Magpakabuhi alang sa Kahangturan
Gikan sa usa ka pakigpulong sa debosyonal nga gihatag didto sa Brigham Young University–Idaho niadtong Marso 20, 2007. Alang sa kompleto nga teksto sa Iningles, bisitaha ang web.byui.edu/devotionalsandspeeches.
Ako naghangyo kaninyo mga young adult nga kanunayng hunahunaon ang inyong celestial nga kahimtang sa umaabut uban sa inyong pamilya sa kahangturan.
Pagkalahi ug kalisud sa kalibutan sa mga young adult (minyo o wala pa maminyo) karon kon ikomparar sa mga young adult sa milabayng duha o tulo ka henerasyon. Daghang mga hagit karon ang wala, o dili kaayo lisud, niadtong anaa pa ko sa kolehiyo.
Apan kamo anaa karon, niining panahona. Kamo nagpadayon samtang ang inyong katigulangan mitaliwan na. Anaa kamo niining panahona dili lang sulagma apan kabahin sa mahangturong plano—gidesinyo, gikasabutan, ug gipatuman sa wala pa mamugna ang kalibutan.
Hilabihan ninyo ka swerte nga nasayud sa Pagpahiuli sa ebanghelyo! Kamo nasayud nga adunay kinabuhi sa wala pa dinhi sa yuta kauban ang Langitnong Amahan ug si Jesukristo. Kamo gitudloan ug gisulayan. Kamo nasayud sa mga balaod nga makapahimo kaninyo nga molambo. Inyong gisunod kadto nga mga balaod, ug sa ingon may kahigayunan nga moanhi sa yuta, nagpahimutang kaninyo sa dalan paingon sa kahimayaan, kamandoan, ug pagka-dios.
Inyong nasabtan ang mga katuyoan sa mortalidad dinhi sa kalibutan, ug gitudloan kamo kabahin sa mga oportunidad sa sunod nga kinabuhi. Buot ipasabut, kamo adunay panglantaw sa kahangturan—inyong mahinumduman, ug inyong malantaw.
Kadaghanan sa inyong mga kaedad nga mga young adult nga dili mga miyembro sa Simbahan ni Jesukristo sa mga Santos sa Ulahing mga Adlaw, gamay lang ang nasayran niining kamatuoran. Sila nagpakabuhi ingon og naa sa kahon nga gihulagway niining duha ka panghitabo: pagkatawo ug kamatayon. Sila modesisyon ug moapil sa mga kalihokan nga nalimitihan ang panglantaw. Sa ingon sila nagpakabuhi aron magmalipayon sa karon—ang gidugayon sa panahon tali sa ilang pagkatawo ug kamatayon, nga mubo ra gyud kaayo kon ikompara sa kahangturan. Wala sila masayud sa ilang kinabuhi sa wala pa dinhi sa yuta ug gamay ang nasayran kabahin sa kahangturan.
Ang Inyong Mahangturong Potensyal
Hinoon, kamo nasayud sa saad sa inyong personal nga potensyal sa kahangturan. Alang niadtong magtiayon nga nabugkos diha sa balaang templo, ang Ginoo misaad:
“Kamo mobangon sa unang pagkabanhaw … ug makapanunod og mga trono, mga gingharian, mga kayutaan, ug mga kagamhanan, kamandoan, tanan nga mga kahitas-an ug mga kahiladman … ug kon ikaw mosunod sa akong pakigsaad, ug dili mobuhat og pagbuno ug pagpaagas sa dugo sa walay sala, kini pagahimoon ngadto kanila sa tanan nga mga butang bisan unsa ang akong sulugoon mobutang diha kanila, karon, ug hangtud sa tanan nga kahangturan; ug walay kapuslanan sa panahon nga sila wala na sa kalibutan; ug sila moagi sa mga anghel, ug sa mga dios diin gipahimutang didto, diha sa ilang pagkahimaya ug himaya sa tanan nga mga butang, ingon nga nabugkos diha sa ilang mga ulo, diin nga himaya mao ang kahingpitan ug pagpadayon sa mga binhi hangtud sa hangtud.
“Niana sila mga dios, tungod kay sila walay katapusan; busa sila gikan sa walay katapusan ngadto sa walay katapusan, tungod kay sila nagpadayon; niana sila labaw sa tanan, tungod kay ang tanan nga mga butang alagad ngadto kanila. Niana sila mga dios, tungod kay sila aduna sa tanan nga gahum, ug ang mga anghel mga alagad ngadto kanila” (D&P 132:19–20).
Ako naghangyo kaninyo nga kanunayng hunahunaon ang inyong celestial nga kahimtang sa umaabut uban sa inyong pamilya sa kahangturan, usa ka kahimtang sa dili matugkad nga himaya ug kabintaha nga dili nato hingpit nga masabtan. Ang butang nga sigurado kita, mao nga kamong tanan nagpuyo sumala sa inyong “kinabuhi sa wala pa dinhi sa yuta” (Abraham 3:26), ang matag usa kaninyo nakapasar sa tanang mga pagsulay sa kinabuhi sa wala pa dinhi sa yuta, kamong tanan nagbansay og dakong pagtuo, ug sa ingon, kamong tanan nakadawat sa pribilehiyo nga makaangkon og mortal nga lawas ug mianhi niining mortal nga kalibutan.
Busa, ayaw pagpakabuhi para lang magmalipayon sa mubong panahon; apan, kamo kinahanglang magpakabuhi para sa kahangturan. Hinumdumi kanunay nga kon kamo ug ang inyong kapikas, o kapikas sa umaabot kon wala pa maminyo, masulundon, kamo “adunay himaya nga idugang diha sa [inyong] mga ulo hangtud sa kahangturan” (Abraham 3:26)—usa ka talagsaong personal nga saad gikan sa Dios ngadto sa tanan Niyang mga anak.
Kon kamo matinud-anon sa inyong pagsunod sa mga sugo sa Dios, ang Iyang mga saad hingpit nga matuman. Ang problema, ang kaaway naningkamot sa paglibog sa hunahuna sa tawo. Kon ila siyang tugutan, si Satanas molingla kanila, ug mobuta kanila pinaagi sa kalibutanong mga butang.
Ang mga theologian ug mga eskolar sa Kristiyanong kalibutan wala masayud sa inyong nasayran kabahin sa mahangturong mga butang, apan si Satanas nasayud! Siya nasayud sa inyong pangpangandam sa kinabuhi nga wala pa dinhi sa yuta, inyong katuyoan dinhi sa yuta, ug dugang pa sa inyong mahangturong potensyal.
Ang Hebreohanon nga paghubad sa pulong nga yawa kay “tigdaot.”1 Ang yawa nagtinguha sa pagdaot sa inyong panaw padulong sa kahangturan. Siya mosulay sa pagbabag sa inyong potensyal dinhi ug sa sunod nga kinabuhi. Siya nagtinguha nga sayop ninyong gamiton inyong kabubut-on. Pipila sa mga batan-on, agresibong mopahayag sa ilang pagkagawasnon, mibati nga ang ilang pagkagawasnon makita gayud pinaagi sa pagpili og sayop. Bisan kinsang dili maalamon makahimo niana; bisan kinsang grupo makahimo niana.
Sa pagkatinuod, ang pagkagawasnon, tinuod nga kagawasan, maayong maipakita ug masinati pinaagi sa pagpili sa matarung. Ang Dios naghatag kaninyo dili lang sa katungod sa pagpili tali sa maayo ug dautan apan sa gahum usab sa pagpili sa maayo kay sa dautan! Sa ingon gihatagan mo sa Dios og mas dakong gahum kay ni Satanas ug sa iyang panon. Sa katapusan, kamo ang mohukom, dili si Satanas.
Gidesinyo sa Langitnong Amahan kining mortal nga kasinatian alang sa importanting katuyoan: nga kita pagasulayan ug buntugon ang dautan. Panagsa ra Siya nga pihong mohatag og mga pagsulay ug tintasyon, apan Siya nasayud nga ang mortalidad mohatag og daghan niini. Siya nagtinguha nga samtang anaa kita dinhi sa kalibutan, kita makakat-on sa pagbuntog sa atong “kinaiyanhon” nga pagkatawo (tan-awa sa Mosiah 3:19), mopalayo sa pagkakalibutanon, ug ipakita ang atong kaugalingon nga takus. Si Satanas adunay laing mga ideya. Iyang buhaton ang tanan aron pugngan ang atong paglambo.
Ang Tintasyon sa Kalibutan
Kining kalibutan, uban sa maliputon ug minaro nga tabang ug paglingla ni Satanas, nagtanyag kaninyo sa tintasyon nga mobuhat og mga butang aron dawaton sa mga tawo, makighugoy-hugoy sa pundok, malingaw sa kasamtangang kalipay—tingali diha sa dili hustong mga salida ug mga video game, mga kalapasan sa moral (lakip ang pornograpiya), bastos nga pinulongan, dili hustong sininaan, o pagpamakak. Si Satanas nagtinguha sa paglibog sa inyong pagsabut sa sagradong plano para sa pamilya: nga ang kaminyoon tali sa usa ka lalaki ug sa usa ka babaye gi-orden sa Dios ug ang mga anak adunay katungod nga maamumahan sa usa ka inahan ug amahan.2
Kon, sa karon, wala ninyo hunahuna nga gidawat ang pag-agni ni Lucifer, iyang ihikaw kaninyo ang mga panalangin sa kahangturan. Si Satanas walay mapaabot sa kahangturan. Hinumdumi, siya napilde sa gubat sa langit, usa ka gubat gamit ang pagpamatuod (tan-awa sa Pinadayag 12:11) diin ang matinud-anong mga sumusunod ni Kristo mipildi kaniya ug sa iyang pundok. Daghan ang mga biktima: ang tanang sumusunod ni Satanas—ikatulong bahin sa pundok sa langit—gipapahawa. Sila dili na makadawat og pisikal nga lawas o may oportunidad para sa kinabuhing dayon.
Si Lehi, namulong ngadto sa iyang anak nga si Jacob, miingon:
“Ug ako, si Lehi, sumala sa mga butang diin ako mibasa, kinahanglan gayud nga magdahum nga usa ka anghel sa Dios, sumala niana nga nahisulat na, nahulog gikan sa langit; busa, siya nahimo nga usa ka yawa, nagtinguha niana diin dautan sa atubangan sa Dios.
“Ug tungod sa iyang pagkahulog gikan sa langit, ug nahimo nga uyamut sa kahangturan, siya usab nagtinguha sa kauyamot sa tanan nga mga katawhan” (2 Nephi 2:17–18).
Si Lehi mitudlo usab: “Busa, ang mga tawo gawasnon sumala sa unod. … Ug sila gawasnon sa pagpili sa kalingkawasan ug sa kinabuhi nga dayon, pinaagi sa halangdon nga Tigpataliwala sa tanan nga mga tawo, o pagpili sa pagkabihag ug sa kamatayon, sumala sa pagkabihag ug sa gahum sa yawa; kay siya nagtinguha nga ang tanan nga mga tawo unta mahimo nga mauyamot sama ngadto kaniya” (2 Nephi 2:27).
Sa atong panahon, ang mga tigpayuhot og mga druga, tig-apud-apud og pornograpiya, tigpasiugda og dautang kalingawan, tigsuporta og mga bakak, tigpauso og dili angay nga sinina, tiglingla og imoralidad, ug tigsaway sa tradisyonal nga pamilya ang tanan nagpasiugda og mga pagpili nga mopakunhod sa espiritwal nga kinabuhi, gani moresulta og espiritwal nga kamatayon, sa mga anak sa Dios.
Hinumdumi kanunay nga si Satanas nagkatawa sa nahiaguman niadtong nadala niining mga panglingla (tan-awa sa Moises 7:26). Magkalahi-lahi ang iyang pamaagi, apan adunay komon nga tumong: pagkamasinupakon ug ang kaabin nga pagkawala sa mga panalangin.
Ang mga Panalangin sa Pagkamasulundon
Ang pagkamasulundon makahatag og mga panalangin ug kalinaw. Pamalandongi ang usa ka pihong desisyon nga imong gihimo sa pagbuhat og husto, bisan kusog kaayo ang tintasyon sa pagbuhat og sayop. Tingali usa kadto ka desisyon sa paglikay sa dili hustong mga panghunahuna o pagsulti sa kamatuoran kon sayon ra unta ang pagpamakak. Tingali usa kadto ka desisyon sa pagbarug ug paggawas sa sinehan (o sa bisan asang dili balaan nga dapit) nga gi-advertise nga maayo apan, sa pagkatinuod, dili angay.
Samtang kamo mohinumdom sa inyong hustong desisyon, unsa ang inyong gibati? Tumang kalipay? Usa ka pagbati nga makontrol ang kaugalingon o nahatagan og gahum? Nadugangan ang pagsalig sa atubangan sa Ginoo? Nadugangan ang kapasidad sa pagbuntog sa yawa? Kana ang gahum, kana ang kagawasan!
Kon kamo magpadayon sa pagbuntog sa tintasyon, magkasayon ang pagbuhat niini—dili nga ang matang sa pagbuntog nausab, kondili ang gahum sa pagbuntog mas milig-on.3 Kamo makabuntog sa bisan unsang tintasyon nga inyong atubangon (tan-awa sa 1 Mga Taga-Corinto 10:13).
Kamo adunay kahibalo sa inyong balaanong kagikan. Kamo nasayud sa inyong balaaong kapaingnan. Dapiton ko kamo nga “mamahimong matang sa tawo nga kamo mahimo isip usa ka anak sa Dios”4 ug dili magpakabuhi para magmalipayon sa mubong panahon kondili para sa kahangturan.
Kamo talagsaong mga young adult, kamo mga umaabot nga lider sa gingharian sa Dios ug sa katilingban, kinahanglan dili mahimong biktima niining walay katapusang gubat. Kamo nakalingkawas sa gubat sa langit; kamo makadaog sa gubat dinhi sa yuta. Ayaw pagpakabuhi para magmalipayon sa mubong panahon apan para sa kahangturan.
Salig, nga angay ang inyong paningkamot sa pagsunod sa mga sugo, kay ang inyong ganti mao ang makabalik sa presensya sa Dios sa kinatas-an nga ang-ang sa celestial nga gingharian.