O Oe o se Mamona?

Sa ou mamao ese mai le aiga ao auai i se fonotaga faavaomalo mo lau galuega. E faitau selau tagata sa auai, ae sa na o au lava mai i lau setete ma le itulagi.

I se tasi afiafi, sa faia ai se taumafataga o le afiafi mo tagata auai uma. Ao matou ulu atu i le fale mo le taumafataga, sa tofu i matou ma ni pepa ulufale se fa e faaaoga i le pa e oka fua ai ia meainu malolosi. Sa oo mai ia te au le faigofie tele mo se tasi e mamao mai le aiga ona faaosoosoina i lena avanoa, ma le mafaufau o le a leai lava se tasi o le a iloaina. O se manatu puupuu lava, ma sa ou tuuina atu le pepa ulufale i le tagata o i le faitotoa.

I le taimi o le taumafataga, sa matou nonofo faatasi ma ni tagata e le masani i ai e toafitu. Sa inu lau vai ao matou aai, talanoa, talie, ma fesuiai faamatalaga o le a fesoasoani ia i matou i a matou galuega.

O le taeao na sosoo ai i le ‘aiga o le taeao, sa ou feiloai atu i se tamalii lea sa nofo i lau laulau. Sa ou fiafia lava i le iloaina i le pine o lona igoa o ia e sau mai i lou nuu—o se nuu ou te le i nofo ai mo le 35 tausaga. Ina ua maea le aoga maualuga, sa ou tuua lou aiga mo le kolisi, faaipoipo, ma siitia ese atu.

Ao ma talanoaina nofoaga ma mea na tutupu o le nuu sa ma iloa uma, sa ia fesili mai ia te au pe o i ai lava sou aiga iina. Sa ou tali atu e leai, ae sa tele au uo lelei iina ma o loo matou fesootai pea. Sa ia fesili mai po o ai i latou, ma sa amata ona ou tau i ai nisi o i latou.

Ina ua mavae ni nai uluai igoa, sa ia taofi au ma faapea mai, “Faatali, o oe o se Mamona? O tagata uma ua e tauina mai igoa o tagata Mamona.”

Ina ua ou faailoa atu o au o se tagata o le Au Paia o Aso e Gata Ai, na ia tau mai ia te au o ni tagatanuu lelei na uo ma le auala o latou auauna atu ai i le alalafaga ma avea ma faataitaiga lelei i tagata uma. Mo ni nai minute, sa ia faasoa mai lona agaga faamemelo mo le Ekalesia ma au uo, ma tau mai ia te au le auala o avea ai i latou o ni faufautua mo le lelei i le alalafaga.

Ao ma faamavae, sa le tea ma lou mafaufau le mea semanu e tupu pe ana ou filifili e faaaoga na pepa ulufale [mo meainu malolosi]. Sa aoaoina au e filifili le mea sao mai na lava tagata na ma talanoa i ai. Semanu ou te le mautonu ma maasiasi e tautino atu o a’u o se tagata o le Ekalesia pe ana faapea ou te faaaogaina pepa ulufale [mo meainu malolosi].

Ou te faafetai ai lava mo faataitaiga a na uo agavaa, malolosi, ma auauna atu—35 tausaga mulimuli ane ma le 2,000 maila (3,220 km) le mamao mai le aiga sa ou ola ae ai.