Faanatinatiina o le Galuega

O e silafia e 98 tausaga o le Ekalesia toefuataiina ao lei atoa le 100 o ona siteki? Ae e i itiiti ifo ma le 30 tausaga mulimuli ane, ae faatulagaina e le Ekalesia ona siteki e 100 lona lua. Ma e na o le valu tausaga ua mavae talu mai lena taimi ae ua silia ma le 300 siteki a le Ekalesia. I le aso ua tatou maua le silia ma le 3,000 siteki malolosi.

Aisea ua tupu ai lenei tuputupu ae i se tulaga faavavevave? Pe ona ua sili atu lo tatou silafia? Pe ona o le aulelei o o tatou falelotu?

E taua nei mea, ae o le mafuaaga ua faatupulaia ai le Ekalesia i lenei vaitaimi ona sa faailoa mai e le Alii o le a [tupu]. I le Mataupu Faavae ma Feagaiga, ua Ia fetalai mai, “Faauta, o le a Ou faanatinatiina la’u galuega i lona taimi.¹

I le avea ai o i tatou ma fanau agaga a lo tatou Tama Faalelagi, ua auina mai i tatou i le lalolagi ina ia mafai ona tatou auai i le faanatinatiina o lenei galuega maoae.

E lei faailoa mai lava e le Alii, i lou malamalamaaga, faapea o Lana galuega e gata i le olaga faaletino. Nai lo lena, o Lana galuega e aofia ai le faavavau. Ou te talitonu o loo Ia faanatinatiina Lana galuega i le lalolagi o agaga. Ou te talitonu foi, o loo saunia e le Alii, e ala i Ana auauna iina, le toatele o agaga ia maua le talalelei. O la tatou galuega o le sailia lea o o tatou tagata ua maliliu ona o lea i le malumalu ma faia ia sauniga paia ma maua ai e i latou o i tua atu o le veli ia lava avanoa e tasi ua tatou mauaina.

Sa saunoa Peresitene Polika Iaga faapea, o Au Paia o Aso e Gata Ai lelei uma i le lalolagi o agaga o loo pisi (1801–77). “O a a latou mea o fai iina? O loo latou talai atu, o loo talai atu i taimi uma, ma saunia le ala mo i tatou ina ia faanatinati ai la tatou galuega o le fausiaina o malumalu iinei ma soo se nofoaga.”²

Ia, e le faigofie le galuega o talafaasolopito o aiga. Mo outou na mai Scandinavia, ou te lagonaina la outou faavaivai. Mo se faataitaiga, i lou itu Suetena, o le igoa o lou tamamatua o Nels Monson; e le o Monson le igoa o lona tama ae o Mons Okeson. O le igoa o le tama o Mons o Oke Pederson, ma o le igoa o lona tama o Peter Monson—toe foi ai ia Monson.

Ua faamoemoe mai le Alii ia te oe ma au ia faia ma le lelei a tatou galuega o talafaasolopito o aiga. Ou te manatu o le mea muamua e tatau ona tatou faia pe afai o le a tatou faatino ia lelei a tatou galuega o le i ai lea o le Agaga o le Tama Faalelagi e faatasi ma i tatou. Pe a tatou ola amiotonu e pei ona tatou iloa le auala e ola ai, o le a ia tatalaina le auala e faataunuu ai faamanuiaga lea tatou te naunau ma filiga e sailia.

O le a tatou faia ni mea sese, ae e leai se tasi o i tatou e mafai ona avea ma se polofesa i galuega o talafaasolopito o aiga e aunoa ma le avea muamua ma se tagata faatoa amata. O le mea lea, e tatau ai ona tatou filiga e faia lenei galuega, ma e tatau ona tatou saunia e fetaiai ma faigata ao faia. E le faigofie lenei galuega, ae ua tuuina atu e le Alii i ou luga, ma ua Ia tuuina mai i ou luga.

Ao e faatinoina le galuega o talafaasolopito o aiga, o le a e aafia ai i faigata, ma o le a e faapea ifo ia te oe lava, “E leai se isi mea e mafai ona ou faia.” Pe a e oo atu i lena tulaga, alu i lalo i ou tulivae ma ole atu i le Alii e saunia se vaifofo, ma o le a Ia tatalaina le auala mo oe. Ou te molimau atu i le moni o lenei mea.

E alofa le Tama Faalelagi i Lana fanau i le lalolagi o agaga e pei lava foi ona Ia alofa ia te oe ma au. Na saunoa mai le Perofeta o Iosefa Samita e faatatau i le galuega o le laveaiina o o tatou tagata ua maliliu faapea, “Ma lenei a o televave mai le faataunuuina o faamoemoega silisili o le Atua, ma faataunuuina mea o loo tautalagia i Perofeta, a o faatuina i le lalolagi le malo o le Atua, ma toefuataiina le faatulagaga anamua o mea, ua faaalia mai e le Alii ia i tatou lenei tiute ma le avanoa.”³

Na folafola mai e Peresitene Iosefa F. Samita (1838–1918) e faatatau i o tatou tuaa o e ua maliliu e aunoa ma se malamalamaaga o le talalelei e faapea, “E ala i a tatou taumafaiga mo i latou, o le a pauu ese mai ia i latou filifili o noanoataga, ma o le pogisa o loo siosiomia ai i latou o le a matafi ese, ina ia susulu mai le malamalama i o latou luga ma o le a latou faalogo ai i le lalolagi o agaga i le galuega ua faia mo i latou e a latou fanau o loo iinei, ma o le a latou olioli faatasi ma outou ona o lo outou faataunuuina o nei tiute.”⁴

E faitau miliona ma miliona fanau agaga a lo tatou Tama Faalelagi o e e le i faalogo lava i le suafa o Keriso ao lei maliliu ma o atu i le lalolagi o agaga. Ae ua aoaoina nei i latou i le talalelei ma o loo faatalitali mai i le aso o le a faia ai e oe ma au le sailiga e moomia e faamama ai le ala ina ia mafai ona tatou o i totonu o le fale o Ieova ma faataunuu le galuega mo i latou lea e le mafai e i latou lava ona faataunuuina.

Ou uso e ma tuafafine, ou te molimau atu o le a faamanuiaina i tatou e le Alii ao tatou taliaina ma tali atu i lenei luitau.