Ngano nga Atong Ipakigbahin ang Ebanghelyo

Kitang tanan gihangyo nga mahimong mga misyonaryo. Ug aron mahimong epektibo sa pagpakigbahin sa ebanghelyo ni Jesukristo, kinahanglan hunahunaon nato kanunay kining katuyoan, bation diha sa atong kasingkasing, dawaton kini diha sa atong kalag, ug buhaton kini. Kon ato kining buhaton, kini makapadasig ug makagiya kanato sa pagpakigbahin sa ebanghelyo. Kinahanglang klaro ang kalainan tali sa katuyoan sa pagpakigbahin sa ebanghelyo, sa usa ka bahin, ug ang paagi sa pagkab-ot nianang katuyoan, sa pikas bahin.

Dili atong katuyoan ang pag-apil lang sa mga diskusyon kabahin sa ebanghelyo o makig-istorya sa matag tawo kabahin sa Simbahan o sa paghimo lang og mga tumong ug plano. Kining mga butanga importante, apan kini mga pamaagi lang para matuman ang katuyoan, ug kana nga katuyoan mao ang pagpaduol sa mga tawo ngadto kang Kristo.

Ikonsiderar ang pipila ka mga ehemplo kon unsay mahitabo kon ang atong mga paningkamot sa pagpakigbahin sa ebanghelyo nakasentro sa misyonaryo nga katuyoan:

1. Kita motudlo sa mga tawo sa paagi nga makatabang kanila nga tinuorayng makasabut sa ebanghelyo ug kon ngano ug sa unsang paagi sila angay nga maghinulsol. Kita maminaw ug motubag sa unsay anaa sa hunahuna ug kasingkasing sa investigator.

2. Kita magtinguha ug maminaw sa Espiritu Santo aron makaila kon kinsa ang mibati sa Espiritu samtang kita nag-istorya.

3. Pagplano—isip mga pamilya, diha sa konseho sa ward, ug uban sa full-time nga mga misyonaryo—mahimong himan aron sa pagsiguro nga ang mga butang nga kinahanglang mahitabo aron makabig ug mabunyagan, sa pagkatinuod, maila, mahinumduman, ug masunod sa matag indibidwal nga investigator.

4. Maglipay kita sa atong oportunidad nga magbusog sa pulong sa Dios tungod kay ang atong pagtuon adunay katuyoan. Kita mangita og tubag sa kinasingkasing nga mga pangutana sa atong mga investigator ingon man usab sa atong kaugalingon.

5. Moimbitar kita sa mga tawo sa pagtambong sa mga miting sa Simbahan, dili lang kay nagtuo kita nga kini ang angay natong buhaton apan ato usab nga nasabtan nga ang pagsimba mahinungdanon aron ang investigator makaugmad og mas lig-ong tinguha nga mabunyagan ug maka-establisar og pundasyon nga makalahutay hangtud sa katapusan sumala sa pakigsaad sa ebanghelyo. Samtang maghunahuna nianang labing mahinungdanon nga katuyoan, ang imbitasyon sa pagsimba mas gikinahanglan, adunay kalainan sa pagpasabut sa kaimportante sa pagsimba panahon sa Igpapahulay ug unsa ang gipaabut sa tulumanon sa Dominggo sa Usa ka Santos sa Ulahing mga Adlaw, ug ang espiritu nga modasig sa atong pinulongan adunay makapadani nga gahum nga dili unta mabati kon wala kini.

Palihug ayaw ibaliwala ang kapitulo 1 sa Isangyaw ang Akong Ebanghelyo ug ang pangutana niini “Unsa may akong katuyoan isip usa ka misyonaryo?” Kat-uni ang katuyoan sa pagpaduol sa mga tawo ngadto kang Kristo pinaagi sa mga baruganan ug mga ordinansa sa gipahiuli nga ebanghelyo, ug inyong masabtan nga ang pagpakigbahin sa ebanghelyo dili usa ka programa; kini ang tumong—tumong sa Amahan, sa Anak ug, sa Espiritu Santo. Kat-uni ang katuyoan sa pag-imbitar sa mga tawo sa pagduol ngadto kang Kristo, ug inyong masabtan nga ang kalibutan walay access sa maulaong grasya ug kaluwasan kon dili pinaagi lang sa Simbahan ni Jesukristo sa mga Santos sa Ulahing mga Adlaw. Inyong masabtan kon unsa gyud ang pagpakigbahin sa ebanghelyo, ug kamo maanaa ug magbuhat sa buluhaton sa Amahan. Inyong masabtan nga ang full-time nga mga misyonaryo, sama sa gibuhat sa mga anak ni Mosiah, motudlo “uban sa gahum ug pagtugot sa Dios” (Alma 17:3), ug kamo modapit kanila sa pagtudlo sa ebanghelyo ngadto niadtong inyong giimbitar nga “umari ug [tan-awa]” (Juan 1:39).

Para nako, ang katuyoan sa misyonaryo nakakuha sa kahalangdon sa buhat ug himaya sa Dios (tan-awa sa Moises 1:39). Unsa nga paningkamot nga mas halangdon pa kay sa pagdala sa mga anak sa Dios ngadto sa katapusan nga kaluwasan pinaagi sa grasya sa ilang Manunubos, sa Ginoong Jesukristo? Hinumdumi nga ang atong misyonaryo nga katuyoan dili lang sa pagpasidaan sa uban apan sa pagluwas usab kanila, dili lang sa pagtudlo apan sa pagbunyag usab, dili lang sa pagpaduol sa uban ngadto kang Kristo apan sa paghimo usab nila nga makanunayon diha kang Kristo hangtud sa katapusan.

Ang atong imbitasyon sa kalibutan mao ang pagduol ngadto kang Kristo. Ang pagduol ngadto kang Kristo usa ka minubo, usa ka paagi sa paghulagway sa upat ka pulong sa plano sa kaluwasan. Kini nagpasabut sa pag-angkon sa mga bunga sa Iyang Pag-ula ug Pagkabanhaw—sa katapusan kinabuhing dayon. Ang kinabuhing dayon nag-agad sa paggamit sa atong moral nga kabubut-on, apan posible lang pinaagi sa grasya ni Jesukristo. Ang pagduol ngadto Kaniya nagpasabut sa pagbuhat unsay gikinahanglan nga mosalig nianang grasya—mapasayloon, makapabalaan, makapausab, matubsanon nga gahum sa Iyang walay kinutuban, maulaon nga sakripisyo.

Kining maayong balita, ang ebanghelyo, maayo kaayong pagpahayag ni Jesus Mismo diha sa Basahon ni Mormon:

“Tan-awa ako mihatag nganha kaninyo sa akong ebanghelyo, ug kini mao ang ebanghelyo diin Ako mihatag nganha kaninyo—nga Ako mianhi dinhi sa kalibutan aron sa pagbuhat sa kabubut-on sa akong Amahan, tungod kay ang akong Amahan mipadala kanako.

“Ug ang akong Amahan mipadala kanako nga Ako unta ituboy nganha sa krus; ug human niana nga Ako matuboy diha sa krus, nga Ako unta makadala sa tanan nga mga tawo ngari kanako, nga ingon nga Ako gituboy sa mga tawo mao usab ang mga tawo ituboy pinaagi sa Amahan, sa pagbarug sa akong atubangan, aron pagahukman sa ilang mga buhat, kon sila matarung o kon sila dautan—

“Ug tungod niini nga hinungdan Ako natuboy; busa, sumala sa gahum sa Amahan Ako modala sa tanan nga mga tawo ngari kanako, nga sila mahukman sumala sa ilang mga buhat” (3 Nephi 27:13–15).

Busa, ang pinakasukaranan niini, ang ebanghelyo, o ang maayong balita, mao nga kita adunay Amahan sa Langit kinsa, tungod sa Iyang gugma kanato, mipadala sa Iyang Bugtong Anak aron motubos kanato gikan sa sala ug kamatayon. Ang Anak, sa hingpit nga pagkamasulundon ngadto sa Amahan, kang kinsa Siya naghatag sa himaya, mihalad sa Iyang kinabuhi tungod niini. Iya kitang gitubos gamit ang Iyang dugo, ug kita manubag Kaniya sa atong kinabuhi (tan-awa sa 1 Mga Taga-Corinto 6:19–20). Karon Siya ang atong Maghuhukom. Siya ang buhing panig-ingnan sa hustisya.

Ang ikalipay nga mga balita sa mensahe sa ebanghelyo nagdugang sa pagdeklarar nga tungod sa Iyang maulaon nga sakripisyo, si Jesus mao usab ang buhing panig-ingnan sa kalooy. Ang Iyang kalooy, maayo nga buhat, ug grasya igo gayud aron mopasaylo ug molimpyo kanato aron sa Adlaw sa Paghukom kita mobarug nga balaan ug walay lama sa Iyang atubangan. (Tan-awa sa 2 Nephi 2:8; Moroni 10:32–33.)

Ang misyonaryo nga katuyoan diha sa Isangyaw ang Akong Ebanghelyo nagpasabut kon unsay angay buhaton aron kini matuman. Sama sa gipahayag niini, ang mapasaylo ug malimpyohan nagkinahanglan og “hugot nga pagtuo kang Jesukristo ug sa Iyang Pag-ula, paghinulsol, pagpabunyag, pagdawat sa gasa sa Espiritu Santo, ug paglahutay hangtud sa katapusan.”²

Dugang pa sa 3 Nephi 27, ang Manluluwas mitapos sa Iyang pahayag kon unsay naglangkob sa Iyang ebanghelyo:

“Ug kini mahinabo, nga bisan kinsa ang maghinulsol ug magpabunyag pinaagi sa akong ngalan, siya mapuno [sa Espiritu Santo]; ug kon siya molahutay hangtud sa katapusan, tan-awa, Ako mohukom kaniya nga walay sala sa atubangan sa akong Amahan niana nga adlaw sa diha nga Ako mobarug aron paghukom sa kalibutan. …

“Ug walay mahugaw nga butang nga makasulod didto sa iyang gingharian; busa walay makasulod sa iyang kapahulayan gawas niadto kinsa nakahugas sa ilang mga saput sa akong dugo, tungod sa ilang hugot nga pagtuo, ug paghinulsol sa tanan nila nga mga sala, ug sa ilang pagkamatinud-anon hangtud sa katapusan.

“Karon mao kini ang sugo: Paghinulsol, kamong tanan nga mga lumulupyo sa yuta, ug duol ngari kanako ug magpabunyag diha sa akong ngalan, aron kamo mahimo nga pagasantoson pinaagi sa pagdawat sa Espiritu Santo, aron mobarug nga walay lama sa akong atubangan sa katapusan nga adlaw.

“Sa pagkatinuod, sa pagkatinuod, ako moingon nganha kaninyo, kini mao ang akong ebanghelyo” (3 Nephi 27:16, 19–21).

Samtang kita mopakigbahin sa pagpamatuod sa ebanghelyo pinaagi sa Espiritu, kadtong andam nga maminaw makadawat og igong pagsaksi aron makabaton og hugot nga pagtuo ni Jesukristo ug sa Iyang Pag-ula. Kana nga hugot nga pagtuo makahatag nila og determinasyon nga maghinulsol. Ang mga miyembro ug full-time nga mga misyonaryo, pinaagi usab sa Espiritu, makatudlo nila sa mga kausaban nga ilang kinahanglang buhaton ug sa pagdapit ug pagpasalig nila sa pagbuhat niini. Ang katapusang pasalig nga atong dapiton sa investigator nga dawaton ug buhaton mao ang pagpabunyag. Kini nga bunyag pagasundan, o mas maayong pagkasulti, makompleto pinaagi, sa pagdawat sa Espiritu Santo, nga makapasaylo sa mga sala ug ingon man pagkabalaan (tan-awa sa 2 Nephi 31:17).

Kini nga kahimtang nga magbarug nga mahatagan og katarungan ug walay lama sa atubangan sa Ginoo mapreserbar sa tibuok kinabuhi kon ang tawo magpadayon nga magkinabuhi nga may hugot nga pagtuo, maghinulsol kon gikinahanglan ug madasig pag-usab sa mga saad sa bunyag. Ato kining gitawag og paglahutay hangtud sa katapusan. Kadtong molahutay hangtud sa katapusan dili mahadlok nga pagahukman sumala sa ilang mga buhat, kay sila nagbuhat nga may hugot nga pagtuo ug paghinulsol ug bunyag sa tubig ug sa Espiritu.

Ang pamahayag ni Hyrum Smith nga natala sa Isangyaw ang Akong Ebanghelyo mahinungdanon kaayo: “Isangyaw ang unang mga baruganan sa Ebanghelyo—balik-balika kini pagsangyaw: imong makita nga sa matag adlaw bag-o nga mga ideya ug dugang nga lamdag mahitungod niini ipadayag diha kanimo. Mahimo nimong pausbawon ang imong panabut niini ug mamahimo silang mas klaro alang kanimo. Ikaw makahimo dayon sa pagpasabut niini sa mas sayon nga paagi ngadto niadtong [inyong] gitudloan.”³

Niini nga pamahayag, si Hyrum Smith, ang Patriyarka, nagpasabut nga kining unang mga baruganan, ang sentro sa ebanghelyo, dili hingpit nga masabtan sa usa lang ka pagbasa. Dugang kahayag ug lalum nga pagsabut moabut paglabay sa panahon sa daghang mga kasinatian sa pagpadayag.

Samtang ang mga miyembro mopamatuod ug mohangyo sa full-time nga mga misyonaryo sa pagtabang nila sa pagtudlo sa ebanghelyo, hinumdumi nga ang nagtubo nga pagsabut sa ebanghelyo dili lang moabut gikan sa pagtuon apan samtang kita moapil sa pagpakigbahin sa ebanghelyo. Kon kita magtuon, mag-andam, ug mopakigbahin sa mga baruganan sa ebanghelyo pinaagi sa Espiritu, kita “makahimo dayon sa pagpasabut niini sa mas sayon nga paagi” ug ang Espiritu motudlo ug mopamatuod sa tanan nga naminaw—mga miyembro, misyonaryo, ug investigator.

Ang ngano, unsa, ug sa unsa nga paagi sa misyonaryo nga buhat mas madasigong gipahayag diha sa Basahon ni Mormon kay sa bisan asa. Kini napuno sa mga ehemplo niadtong nakasabut ug naghago nga matuman ang misyonaryo nga katuyoan. Kini naglangkob sa pinakaklarong mga pagpasabut sa sukaranang mga doktrina diha sa kasulatan nga atong itudlo. Kini mopabati sa diwa sa pagkakabig ug saksi sa katinuod niining sama nga mga doktrina. Kini mokabig sa tanang kinasingkasing ug may tinuod nga katuyoan nga mobasa ug mag-ampo niini (tan-awa sa Moroni 10:3–5).

Ang Basahon ni Mormon nag-establisar sa tinuod nga kinaiya ni Jesukristo sa Iyang pagka-Anak sa Dios ug sa Pagkabalaan nga Mesiyas. Nagdasig kini og hugot nga pagtuo diha Kaniya. Nagdala kini sa mga tawo ngadto ni Kristo. Kita mahangturong may utang kabubut-on sa mga tigsulat niini ug ni Propeta Joseph Smith sa paghubad niini pinaagi sa gasa ug gahum sa Dios.

Ako mopamatuod nga, ingon ang Ginoo buhi, ang Basahon ni Mormon tinuod. Ang pagpamatuod niini kabahin ni Jesukristo tinuod. Ang tighubad, si Joseph Smith, mao ang talagsaong Propeta sa Pagpahiuli. Pagkat-on gikan sa Basahon ni Mormon, tun-i kini, pagtudlo gikan niini, higugmaa kini, ug sunda kini, ug inyong makat-unan nganong atong ipakigbahin ang ebanghelyo ug atong pribilehiyo ug katungdanan sa pagdapit ug pagtabang sa uban sa pagduol ngadto kang Kristo.