Ang Akong mga Summer didto sa Templo
Ang tagsulat nagpuyo sa Utah, USA.
Daghang mga panalangin ang miabut sa dihang ang akong pamilya migamit sa among panahon sa bakasyon sa pagtambong sa templo kada summer.
Litrato sa Templo sa Stockholm Sweden ni Stefan Hallberg, dili mahimong pakopyahan; sa luyo ug utlanan © Thinkstock/iStockphoto
Nagtubo ako sa Norway. Ang pinakaduol nga templo anaa sa Stockholm, Sweden, nga 8 ngadto 10 ka oras nga pagdrayb. Dili na kinahanglang isulti pa, ang bisan unsa nga biyahe ngadto sa templo nagkinahanglan og makuti nga pagplano ug panagsabut. Ang among stake nagplano og duha ka pagbisita ngadto sa templo alang sa kabatan-onan kada tuig; daghang mga ward ang moabang og bus ug moadto sa templo sa katapusan sa semana. Makalingaw nga mouban sa ubang kabatan-onan, apan ang akong pamilya ug ako gusto nga magdungan sa pag-adto sa templo sa laing higayon.
Mao nga usa ka tuig niana nakahukom mi nga moadto sa Stockholm atol sa bakasyon sa summer. Nindot kaayo kadto nga kasinatian, ug nahimo kining naandan alang sa among mga summer. Magkampo mi sa kampinganan duol sa templo. Kada buntag mobangon mi og sayo alang sa sesyon sa bunyag uban sa laing mga pamilya gikan sa Norway nga mianha sa templo. Pagkahuman magdula mi og football ug mag-swimming diha sa kampinganan.
Kini nga mga summer sagrado nga mga handumanan alang nako karon. Bisan og dili kami duol sa templo aron makaadto kada bulan, espesyal gyud ang okasyon kanunay kon kami moadto. Ug bisan og ang biyahe dugay ug kapoy, ang Ginoo mipanalangin namo sa among mga sakripisyo. Ang akong espirituhanong mga kasinatian sa templo nakatabang nako pagpalambo og gugma alang sa templo ug sa mga ordinansa niini. Nakapasuod usab kini namo isip pamilya.
Usa ka espesyal nga kasinatian nga akong nahinumduman mao kadtong medyo nagpabadlong ko. Akong gibati nga akong nakita ang daghang mga depekto sa akong mga ginikanan, ug akong gibati nga wala silay katungod sa pagtambag nako kon unsaon nako ang akong kinabuhi. Bisan og takus akong nagpuyo aron makaadto sa templo, akong gisaway ang tahas sa akong amahan isip pangulo sa among pamilya. Apan sa dihang miadto mi sa templo og dungan aron sa paghimo og mga bunyag ug mga kumpirmasyon, akong gibati ang presensya sa nindot nga espiritu. Sa dihang gipandong sa akong papa ang iyang mga kamot sa akong ulo aron sa pagkumpirma nako alang sa mga tawo nga nangamatay, akong gibati ang Espiritu nga nagmatuod nako nga siya naglihok pinaagi sa tinuod nga awtoridad sa priesthood. Nakapaamgo kini nako nga bisan og ang akong amahan dili hingpit, buotan gihapon siya nga amahan ug ako bulahan nga nahimo niyang anak. Gibati nako nga kinahanglang maghinulsol sa akong pagkabadlongon ug maningkamot sa pagsabut sa kaalam ug gugma sa iyang mga pahimangno.
Kining daghang mga tuig nga milabay kadto nga mga summer didto sa templo lab-as gihapon sa akong panumduman. Ang templo nahimo gyud nga usa sa tinuod nga maanindot nga mga dapit sa kalibutan, sama sa Katubigan sa Mormon alang sa mga katawhan ni Alma. “Unsa katahum sila ngadto sa mga mata kanila kinsa diha miabut ngadto sa kahibalo sa ilang Manunubos” (Mosiah 18:30).