Ang Mga Malipayong Panumduman
Gina Sconiers, Utah, USA
Mga paghulagway pinaagi ni Bradley Clark
Tungod sa karaang tubo sa tubig ug dili maayo nga pundasyon, ang balay nga akong nadak-an bahaon kon adunay kusog nga ulan. Tungod ang mga unos sa Virginia, USA, molungtad og daghang oras, ang tubig mosulod kanunay.
Nagpuyo mi niana nga balay sa mga tuig nga nagdako ko, busa naghunahuna ko nga ang pagbaha normal.
Human sa pipila ka unos, among gipalambo ang among mga taktika batok sa baha ug nakakat-on nga magtinabangay. Ang unos kanunay moigo sa tunga-tungang gabii, ug pukawon ming tanan sa among ginikanan aron magbantay sa dapit asa mi na-assign kon ang tubig hinay-hinay nga mosulod sa basement sama sa lava. Hakuton sa akong igsoong lalaki ug ni papa gamit og baldi ang tubig nga mosulod sa may hagdanan samtang ang akong igsoong babaye ug ako daling-daling mopatuhop sa tubig gamit ang mga tualya aron maproteksyunan ang karpet.
Kami mag-agik-gik samtang kami maglukso-lukso ug mosayaw niadtong mga tualya, mibati sa kahumok sa kabasa tunga-tunga sa among tiil ug sa among bitiis. Paspas nga pug-an ni mama ang nabasa nga mga tualya, ibutang kini sa dryer, ug magdala og bag-ong nauga nga tualya para matuhupan. Kon kami kontento na nga ok na ang balay, kami moadto sa kusina para magpauga ug moinom og init nga cocoa ug mokaon og cookies tungod sa among mga paningkamot. Dayon, kon dili pa oras sa ting-eskwela, matulog mi og balik.
Kining mga baha nakapabalaka siguro og maayo sa akong ginikanan, apan ako kining hinumduman isip pipila sa pinakamalipayong panahon sa akong pagkabata, gani bisan aduna pay kusog nga dugdog ug kilat. Sa pagkatinuod, ang kahumot sa basa nga karpet makapamingaw nako sa panahon sa pamilya.
Ang akong mga ginikanan mahimong sila-sila ra ang modumala sa baha, apan nalipay kaayo ko nga kaming tanan ilang giapil sa pagprotekta sa among panimalay. Ang pagdumala sa baha usa ka malipayong hitabo tungod kay kami nagkahiusa ug nagbuhat sa among bahin.
Karon nga dako nako, maghinumdom ko niadtong mga panahona ug maghunahuna kon unsaon nako pagmugna og samang kalipay sa pagtinabangay sa akong mga anak. Bisan tuod mapasalamaton nga ang among balay dili bahaon, nasayud ko nga adunay butang nga dili namo gusto hinay-hinay nga moatake sa among pamilya.
Bisan unsang problemaha ang sagubangon sa akong pamilya sa umaabut, manghinaut ko nga kami magkahiusa ug magtinabangay sa pagpanalipod sa among mga mithi, among hugot nga pagtuo, ug sa usag usa. Dayon tingali, bisan sa kalisdanan, kami mokatawa, mopahiyom, ug malipay samtang magtinabangay sa pagbuhat.