake ti riai n aki karoai” i nanon te maiu. Ma e bon nanonaki bwa ti riai ni maiuakin kainibaire akanne ao n tei ibukin “tuua ibukin bwaai ake a riai ni karaoaki” ao “tuua ibukin bwaai ake aki riai ni karaoaki” i nanon te kawai ae tamaroa nakon ara kabanea ni kona, te kawai are te Tia Kamaiu e maiuakinna ao n tei ibukiia. Ao E aki toki ni karaoa are e riai n tia ni karaoaki ni karika te tabo anne ni katamaroa riki—man reiakinan te koaua, nakon kabwaraan aia bure taan bure, nakon kaitiakan te tembora. Bon te bwaintangira ae korakora n ataia ni kangara ni karaoa aekakin bwaai akanne n te kawai ae eti!
Ngaia are, n reitaki ma te kairake n aine are e bon kunnikaina n ae e aki tataneiai te aba iai nakon te bootaki n taromauri, ti moanna, iaon aika moan kakawaki, man uringa bwa ngaia natin te Atua te aine ao ni bonganana ae akea tokina. Ti moanna man uringakina bwa ngaia naba natin temanna i aon te aonaaba ao e kona, i aan bukina tabeua, n riki bwa natiu te aine. Ti moanna man te kakaitau bwa e bon mena n ana bootaki te Ekaretia, n aki katinanikua teuana. Ni kauarerekeana, ti kataia n riki i nanon ara kabanea n tamaroa i nanon te aro aio i nanon te tangira ni buokia ni karikia nakon ana kabanea n tamaroa. Ti teimatoa n tataro n aki karongoa: Tera te bwai ae tamaroa ae e na karaoaki ikai? Ao terana te bwai ae tamaroa ae e na taekinaki? Tera te kabanea ae e na karaoa te aro aio ao ngaia n tamaroa riki? N taekini titiraki aikai ao ni kataia raoi ni karaoa terana are te Tia Kamaiu e na karaoia bon ngaia are I iangoia ae e nanonna ngke E taku, “Tai kareke nanomi n taraan te bwai, kareke nanomi aika eti” (Ioane 7:24).
N tia n atonga anne, I kauringiira ni kabane bwa ngkai ti kawaria ao ni buokia ni kaoka te tiibu te teei are e a tia n tiotio nako, ti a tia naba ni karekea te tabe ae korakora nakon te ka 99 n tiibu (ana reirei Kristo) ake a aki tiotio nako ao nakon are e tangiria ao ana kantaninga te Tia Kawakintibu. Bon iai n neia tiibu, ao ngaira ni kabane ti riai ni mena i nanona, n aki taekina te kamaiuaki ao kakabwaia ake a roko nakoira ibukin tikura ikekei. Tariu ao mwaneu aika kairake, te Ekaretia aio e aki kona n “kabebetea” ana reirei ni kanakoraoia ma te botanaomata ke ni butimwaeaki riki irouia aomata ke bukina riki tabeua. Bon ti man te aro ni kamaiu man kaotan te koaua are e anganiira ara tabo n tei are ti kona n tabekarake temanna are e kona n namakina te aki rau ke ni mwaninga te aba taekana. Ara nanoanga ao ara tangira—oin arora ao bwaai aika kainnanoaki man bootaki ni Kiritian—e riai n aki rairaki bwa kauarerekean taian tua. N aron ae George MacDonald te kamimi are e a tia n taekinna n te taina, i nanon aaro aikai “ti aki kabaeaki n taekini ni kabane are ti [kakoaua], ma ti kabaeaki n aki tarai [n aron] terana ae ti aki [kakoaua].”1
Nningai Ae Ti Riai Iai ni Motikitaeka
N te aro aio, iai tabetai te tai ibukin te aki ota, ai moarara riki ibuakoia kairake n aomata ake a kona n iangoia bwa ti aki riai ni motiki taekan bwaai nako, bwa ti bon aki kona ni karaoa tauakin te bwii ae bongana n aro nako. Ti riai n ibuobuoki imarenara ma anne bwa ibukina bwa te Tia Kamaiu e kamatata raoi bwa i nanon aaro tabeua ti riai ni motikitaeka, ti kabaeaki ni motikitaeka—n aron ngke E taku, “Tai angania kamea te bwai ae tabu, ao tai tetewenako ami momi i mataia beeki” (Mataio 7:6). Anne kanga ai aron te motikitaeka irou. Te kawai teuana are e aki butimwaeaki bwa kona butimwaeia ao n riki n ai aron te aonaaba ae boou are iai ana kainibaire aika a kona ni bitaki ao n uruakaki, are, ngkana e totokoaki n te aro ae bon tau, e takaruaia bwa n tokina akea ae te koaua ae akea tokina ke ae kaineti riki ma ae tabu, ai ngaia are, akea te nakoa teuana i aon bwaai nako are e kakawaki riki nakon are teuana. Ao i nanon ana euangkerio Iesu Kristo anne e bon aki koaua.
I nanon te mwakuri ni kakaean kakawakin te bwai, ti aki weteaki bwa ti na kabuakakaia tabeman, ma ti weteaki ni karaoi babaire ni katoabong are e kaota te motikitaeka—ti kantaninga te motikitaeka ae tamaroa. Unimwaane Dallin H. Oaks man te Kooram n Abotoro are te Tengaun ma Uoman n te taina e taekini aekan babaire aikai bwa “motikitaeka aikai a aki teimaan,” are ti aki toki ni karaoi ibukin oin kamaiuara ke kamaiuaia tabeman, ni kaitaraki nakon are e aranna bwa “te kabanea ni motikitaeka,” are e ti kona ni karaoaki iroun te Atua, are e atai koaua ni kabane.2 (Uringnga, n te koroboki ae tabu are e taekinaki mai mwaaina, bwa te Tia Kamaiu e taku bwa aikai a riai n riki bwa “motikitaeka aika tamaroa,” tiaki motikitaeka aika a bon tamaroa i bon irouia, aika bwaai aika a rangin kaokoro.)
Ibukin te katoto, akea ae e na bukina te karo ae e tukiia natina ni biri nakon te kawai ae e onrake ma taian kaa aika buti. Ai ngaia are bukin tera te karo e na bukinaki ibukin tararuakiia bwa te tai raa ataei akanne, n roroia ae ikawai teutana, a roko n te mweenga n te tairiki ke n iraua aia ririki are a maroro ke tao a tia ke a tuai ni kakatai ma turaki ke tamnei aika tangako ke n irereke ma te wene ni bure? Tiaki, ti karaoi babaire ao n tei ao ni kamatoai ara koaua—ni kauarerekeana, ni karaoi “motikitaeka aika aki teimatoa”—n tainako, ke are ti bon riai ni karaoi.
“A Aki Riai Tabeman ni Karekea Inaomataia n Rinerine?”
Aomata aika kairake a na kona n titirake ngkana aio e bane n roko ni keiti nako man te tabo aio are e tauaki ke te baire are e karaoaki man te Ekaretia, n taku, “Eng, ti ataia bwa ti na kanga ni karaoi arora, ma bukin tera bwa ti na karaoia tabeman bwa a na butimwaai ara kainibaire? Akea irouia inaomataia n rinerine? Ti aki riki n tamaroa i bon iroura ao ni motikitaekaia aomata, ni kairoroia tabeman n ara koaua, n tuangiia bwa ngaia, n ikotaki ma ngaira, ni mwakuri n te kawai teuana?” I nanon aekaki akanne ko na nako ni kabwarabwarai n te aro ae karaunnano bukin tera tabeua koaua a kamanoaki ao tabeua buure a kaitaraki n tabo are a kuneaki iai ibukina bwa te bwai are e taekinaki ao tuua ake a irekereke aki tii kaineti ma te botanaomata ke ma te tautaeka ma akea tokiia n te bwai are e na riki. Ao ngkai tiaki tangiria ni kauniia te koraki ake a kaokoro aia onimaki ma ngaira, ao ti a rangi n ingainga riki n aki kauna te Atua.
Ai bon aron are e taekinna te ataeinimwaane ae tebwi tabun ana ririki, “Ngkai ngkae I a kona ni kabutia, I ataia bwa I riai n tei n te taura ae uraura, ma e riai bwa ti na motikitaeka ao ni kataia ni kairiia aomata ni kabane bwa a na tei n te taura ae uraura?” Ko bon riai ni kabwarabwara bukina, eng, ti bon kantaningaia ni kabane a na kona n tei n te taura ae uraura. Ao ko riai ni karaoa aio n akea kaotakin aki kukureim irouia ake a bure ke ake a kaokoro aia onimaki nakon ara onimaki ibukina bwa, eng, bon iai inaomataia n rinerine n ae tamaroa. Ma tai kakewea bwa iai te kangaanga ni katobibira ngkana iai aika a rineia bwa a na aki ongotaeka.
Raoraou aika kairake, bon iai aro aika bati i nanon te aonaaba aio, ao iai te rinerine ae tamaroa ibukira ni kabane, ma akea ae katauaki ni mwakuri n ai aron ae te Atua e aki reitaki ma ngaira i aon atu n reirei aikai ke n ai aron ae tuua a na ti taraaki ngkana iai ana boraraoi te botanaomata i aoia.
I aki ata kakawakin riki te konabwai ao te raoiroi riki ibukira bwa ti kaotia nakon are ko na nakonako n te kawai ae nakoraoi—n taua te tei ae tamaroa n aron are e a tia ni katanoata te Atua ao te tua are e a tia n anga ma ni karaoia n te nanoanga, ma te ota ao te tangira ae korakora. Taekina te bwai ae matoatoa karaoana—ni katerea raoi te kaokoro imarenan te bure ao te tia bure! I atai kaokoro tabeua aika matoatoa riki karaoaia ao ni kangaanga riki n tabetai kabwarabwarakiia, ma ti bon riai ni kataia ni karaoia n te tangira n arona anne.