Panalangin ni Isa
Ang tagsulat nagpuyo sa Massachusetts, USA.
“Among balay gihatagan sa priesthood gipanalanginan” (Children’s Songbook, 190).
“Duna bay nakahasol nimo?” Nangutana si mama ni Isa samtang nagsakay sila sa tram [tren] pauli gikan sa simbahan.
Si Isa mitutok sa mga kanal nga nagtabok-tabok sa mga kadalanan sa Amsterdam. “Ang akong magtutudlo sa Primary miingon nga usa ka panalangin nga dunay priesthood sa inyong panimalay,” miingon si Isa. “Apan si Papa walay priesthood, mao nga dili kita mapanalanginan.”
“Makabaton gihapon kita sa priesthood sa atong panimalay, bisan kon ang imong papa dili miyembro sa Simbahan, miingon si Mama. “Adunay daghang takus nga mga tighupot sa priesthood sa ward kinsa makatabang nimo. Si Brother Van Leeuwen diay, ang atong home teacher?”
Si Isa ganahan ni Brother Van Leeuwen. Kanunay siya magdala og stroopwafels, ang paborito ni Isa nga biskwit, ug makig-istorya kaniya kabahin sa siyensya, ang iyang labing ganahan nga hilisgutan. Apan sa simbahan ang ubang mga bata misulti mahitungod sa ilang papa nga naghatag nila og mga panalangin sa priesthood kon sila masakit o mabalaka. Si Isa dili makapangayo og panalangin sa iyang papa.
“Gihigugma nako si Papa,” miingon Isa. “Apan ako nanghinaut nga siya dunay priesthood.”
Sa dihang miabut sila sa panimalay, si Papa didto sa kusina nagluto og panihapon. “Kumusta ang simbahan?” nangutana siya nila.
Si Isa wala motubag. Hinoon, midiretso siya sa iyang kwarto ug miligid sa higdaanan. Naghandom siya nga lahi unta og gamay ang ilang kahimtang.
Pagkasunod semana si Isa kinahanglan mokuha og eksamin sa eskwelahan. Ang matag bata sa Netherlands kinahanglang mokuha og eksamin kon mag-edad na sila og 12 anyos aron pagtino kon sila makaeskwela ba sa sunod tuig. Bisan tuod si Isa nagtuon pag-ayo ug andam na, gikulbaan siya pag-ayo. Sa gabii sa wala pa ang eksamin, misakit pag-ayo ang iyang tiyan. Dili siya makatulog. Samtang siya nag-alindasay sa higdaanan, iyang nahinumduman ang leksyon gikan sa Primary mahitungod sa pagpangayo og panalangin sa priesthood kon ikaw mahadlok. Bisan tuod ang iyang papa dili makahatag kaniya og panalangin, siya nasayud nga ang Langitnong Amahan motabang kaniya kon siya mangayo.
Mibangon si Isa ug miadto sa sala. Si mama nagtrabaho, apan si Papa naa sa sopa nagtan-aw sa TV.
“OK ka ba?” nangutana si Papa.
“Gikulbaan kaayo ko sa eksamin ugma,” miingon si Isa. “Sa imong hunahuna mahimo bang tawagan nato si Brother Van Leeuwen ug mohangyo niya sa paghatag nako og panalangin?”
“Tingali nindot kana nga ideya,” miingon si Papa. “Tawagan nako siya.”
Sa wala madugay si Brother Van Leeuwen ug iyang anak nga lalaki nga si Jaan miabut ug mihatag ni Isa og panalangin. Si Brother Van Leeuwen mihangyo sa Langitnong Amahan sa pagtabang ni Isa nga dili makulbaan sa eksamin ug sa pagtabang niya nga makatubag ra. Samtang si Brother Van Leeuwen mihatag ni Isa og panalangin, si Papa naglingkod sa sofa ug gikyugpos ang iyang mga bukton ug mipiyong sa iyang mga mata.
Human sa panalangin nindot ang gipamati ni Isa. Ang iyang tiyan wala na kaayo magsakit, ug gani siya katulgon og gamay. “Good luck ugma, miingon si Brother Van Leeuwen sa ilang pagbiya. “Naningkamot ka pag-ayo, ug ako nasayud nga ang Langitnong Amahan motabang nimo nga makatubag ra.”
“Mapasigarbuhon ako nimo sa pagbaton og hugot nga pagtuo, miingon si Papa ngadto ni Isa samtang siya mibalik sa higdaanan. “Bisan kon ako dili miyembro sa Simbahan, nalipay ako nga ikaw nagtuo sa Dios, ug ako nanghinaut nga ikaw masayud nga ako usab dunay pagtuo.”
“Salamat, Papa,” miingon si Isa, ug gihagkan siya sa iyang Papa sa aping.
Samtang siya nagbukot sa iyang habol, gibati ni Isa nga malipayon ug malinawon. Mapasalamaton siya nga dunay amahan nga nahigugma niya. Nalipay siya nga mituo nga ang iyang papa sa Langitnong Amahan ug ni Jesus. Ug siya nasayud nga ang priesthood makapanalangin niya ug sa iyang panimalay.