O Se Faamanuiaga mo Mamá

Ua maea le Peraimeri, ma sa sue e Reupena e 10 tausaga ia faifeautalai. E faapea o le a la savavali ma ia i le fale. Na aoaoina e Elder Sánchez ma Elder Rojas Reupena ma lona uso matua, o Diego, i lesona a faifeautalai ma sa papatisoina ma faamauina i laua. O lea la ua mafaufau ai Reupena o i laua o ana uo mamae.

Sa autilo atu Reupena i le faamalama o se faitotoa o le potuaoga o loo tapuni. A i laua na! Ae o le a le mea o loo la faia? Sa tuu o la lima i luga o le ulu o se tama i le uarota, ma sa foliga mai o loo la faia se tatalo e pei ona la faia ina ua faamauina Reupena.

Ina ua la o mai i fafo o le potu, sa ia fesiligia faifeautalai, “O le a le mea sa lua faia?”

“Sa ma tuuina atu se faamanuiaga o le perisitua ia Uso Mendoza,” o le tala lea a Elder Sánchez. “E pei lava o se tatalo faapitoa, ma e mafai ona tuu atu ai le faamafanafanaga, fesoasoani i se tagata ia iloa le auala e foia ai se faaletonu, po o le faamaloloina foi o se tasi o loo mai.”

Na toe saili foi Reupena mo faifeautalai i le Aso Sa na sosoo ai ina ua tuua le lotu. “E mafai ona lua o mai i lou fale ma tuuina atu i lou mamá se faamanuiaga?” na ia fesili mai ai.“O le tiga soo ia o lona tua.”

Sa latou faatopetope uma atu loa i le fale o Reupena. Sa talanoa Elder Sánchez ma Elder Rojas i le mamá a Reupena O ia o se tagata o le Ekalesia, peitai e lei toe auai i le lotu mo se taimi umi lava.

“Ua ma iloa e te le o malosi, Tuafafine Garcia,” o le tala lea a Elder Rojas.

“O le tele ia o vaiaso na matua tiga ai lou tua,” sa ia tauina mai. “Sa ou feiloai i le tele o fomai, ae e lei mafai ona latou fesoasoani mai ia te au.”

“Sa talosagaina i maua e Reupena ma te o mai ma tuuina atu ia te oe se faamanuiaga o le perisitua,” o le tala lea a Elder Sánchez. “E te manao ma te faia lena mea?”

“Oi, ioe, faamolemole,” o le tala lea a Mamá.

Ao tuuina e faifeautalai o laua lima i luga o lona ulu ma tuuina atu ia te ia se faamanuiaga, na tafe mai i lalo o alafau o Mamá ia loimata. Ina ua uma, na fusiina o ia e Reupena. “Ou te iloa o le a fesoasoani le faamanuiaga ia te oe,” o lana tala lea.

O le tolu o aso mulimuli ane na toe foi ai faifeautalai ina ia vaai po o a mai le mamá a Reupena. “Ou te matua fiafia lava e vaai ia te oulua,” o lana tala lea. “Na amata ona aluese atu le tiga o lou tua ina ua uma ona lua tuuina mai le faamanuiaga ia te au, ma ua matua leai lava se mea i le taimi nei!”

“Ua faamaloloina oe, Tuafafine Garcia, e le Tama Faalelagi” o le tala lea a Elder Sánchez. “Ma sa Ia faatagaina i maua e fesoasoani atu ia te Ia i le faaaogaina o le pule o le perisitua ua ia i maua e faamanuia ai oe.”

O le Aso Sa na sosoo ai—ma Aso Sa uma ina ua mavae lena mea—na o ai Mamá ma Reupena ma Diego i le lotu. Na ia iloa e moni le mana o le perisitua, ma na faapena foi Reupena.