Ba Akea te Taeka Teuana Mairoun te Atua ae na Aki Mwaaka

Tao 12 te ririki n nako, I kitana abau ma kainnabau ao natiu aman man te Tautaeka ni Korea nako New Zealand. Ngke I mwakuri bwa te kauoman ni burintibo n te reirei ni Korea i New Zealand, I kaitibo ma kaain Korea aika mwaiti aika iai aia kanganga ma te katei ae boou ao nakon tuua ao kawai aika boou. I tangiria ni buokiia ao n ibuobuoki nakon New Zealand, ngaia are n au iango te riki n rooia e na riki bwa te kawai teuana n reitia aomata aika uoman ma te aba. Ngaia are, I mwiin au tataro ni kamatoa au iango, I iangoia n au ririki ae 53 bwa n na ira te reirei iaon te tua.

I ataia bwa e na bon kanganga. Ma ngke I karekea te boki n reirei iaon te kooti, I kunea bwa e na rangin ni matoatoa riki nakon are I kantaningaia. Bokinreirei ni kabane a taraa n rangin ni matenten, ao kanoaia a kona n rangin ni kanganga. E ngae ngke I a tia n ibuobuoki n rairi taeka man te taetae n Ingiriti nakon te taetae ni Korea ibukin te maungatabu n te maan ae kania 10 te ririki ao n tia ni kabanea a na tikurii ae te mwatita n te taetae n New Zealand, n taekana iaan te tua e taraa n ae te taetae n Ingiriti ae rangin ni kaokoro.

Ngke I oki nakon mweengau man te reirei n te moan bong, N na iangoia raoi bwa N na reitia ke N nang katokia imwain ae I waaki. Inanon te nanououa anne, teuana te iango ae e otinako: I kona n tokanikai ngkana I onimakina te Uea ma nanou ni kabane.

Bukina bwa I ataia bwa e maiu te Atua ao e kaekai ara tataro, I bubutia ibukin Ana ibuobuoki. I uringa teuana te kibu man te Baibara ae anganai te kamaiuiaki: “Bwa akea te taeka teuana mairoun te Atua ae na aki mwaaka” (Ruka 1:37). Te kibu anne e anganai te korakora bwa n na waaki nako.

N tainako ngkana I kaitara ma kanganga n tain au kamatebwai, te Atua e katauraoi kawai n tainako ke e kanakoia ana anera—aomata aika a ibuobuoki—ni kairai ni kawaiu.

N te bong teuana I korakai ni katiai au bwai n reirei. I karaoa au kabanea n tamaroa, ma I aki kona n ataia bwa tera ae tangiria te tia reirei bwa ti na karaoia. Ngke e a roko te Tabati, I katikui ni kabane au kamatebwai ao ni kabanea au tai iaon tabeu n te Ekaretia. Ngkai ngai te kauntira ae rietata n te titeiki, I kawara te uoote teuana n anga au taetae n tain te toa. Imwiin te bootaki temanna te mwaane e kawarai ao n taku bwa e a tia n noorai n te umwanreirei. I aki ataia ae ataein te reirei iaon te tua naba. Ngke e titirakinai bwa e uara a na atiainimente, I tuanga ma te koaua bwa iai au kanganga. E anga nanona bwa e na kawarai n au tabo ni buokai. Ngke arona bwa I aki nakon te uoote anne ao ni kaitibo ma ngaia, ao N na bon aki kona n anga te atiainimente iaon taina. Bon te anera are e a tia te Atua ni kanakoa bwa kaekaan au tataro.

Mai ibuakon au kabanea ni kanganga ni kiraati, te tia reirei e reirei inanon uoua te aoa n aki motirawa n tainako ngkana ti kiraati. E rangin ni kanganga te oota tiaki ti kanoan te kiraati ma aron naba ana taetae te tia reirei, ngaia ae man te kariaiakaki, I rawea ana reirei ibukin manga norakina. N te bong teuana ao I karekea te i-meeri mairoun te aine ae iaki kina. E kabwarabwara arona ngke raou n reirei ao n titiraki ngkana e kona n tibwaua au rawerawe bukina bwa a na tai ni mwakuri n tabetai e tukia man kaeakin te kiraati.

E koaua ae I kukurei n anganna katoton au rawerawe. N au iango ao I taku bwa I buokia, ma I kunea imwiina bwa ngaia te anera temanna mairoun te Atua are e a tia ni baireia bwa e na buokai. N te aro bwa ti na bwaati n te kiraati, ti riai n anga uoua mwakuri n te reirei ao ni karaoa teniua te aoa n ukeuke. E buokai ni katiai au bwai n te reirei ao ni katauraoai nakon te ukeuke. N akean ana ibuobuoki neienne, n au iango ao ti na bon aki bwaati.

N raonaki ma kanganga n riki bwa ataein te reirei ae a ikawai riki ao te tia taetae n Ingiriti ae tiaki kain te aba, iai tabeua riki tabeu are e a karika te kanganga ni katia te burokuraem. Au mwakuri, katabeakiu ma te botanaomata, ao nakoau n te Ekaretia e kabanea au tai ae mwaiti, ao I kataia naba n anga au kabanea ni kakawaki n tabe bwa te bumwaane, te tama, ao te tibu te mwaane te tia tararua ao te tia tabeakina te bwai ae a kainnanoi. Ngke temanna mai buakoia raou n reirei e atai bwaai aika n na karaoi irarikin au kamatebwai, e taekinna bwa I rangin n nanobaba ni karaoan au kametabwai iaon te tua irarikin tabeu ake tabeua. E ngae n anne, ao iai te kakorakoraaki bwa “baike a aki konaki irouia aomata ao a boni konaki iroun te Atua” (Ruka 18:27).

Ngke e a koro 55 au ririki, I a riki bwa te rooia bwa te tioritita ao te baritita n te Kabowi ae Rietata i New Zealand. I rangin ni kukurei bwa I aki ti riki bwa te rooia ibukin te kanganga n te taetae ma I karekea naba te koaua ae korakora bwa e maiu te Atua ao e kaekai ara tataro aika kokoaua. I ataia bwa akea te bwai ae kanganga man Ana ibuobuoki.