Gikan sa Misyon
Usa Ka Milagro sa Airport
Ang tagsulat nagpuyo sa Utah, USA.
Usa ka gamay nga aghat makausab sa kinabuhi ngadto sa mas maayo.
Mga paghulagway pinaagi ni David Malan
Isip bag-ong misyonaryo sa Japan, naglisud ko sa pagsabut ni bisan kinsa, maong imposible nga makaila nila. Lisud ang pagkat-on sa paghigugma sa mga tawo nga wala gani nako mailhi, ilabi na kon ako dili makasabut unsay ilang gisulti. Apan naningkamot ko sa pagpakita og gugma alang kanila, ug nagpasalamat ko sa ilang mga paningkamot sa pagtabang nako.
Matag semana, ang akong kompanyon ug ako nakadawat og usa ka piraso nga pan gikan sa usa ka sister sa ward nga ginganlan og Sister Senba. Siya mipakita sa iyang gugma sa mga misyonaryo pinaagi sa pagluto og pan ug pagsulat og gamay apan kinasingkasing nga mga sulat.
Natandog ko nga usa ka tawo naghunahuna nako. Nadasig ako pagpakita sa akong pasalamat ngadto niya sa yanong mga paagi. Misulat ko niya og mubo nga sulat nga nagpahayag nga mapasalamaton kaayo ko alang kaniya ug sa mga sakripisyo nga gibuhat niya ug sa iyang pamilya sa pagtabang sa mga misyonaryo. Nagkahigalaay kami, ug ako nagsugod sa paghunahuna kaniya isip akong “inahan nga layo sa panimalay.”
Milabay ang mga bulan. Sayo sa buntag sa Miyerkules gitawagan ko sa akong presidente sa misyon, kinsa miingon nga mabalhin ko ngadto sa Okinawa. Sa dihang akong gibutang ang telepono, napuno ko sa kalipay ug kasubo. Ako nagduha-duha sa pagpanamilit. Ang matag tawag sa telepono aron sa pagsulti sa mga miyembro sa ward nga ako mobiya sa sunod nga adlaw nakapasakit nako. Ang pagpanamilit sa mga tawo nga akong nakat-unan sa paghigugma lisud kaayo kaysa akong gihunahuna.
Sa akong pagkahuman sa mga tawag, akong namatikdan nga ang bugtong wala motubag sa telepono mao si Sister Senba. Naguol ko nga dili na makapanamilit sa usa ka miyembro nga nahimong suod sa akong kasingkasing.
Pagkasunod buntag ang laing duha ka mga misyonaryo ug ako miadto sa airport. Sa dihang miabut mi sa tiket counter ug misulay sa pagpalit og mga tiket, ang mga trabahante misulti namo nga among kard gibalibaran. Kami walay kwarta nga ibayad sa mga tiket, ug ang eroplano mobiya na sa 10 minutos! Kaming tulo gipangkuyawan. Mabiyaan na kami sa eroplano ug matanggong sa airport.
Apan ang tanan nakong kakuyaw nahimong kahupayan sa dihang milingi ko ug nakita si Sister Senba nga misulod sa airport. Nasurprisa ko nga miabut siya kay siya wala masayud unsang orasa ang among biyahe. Samtang siya nagpaingon namo, mipahiyom siya ug mihatag namo tanan sa pan nga among dad-on sa pagbiyahe.
Samtang kami mipasabut kaniya nga mabiyaan mi sa eroplano, naguol siya. Walay usa namo nga nasayud unsay buhaton. Dayon si Sister Senba misugod sa pagtan-aw sa iyang pitaka, nangita og butang nga makatabang namo. Siya malipayong naglukso-lukso sa dihang nakakita siya og gagmay nga sobre sa iyang pitaka diin, mga semana ang milabay, siya mibutang og ¥ 50,000 ka—ang eksaktong kantidad sa kwarta nga among gikinahanglan. Siya mihatag namo sa kwarta, ug kami nakapalit og mga tiket. Nagpasalamat kaayo kami niya, nanamilit, ug nagdali-dali padulong sa eroplano.
Human makalupad ang eroplano, ang akong kauban nga misyonaryo milingi nako ug miingon, “dili ba siya talagsaon?! Kadto usa ka milagro!”
Dayon ako nakaamgo nga usa kadto ka milagro. Dayon siya miingon, “Unsay gisulti sa imong sulat?” Akong nakita nga nagbasa siya og mubo nga sulat nga kauban sa pan nga gihatag ni Sister Senba kaniya. Samtang akong naamguhan nga ako usab dunay sulat, akong gikuha ang mubo nga sulat ug gibasa ang gamay nga piraso sa papel nga personal nga gitumong ngari nako, nga diha-diha nakapahilak nako. Kini nag-iingon, “Gihigugma ko ikaw! Palihug ayaw ako kalimti! Dili ko gayud ikaw kalimtan!”
Nianang higayona akong gibati ang Espiritu nga mas kusog kay sa akong gibati kaniadto. Ang ehemplo ni Sister Senba nagtudlo nako kon unsa ka importante ang pagsunod sa mga aghat sa Espiritu—dili igsapayan kon unsa ka gamay o ka lahi ang aghat. Pinaagi niini nga mga pag-aghat kita dunay gahum sa pag-usab sa kinabuhi alang sa mas maayo. Nasayud ko nga dili kadto sulagma lang nga siya miabut sa airport. Kadto usa ka milagro.
Sa tinuod ang Ginoo naggamit sa gagmay nga mga paagi sa pagpahinabo sa Iyang buhat. Pagkabulahan nato isip mga miyembro niini nga simbahan sa pagbaton sa Iyang impluwensya sa atong mga kinabuhi. Magpabilin kitang tanan nga takus sa pagdawat sa mga aghat ug sa pagpanalangin sa kinabuhi sa mga anak sa Dios.