Kami Namulong kang Kristo
Ang Saad nga Kami Mag-uban sa Umaabut
Ang tagsulat nagpuyo sa Utah, USA.
Sa dihang ang akong bana nahiling nga adunay kanser, gibati nako nga ang amongkalibutan nagun-ob. Uban sa walo ka anak nga atimanon, unsaon man ni nako paghimo nga mag-inusara?
Usa kadto ka mapanganuron nga Dominggo sa buntag samtang nagbarug ko sa may lababo sa kusina aron humanon og hugas ang mga plato. Ang akong duha ka kinamanghurang anak nanan-aw og scripture video diha sa kwarto sa pamilya duol sa kusina. Nagsige ko og hunahuna, ug ang akong aping nabasa na sa mga luha. Dili nako malikayan ang paghunahuna sa kanser nga miatake sa among panimalay. Nanlimbasug na ang akong bana niini sulod sa daghang katuigan, apan migrabe ni karon. Napuno ko og “unsa kaha kon?” nga mga hunahuna.
Sa kalit ang scripture video nakabalda sa akong hunahuna uban sa mga pulong gikan sa kalma nga tingog: “Hilum, hunong. …
“Nganong nalisang man kamo? Wala ba kamoy pagsalig?” (Marcos 4:39–40).
Gibutang nako ang trapo ug mitan-aw sa TV. Ang video kabahin sa Manluluwas nga nagpakalma sa unos. Ingon og ang Manluluwas mismo misulti niini ngari kanako. Usa ka pagbati sa kainit ug kalinaw misanap kanako. Kadto usa ka pahinumdom nga magpadayon sa pagtuo nga akong nakat-unan og maayo atol sa katuigan nga may kanser. Kadto usa ka pagtuo nga gisuportahan sa mga pulong sa akong patriyarkal nga panalangin.
Akong nadawat ang akong patriyarkal nga panalangin sa dihang 15 anyos pa ko. Usa ka sentence didto nga kaniadto daw naghulagway lang og usa ka bahin sa akong kaminyoon diha sa templo karon may talagsaong saad para nako. Kini naghisgot sa matarung nga tighupot sa priesthood nga akong minyoan ug miingon nga siya “motabang kanimo, mogiya kanimo ug mosuporta kanimo, dili lang sa imong kabatan-onan apan hangtud sa ulahing bahin sa imong kinabuhi.”
Samtang balik-balik nakong gibasa ang akong patriyarkal nga panalangin atol sa katuigan sa pagpakigbatok sa kanser, kadto nga sentence naghatag kanako og dakong paglaum. Matag higayon, ako makakaplag og nabag-o nga pagtuo diha sa saad nga kami magkauban sa umaabut. Akong nahinumduman ang dakong paghupay sa Espiritu ngari kanako atol sa unang paghiling sa akong bana. Akong gimemorya kana nga bahin sa akong patriyarkal nga panalangin, ug sa dihang dili maayo ang resulta sa mga cancer test, akong hinumduman kadto nga saad.
Akong nakat-unan nga tugutan ang Manluluwas nga moagak kanamo, padayon nga lig-unon ang akong pagtuo, ug buntugon ang kahadlok gamit ang hugot nga pagtuo. Gipahinumduman ko sa video nianang buntaga nga mosalig sa Ginoo.
Ang pagbaton og hugot nga pagtuo nakahatag kanako sa abilidad nga isalig akong palas-anon kang Jesukristo. Sama sa mga tawo ni Alma nga naulipon dili mobati sa palas-anon sa ilang mga buko-buko (tan-awa sa Mosiah 24:14), mao usab kini sa among pamilya nga nakigbisog sa kanser. Ang among pamilya nakahimo sa pagsagubang sa kanser nga wala mabug-ati sa mga palas-anon niini.
Ang akong bana nagpadayon gihapon sa mga test aron monitoron ang mga cancer cell o sa pagpangita og posibleng mga tumor. Aduna gihapon mi balayrunon sa pagpatambal ug ang nagpabiling side effects sa pagpatambal. Ug nag-ampo gihapon ko kada adlaw nga mawala ang kanser sa akong bana. Nag-ampo ko nga kaming duha moabut og katigulangon. Mosulti usab ko ngadto sa Langitnong Amahan, “Ang Imong pagbuot maoy matuman.”
Wala ako masayud kon kanus-a mahitabo ang “ulahing bahin sa among kinabuhi” nga gihisgutan sa akong panalangin. Ako naglaum nga ang mga pulong sa akong panalangin nagpasabut nga ang akong bana ug ako makamisyon pa kon dagko na among mga anak. Ako nanghinaut nga kini nagpasabut nga ang akong bana mogiya sa among kabayo samtang nagpasakay sa among mga apo ug magpaugpot-ugpot sa among mga apo diha sa iyang tuhod. Apan nasayud ko nga kon kuhaon siya sa Dios dinhi sa yuta, kini sumala sa Iyang panahon.
Wala nako mabalaka kon kanus-a kadtong “ulahing bahin sa among kinabuhi”. Dili na kini mahinungdanon. Ako misalig nga ang Ginoo motuman niana nga saad ngari kanako diha sa akong patriyarkal nga panalangin. Iya kaming giatiman niining mga katuigan, ug Siya moatiman kanamo sa umaabut.