Mata e Faamalolo e le Alii le Ma Tama?

Ina ua fa tausaga o le ma tama, e masani lava ona ia fai mai ia te au e usu le pese “Matai e, Ua Sou le Vasa” (Viiga, nu. 58). E susulu ona mata laiti i le aluga o le tali ina ua poloaiina e le Alii le matagi ma galu ia filemu. E na te fesili mai ia te au e uiga i le mana o Iesu. Ou te tali atu e mafai e Iesu ona faia soo se mea i le amiotonu aua ua ia te Ia le mana uma. Sa avea le Faaola ma tagata toa a lo ma atalii.

Ae ina ua 13 tausaga le matua a le ma tama, sa amata ona ia lagona le atuatuvale tele. Sa le toe i ai sona manao e talanoa po o le oo lava i le ai. Sa ia le toe fiafia i ana gaoioiga sa i ai muamua, ma aemaise lava sa le i manao e auai i tatalo faaleaiga po o afiafi faaleaiga. Sa foliga mai ua le toe i ai sona fiafia i le ekalesia po o le talalelei.

Sa tatalo ma anapopogi lo matou aiga atoa mo ia, na faapena foi le toatele o tuagane ma uso mai la matou uarota ma siteki ma le toatele o a ma uo ma aiga. Sa pei lo matou taumafaiga o aafiaga a Alema le Matua i le tatalo ai mo lona atalii (tagai Mosaea 27:14, 22–23).

Sa ma le mananao e faamalosia i le ma tama le talalelei, o lea sa ma tau atu ai ia te ia e le manaomia ona ia auai i a matou tatalo faaleaiga po o afiafi faaleaiga, ae ma te mananao na te i ai faatasi iina ma i maua. Ao tatou mulimuli i afioga a le Faaola ina “ia tatalo atu e le aunoa i le Tama, i o outou aiga … ina ia … faamanuiaina a outou fanau” (3 Nifae 18:21), sa sili atu le mamana uma o a matou tatalo faaleaiga ma afiafi faaleaiga. Sa matou lagonaina le Agaga i lo matou aiga. Ma e ui ina sa leai se pisa a le ma tama, sa i ai o ia iina.

Sa faifaimalie lava i le lua tausaga na sosoo ai, sa matou vaaia o a matou tatalo ma afiafi faaleaiga sa i ai se uunaiga i lo ma atalii. Ao faia se tasi o afiafi faaleaiga, sa ia tuuina mai se molimau i le Faaola ma fesili mai pe mafai ona ia saunia se afiafi faaleaiga. Sa amata ona ia auai i tatalo faaleaiga ma auai ma le fiafia i le lotu. Sa ia aafia i se liuga tele o le loto na oo mai ao ia lagonaina le alofa togiola o le Faaola (tagai Alema 5:26). Sa laveaiina moni lava e le Alii, ma Lona mana faamalolo le ma tama.

Sa amata ona ia toe fiafia ma fiafia i le olaga, ma naunau e fesoasoani atu i isi ma faaalia le alofa. Sa ia tau mai ia te au na ia iloa sa faamalolo o ia e le Faaola. O tofotofoga a le ma tama na fesoasoani ia te ia e atiae se molimau mamana ma le faateleina o le alofa mo ma faamoemoe i le Faaola. Sa ia auauna atu i le Alii o se faifeautalai i le Misiona a Atenitina Buenos Aires i Saute. I le maea ai o lona toe foi mai, sa ia faaipoipo i le malumalu, ma ua ia te ia ma lona toalua se afafine matagofie.

Ou te iloa ua i ai i le Faaola se mana e faamalolo ai, e galueaiina ai vavega, ma faafiafiaina ai i tatou i lenei olaga ma i le olaga a sau.