Bag-ong mga Lider sa Area Gi-assign

Ang Unang Kapangulohan mipahibalo sa mga kausaban sa mga assignment sa pagpangulo sa area, nga magsugod sa Agosto 1, 2014. Ang tanang mga sakop sa mga Area Presidency mga sakop sa Una o Ikaduha nga Korum sa Seventy.

Ang Seventy gitawag pinaagi sa pagpadayag, ubos sa direksyon sa Unang Kapangulohan, aron sa pagtabang sa Korum sa Napulog Duha ka mga Apostoles sa ilang pagpangalagad sa tibuok kalibutan.

“Ang kasaysayan sa mga Seventy masubay gayud balik sa Daang Tugon,” miingon si Presidente Boyd K. Packer sa Korum sa Napulog Duha ka mga Apostoles.¹ Ang unang pakisayran kalabut sa Seventy makita sa Exodo 24:1, ug sila sa kaulahian gipasabut sa Numeros 11:16–17, 25, dihang sila nagpundok aron sa pagtabang ni Moises.

Atol sa mortal nga pangalagad ni Kristo, Siya mitawag og Seventy, mitudlo kanila sa paagi nga susama sa Napulog Duha ka mga Apostoles, ug mipadala kanila sa “pag-una kaniya,” mipasabut nga kadtong kinsa nakadungog sa ilang mga tingog makadungog sa Iyang tingog (tan-awa sa Mateo 10:1, 16–17; Lucas 10).

“Kami [Kita] nagtuo sa sama nga kapunongan nga diha sa karaan nga Simbahan,” miingon si Presidente Packer. “Ug kini naglakip sa mga Seventy.” (Tan-awa sa Mga Artikulo sa Hugot nga Pagtuo 1:6.) Sa karong paspas nga nagtubo nga Simbahan, ang Seventy adunay importante nga tahas sa pagtabang sa Napulog Duha. “Ang mga Seventy pinaagi sa pagdelegar makabuhat og bisan unsa nga isugo sa Napulog Duha nga ilang buhaton,” miingon si Presidente Packer.²