Maiu n te Kawai are e na Kakabwaiako ni Karokoko n te Maiu are Akea Tokina
Man te taetae n taromauri are e kanakoaki n te Brigham Young University–Idaho ni Maati 20, 2007. Ibukin bwaninin taekana n te Ingiriti, nakon web.byui.edu/devotionalsandspeeches.
I bubuti ma te onnon ma ngkoe bwa ti na iangoa maium n te tiretio n taai aika ana roko ma am utu n te maiu are akea tokina.
Kaokorora ao kangangara aia aonaaba kairke n ikawai (n tia n iein ke n tuai n iein) n te bong aei ngkana e kabotauaki ma aia aonaaba kairake n ikawai ni uoua ke tenua te roro n nako. A mwaiti kakaewenako n te bong aei aika a tuai n riki, ke n aki rangin ni korakora, nakon are ngke I mena n te reirei.
Ma ko mena ikai ngkai, n te tai aei. Ko waaki nako ngkai aomata aika a ikawai riki nakoim a mate. Ko mena ikai n te tai aei tiaki n ae ko manennanti n roko ma kanga mwakoron te babaire ae akea tokina—baireaki, kariaiakaki, ao ni karaoaki imwain are e karikaki iai te aonaaba.
Ko a tekeraoira n ata Kaokan te euangkerio! Ko ataia bwa iai te maiu are imwain te maiu ae mamate aei imatan te Tama are i Karawa ao Iesu Kristo. Ko ka reireiakaki ao ko kataaki. Ko reiakin tuua ake a na kariaiko bwa ko na waaki ao n rikirake iai. Ko iri tuua aikanne, ae ngaia ae e kariaiakako bwa ko na ruo nakon te aonaaba, ni katikuko iaon te reirei are e kairiko nakon te karietataaki, te tautaeka, ao taian Atua.
Ko ata te kantaninga ibukin te maiu n rabwata iaon te aba, ao ko a tia n reireinaki taekan taai n te maiu imwiin te maiu aei. Ni kakimomotoana, iai iroum taraan akea tokina—ko kona n tanrikaaki ao ko kona n tara moam.
Angiia kairake aika ti tebo aroia ao aika tiaki kaain Ana Ekaretia Iesu Kristo Ibukiia Aika Itiaki ni Boong Aika Kaitira, ao te aonaaba ni kabuta, e uarereke ataakin koaua aikai irouia. A maeka inanon te bwaoki ae kabwarabwaraaki ni bwaai aika uoua: te bungiaki ao te mate. A karaoi babaire ao n tabetabe ni katei aika katauaki man te taratara ae tianaki. E kakawaki bwa ana maiu ni kukurei n te tai aei—abwakin te tai imarenan te tai are a bungiaki iai ao te tai are a mate iai, bon te tai ae rangin ni kimototo ibukin te maiu are akea tokina. A tara n ae aki ata te bwai teuana ibukin maiuia imwain te maiu aei ao e uarereke ibukin te maiu are akea tokina.
Am Konabwai are Akea Tokina
Ngkoe, n aron ae I ataia, ko ata te berita n am konabwai ibon iroum n te tabo are akea tokina. Nakoia taanga ake a kabaeaki n te tembora ae tabu, e berita te Uea:
“E na reke irouia te moan mangauti … ao ni karekei kaintokanuea, aba n uea, uea, ao mwaaka, tooka, ni kabane rietaia ao nanoia … ao ngkana kam kawakin au reirei, ao n aki karaoa te tiri aomata are e na kawawaea raraia aomata aika akea aia bure, e na karaoaki nakoia ni bwaai ni kabane n aron are e a tia ni karaoia au toro nakoia, n te tai, ao n rinanon ni kabane n akea tokina; ao n riki bwa te taanga ae bwanin ngkana a otinako man te aonaaba; ao ana nako irouia anera, ao taian atua, ake a katukaki ikekei, nakon karietatakiia ao mimitongiia ni bwaai ni kabane, n aron are a tia ni kabaeaki iaon atuia, are mimitongina e na riki bwa bwaninin ao kateimatoan te koraa n n aki totoki.
“Ngaia ae a riai n riki bwa atua, ibukina bwa akea tokiia, ngaia ae a riai n roko man akea tokina nakon akea tokina, ibukina bwa a teimatoa; ngaia ae ana mena ieta ni kabane, ibukina bwa bwaai ni kabane a bane n irekereke ma ngaia. Ngkanne a riai n riki bwa atua, bukina bwa a bane n iai mwakaia, ao anera a bane ni katan irouia” (D&C 132:19–20).
I bubuti ma te onnon ma ngkoe bwa ti na iangoa maium n taainako n te tiretio n taai aika ana roko ma am utu n te maiu are akea tokina, te aro n akoi ae akea kabotauana ao te tekareaoi ae e aki kona n oota te aba iai raoi. Tera ae ti na koaua raoi iai, eng, bwa ngkami n tatabemani ngkami nako kawakina am “moan etiteite” (Abraham 3:26), ngkami n tatabemani ngkami kamwa tia ni bwaati te ukeuke ni kabane n te maiu imwain te maiu aei, ngkami n tatabemani ngkami nako kamwa tia ni kamwakura te onimaki ae korakora ae ngaia ae, ngkami n tatabemani ngkami kam karekea te tai ni karekea te rabwata ae mamate ao n roko nakon te aonaaba ae mamate aei.
Ngaia ae, ko riai n aki maeka ibukin te tai aei; ma, ko riai ni maiu ibukin akea tokina. Uringnga n tainako bwa ngkana ngkoe ao kain abam, ke kain abam n te tai ae na roko ngkana ko tuai n iein, kam ongotaeka, ko na “karekea te mimitong ni katokaki iaon [atuum] n akea tokina ao n aki toki” (Abraham 3:26)—te berita ae moan te tikiraoi mairoun te Atua nakoia Natina n tatabemnaiia nako.
Ngkana ko kakaonimaki ni kawakin ana tua te Atua, Ana berita a na bane ni kakoroaki bukiia ni kabane. Te kangaanga bwa, te kakaitara n tamneia mwaane a kakorakoraia ni kamataki aia iango. Ngkana a kariaia bwa e na rin, Tatan e na kamamara aia konabwai n ata te bwai ae eti ao ae e buakaka, ao a kamtakiiaki ma ao man bwain te aonaaba.
Te tia reirei n taekan aro ao ataein te reriei n te aonaaba ni Kiritian aki ata ae ko ataia ibukin bwain ae akea tokina, ma Tatan e ataia! E ata am katauraoi n te mwaiu imwain te maiu aei, am kantaninga iaon te aba, ao riki, am konabwai n riki n akea tokina.
Aia rairairi I-Ebera n te taeka ae riaboro bon “te tia urubwai.”1 Te riaboro e ukoukoria ni kamangoa mwanangam nakon te maiu are akea tokina. E kataia ni kamangoa am konabwai ikai ao nakon taai aika a na roko. E na kataia ni kairiko bwa ko na aki kabongana raoi inaomatam n rinerine. Tabeman kairake n ataei, a ingainga nanoia ni kaota inaomataia, n namakinna bwa e na nakoraoi riki kaotan inaomataia n rinean karaoan te bwai ae bure. Te aomata ae nanobaba e kona ni karaoa anne, te botanaomata e kona ni karaoa anne.
Ni koauana, te inaomata, te inaomata ni koaua, e na rangin n tamaroa kaotakina ao karaoana ma rinean te raoiraoi n tainako. E a tia te Atua n anganiko tiaki ti te koaua n rinea te raoiroi ao te buakaka ma n rineaba naba te mwaka n rinea te raoiroi iaon te buakaka! Ngaia ae e a tia te Atua n anganiko te mwaaka ae korakora riki nakon Tatan ao ana taanga ni buaka. N tokina, ngkoe ae ko na iangoia, tiaki Tatan.
Te Tama are i Karawa e katea te atatai ae mamate aei ibukin te kantaninga ae kakawaki: bwa ti na bae ni kona ni kataaki ao n tokainikai iaon te buakaka. E kangaanga bwa e na kamatatai ni bairei kataaki ao kabwakabwaka, ma E ataia bwa n te maiu ae mamate aei ao e na katauraoi n te mwaiti ae korakora. E tangiria bwa ngkai ti maeka ikai iaon te aba, ti reirei bwa ti na kanga n tokanikai iaon “arora” ibon iroura (tara Motiaea 3:19), kakeaira man kabwakabwakan bwain te aonaaba, ao kakoauaira bwa ti tau. Iai ana iango Tatan tabeua. E na karaoa te bwai ae e kona n urua aron ara kekeiaki.
Ana Kabwakabwaka te Aonaaba
Te aonaaba aei, ma ana ibuobuoki ao ana kaunganano Tatan aika wanawana ao ni kakamaku, e anganiko te kataaki ni karaoi bwaai bwa aonga aomata ni butimwaiko, ni karaoi bwaai aika a karaoi angiia am roro, ni kakimwareireiko ma kakukurein te tai aei—tao n aron tamnei ao takakaro n te witeo, aroaro aika buakaka (n aron tamnei n tangako), taetae aika buakaka, kunnikai aika aki riai, ke te aki kokoaua. Tatan e na ukoukora kamangaoan otam n te babaire ibukin te utu mai ieta: bwa te mare e katabuaki iroun te Atua imarenan te mwaane ao te aine ao bwa iai inaomataia ataei bwa ana kaikawaki iroun te tina ao te tama.2
Ngkana, ibukin te tai aei, ko aki iangoia raoi ni kariaia ana kakao Rutibero, e kona ni iraeko man kakabwaia aika akea tokiia. Akea ana iango Tatan nakon te kantaninga ibukin te kaniwanga ibukin akea tokina. Uringa, e konaki n te buaka i karawa, te buaka are e karaoaki man te kakoaua (tara Te Kaotioti 12:11) ike taan iriira Kristo aika onimaki a konaia ma taan boutokaia. Te ikuaki e rangin ni mwaiti: ni kabane ana taan iriira Tatan—teuana te katenimwakoro tangani karawa ni kabaneia—aika a kamaunaaki. A na aki manga karekea rabwataia ke ni karekea te tai ibukin te maiu ae akea tokina.
Riaai, e taetae nakon natina te mwaane Iakobwa, e taku:
“Ao ngai, ae Riaai, n aron bwaai ake I a tia ni wareki, I a katautaua bwa a na anera te Atua temanna n aron are e a tia ni koreaki, e a bwaka mai karawa; man riki bwa te riaboro, ngkai e a karaoi bwaai aika e taku te Atua bwa a buakaka.
“Ao ngkai e a tia ni bwaka mai karawa, ao e na karawawataki n aki toki, e ukoukora naba karawatwatakiia aomata” (2 Nibwaai 2:17–18).
E reirei riki Riaai: “Mangaia ae a inaomata aomata n aron te maiu n iriko. … Ao a inaomata n rinea te inaomata ao te maiu ae akea tokina, rinanon te Tia Tei ae korakora ibukiia aomata ni kabane, ke n rinea te tautoronaki ma te mate, n aron ana tautaeka ma mwaakan te riaboro; bwa e ukoukora karawawatakiia aomata ni kabane n ai arona” (2 Nibwaai 2:27).
N ara tai, taan kaboa nako te turaki, taan tibwatibwai tamnei n tangako, taan karikirakei bootaki ni kakukurei aika buakaka, taan buoktoka te kewe, taan katanoatai kunnikai aika aki riai, taan anai nano ni katei aika aki riai, ao taan tiriburei katein te utu a bane ni karikirakei rinerine ake a na kamauna te maiu n tamnei, mwakuri aika a na karika maten tamneim, natin te Atua ataeinimwaane ao ataeinnaine.
Uringnga bwa Tatan e ngareakin tekebuakaia naake a tia ni kababaaki man taian kamwane aikanne (tara Moses 7:26). Ana kawai a kakaokoro, ma iai bukiia ae rangin n ataaki: te aki ongotaeka ao te irekereke ma buan taian kakabwaia.
Kakabwaia man te Ongotaeka
Te ongotaeka e kariki kakabwaia ao e uota te rau. Iangoa te iango ae onoti ae ko karaoia bwa ko na karaoa ae raoiroi, e ngae ngke e korakora te kaririaki ni karaoa te bwai ae bure. Tao te iango ni kakeai iango aika aki riai ke n taekina te koaua ngkana e na bebete riki te kewe. Tao te babaire n teirake ao n otinako man te tamnei (ke n tabo riki tabeua aika aki tabu) anne are e katanoaki bwa e kariaiakaki ma, ni koauana, e kakoauaki bwa e aki riai.
Ngkana ko tanrikaaki nakon oin am babaire, tera ae ko namakinna? E kakukurei? Te namakin ni kan taua taekam ibon iroum ke te tia anga te mwaaka? Rikiraken te aki nanokokoraki imatan te Uea? Karababa te konabwai n totokoa te buakaka? Anne bon te mwaaka; anne bon te inaomata!
Ngkana ko teimatoa n n totokoa te kaririaki, e na rikirake ni bebete karaoana—tiaki n ae aron totokoan te kaririaki e a bitaki, ma mwakam ni karaoia e a tia n rikirake.3 Ko kona n tokanikai iaon aekan kariri aika ko na kataira ma ngaia (tara 1 I-Korinto 10:13).
Iai am atatai n rikim ma ieta. Iai ataakin ae bwanin n am tabo i karawa are ko na nako iai. I kaoko “bwa ko na waerake nakon te tabo are ko na waerake nakon te bwai ae tabu inanom”4 ao ni maeka tiaki ibukin te tai aei ma ibukin te tai ae akea tokina.
Ngkami kairake n ikawai aika kam tamaroa, ngkami taan kairiri n aba n uean te Atua ao inanon te botanaomata, aki riai ni konaki n te buaka ae aki kauaroro aei. Ko tokanikai n te buaka i karawa, ko kona n tokanikai n te buaka iaon te aba. Tai maiu n te tai aei ma ibukin te maiu are akea tokina.
Koaua raoi, bwa e uana am kekeiaki ngkana ko kawakin taian tua, bukina bwa kaniwangam bon te oki nakon te Atua n te kabanea n rietata ni karinan n te aba n uea ae te tiretio.