O Luitau O Faamanuiaga Ia

Sa ma amataina lo ma faaipoipoga ma se vaaiga e faavavau, ma sa ma lagona ai o lona uiga e le tatau ona ma tolopoina pe faatapulaaina ia fanau o loo faatalitali e o mai i le ma aiga. Sa faaauau pea e lou toalua ana suesuega i le iunivesite ao tuputupu ae lo ma aiga. E oo atu i le taimi na ia ulufale ai i le galuega tumau, ua toalima le ma fanau. Sa ou faaauauina pea au aoga le tumau ina ia mafai ona ou tausia le ma fanau i le fale. Ou te vaai i tua i na muai tausaga ma le fiafia. O ni tausaga matagofie! Sa ma i ai i se falemautotogi laitiiti ma le fanau e toalua e i lalo ifo ma le 15 masina, ao ola ai i se alauni itiiti a tamaiti aoga ma tele le aai i fasipovi vili (hamupeka).

Ou te manatu i na tausaga amata o a matou tausaga faapaionia—sa matou sopoia ia “laufanua valevalenoa” o suesuega o aoaoga maualuluga, amataina o le ma aiga, ma ola ai i punaoa tautupe ua faatapulaaina. Ou te lagona le mea e tasi—ae ua na o se tikeri itiiti—i mea na tau mai e se tasi o e na faasaoina o le kamupani o taavaletoso a Matini i le latou faigamalaga: “Sa o mai uma lava i matou taitoatasi ma le malamalama mautinoa o loo soifua le Atua, aua ua matou masani ma Ia i o matou puapuaga.”¹

I vaaiga faalelalolagi, o mea na ma filifilia e fai i na uluai tausaga o le faaipoipoga e le talafeagai. O le tuu i tua o lou faauuga ina ia fai se fanau, o le ola ai i se totogi a le tagata e toatasi, ma le ositaulagaina o nisi mea mananaia atonu sa foliga e faavalevalea. Peitai sa fetalai le Alii ia Isaia:

“Aua o o’u manatu e le o outou manatu, o o’u ala e le o outou ala, ua fetalai mai ai le Alii.

“Aua e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu” (Isaia 55:8–9).

O le ositaulagaina o sini faalelalolagi ina ia mulimuli i le finagalo a le Tama Faalelagi mo lo ma aiga sa avea o se faamanuiaga faalotomaualaloina i o ma olaga.

Ua tatou faitau i le Mataupu Faavae ma Feagaiga faapea o i latou o e “loto e tausi a latou feagaiga e ala i le taulaga … e taliaina e [le Alii].

“Aua o Aʼu, o le Alii, o le a faia i latou ia fua mai e pei o se laau fua tele ua toto i se fanua lelei, i tafatafa o se vaitafe mamā, e fua mai ai ni fua pele e tele” (MF&F 97:8–9). O le ma fanau e toalima o ma fua faapelepele ia. O i latou o a ma faamanuiaga silisili e aunoa ma se masalosalo.

Ao faagasolo tausaga, sa ma feagai ma lou toalua ma le tele o luitau i le ma olaga faaipoipo, ma i le toe mafaufau i ai ua mafai ona ou fai atu ma le faamaoni ou te faafetai i ai. E faamanuia i tatou e le Alii i tofotofoga ina ia toe faaleleia i tatou o ni tagata taitoatasi ma fesoasoani ia tatou liliu atu ia te Ia ma o tatou soa.

O le faaipoipoga o le malumalu o le feagaiga sili lea ona maoae o le faaeaga. A tausia lenei feagaiga, o le a taitai atu i le tikeri e sili ona maualuga i le malo selesitila, po o le ola e faavavau, o lona uiga o le faavavau faateleina (tagai MF&F 131:1–4). Ona o lenei taui maoae, e tatau ona tatou faamoemoeina se faaipoipoga o le malumalu e faalautele i tatou, ia suia o tatou lava natura.

Sa saunoa Elder Bruce C. Hafen, o se sui Fitugafulu ua faamaloloina, faapea: “Atonu tatou te amata i le faaipoipo mo le toafimalie. Ona oo mai lea o faafitauli. Afai tatou te taumafai faamaoni e foia i latou, atonu tatou te le maua i taimi uma le toafimalie, ae o le a tatou tuputupu ae. Ona iu lea ina tatou faaipoipo e le ona o le toafimalie ae mo le olioli.”² O le foiaina faatasi o a maua faafitauli e le i toafimalie i taimi uma, ae ua aumaia moni le olioli ia i maua.

O le avea ai ma se tina o se taumafaiga sili ona faigata ua ou faia. Ao le i i ai ni fanau, sa ou manatu o le avea ai ma se tina o le a tele lava ina, pe afai e le o taimi uma, olioli—milo faatasi ma sina minute pe lua o le galue malosi. Ae ua ou malamalama nei o le isi auala. Ona o lou paaga e faavavau ma lou toalua, ua avea lou tulaga faalematua ma le faaipoipoga o se potu suesue mo le avea e faapei o le Tama Faalelagi. O le tiutetauave o le tulaga faalematua i lenei olaga e talitutusa i le galuega ma faamoemoega a lo tatou Tama Faalelagi, “ia aumaia le tino ola pea ma le ola faavavau o le tagata” (Mose 1:39). O le avea ma se ava ma se tina e manaomia ai le onosai faalelagi, malosi, ma le alofa. O le avea ai ma se tina ua fesoasoani ia te au ina ia avea atili e faapei o le Atua i le natura, manaoga, ma avanoa.

O le faamauina i le malumalu ua faamanuiaina ai au i auala ou te lei faamoemoeina. O se punavai o le malosi ia te au ma se tulaga mautu i lau fanau. O se sootaga maopoopo e oo atu i ou tuaa ma faamanuiaina ai i latou ao ou faia o latou galuega faalemalumalu. O lau faaipoipoga faalemalumalu e taua ai osigataulaga uma, ma ou te iloa e aumaia ai faamanuiaga maoae.