Buntuga ang Gravity Padayon sa Unahan uban sa Hugot nga Pagtuo

Imahe

girl on bike on a trail

Paghulagway pinaagi ni Julia Yellow

Akong nadawat ang akong unang duhay ligid nga bisikleta sa dihang otso anyos ko. Uban sa tabang sa akong magulang nga lalaki ug amahan, nagsugod ko sa makahadlok nga proseo unsaon sa pagmaneho niini. Ang ubang mga bata sa kasilinganan sayon kaayong nakapadagan og kusog padulhog ug patangas sa ilang mga bisikleta. Milingkod ko sa lingkuranan—nga ingon og dili mominos 10 ka pye (3 ka metros) ibabaw sa yuta—ug nakaamgo nga wala gyuy makapugong nako sa pagkatumba ug mapamatud-an nga ang balaod sa gravity tinuod gyud.

Samtang ako naningkamot sa pagpadagan, akong nakat-unan nga kon gusto ko nga magpabiling balanse, kinahanglang magpadayon ko sa pagsikad. Sa dihang una kong milingkod sa lingkuranan, ang pagpakusog mao ang katapusang butang nga dili nako gusto nga masinati. Apan dali nakong nasabtan ang kaalam ug ang kalabutan sa physics sa pagpadayon. Samtang magpadayon ko pagsikad, ako magpabiling dili matumba ug makalikay sa sagalsalon nga semento nga makapangos sa akong mga bukton ug tiil. Sa wala madugay ako nagpahagiyos na kuyog sa akong mga higala sa kasilinganan.

Mao usab ang pagsunod sa ebanghelyo ug sa mga sumbanan sa Alang sa Kalig-on sa Kabatan-onan. Nagkinahanglan kini og hugot nga pagtuo nga kon kanunay kitang mosunod sa tambag sa Unang Kapangulohan sumala sa gilatid sa booklet, ang atong kinabuhi mabalanse ug makanunayon. Kita magiyahan kon asa kita gustong moadto.

Kita kinahanglan nga magpadayon sa unahan aron makalikay nga matumba. Sa pagbuhat niana, kita kinahanglan makanunayon ug matinud-anong mobuhat og piho nga mga lihok:

• Mag-ampo buntag ug gabii.

• Magtuon sa mga kasulatan kada adlaw.

• Motambong sa miting sa Simbahan ug moambit sa sakrament sa takus nga paagi.

• Moserbisyo niadtong naglibut kanato.

• Magpakatakus nga mosulod sa templo.

Kining tanang mga aksyon makapadayon nato sa unahan sa saktong direksyon.

Mao kana nganong ang pagbasa ug pagsinati sa mga sumbanan nga gihulagway sa Alang sa Kalig-on sa Kabatan-onan makatabang sa pagsiguro nga naghimo kita og mga pagpili nga nahiuyon sa mga sumbanan sa Dios. Ang pagsunod niini nga mga baruganan ug pagsunod sa mga sugo modapit sa Espiritu Santo nga mahimo natong kompanyon sa kanunay. Sama niadtong kinsa nagpadayon sa pagsikad sa bisikleta nga magpabiling dili matumba bisan pa sa impluwensya sa gravity, kadtong kinsa gigiyahan sa Espiritu Santo sa tanan nilang gibuhat makasugakod sa impluwensya sa kaaway.

Unsa man ang mga gusto ninyong destinasyon samtang kamo padayong nagsikad? Alang sa tanang batan-ong mga lalaki sa Aaronic Priesthood, ang pag-andam karon alang sa full-time nga misyon importante sa padayon nga pagtubo. Alang sa tanang kabatan-onan, ang pag-andam sa pag-adto sa templo ug modawat sa endowment pinaagi sa paghimo ug pagtuman sa sagradong mga pakigsaad kinahanglan usab nga mao ang importanting tumong.

Sama sa gisulti sa mensahe gikan sa Unang Kapangulohan sa sinugdanan sa Alang sa Kalig-on sa Kabatan-onan: “Sa tanan ninyong buhaton pagpabiling nakatumong sa templo. Diha sa templo inyong madawat ang labing mahinungdanon sa tanang mga panalangin sa Ginoo, lakip na ang kaminyoon alang sa karon ug sa tibuok kahangturan.”¹ Ang pagdawat sa pakigsaad sa mahangturong kaminyoon diha sa balay sa Ginoo ug sa pagkahimong matarung nga mga bana, asawa, mga amahan, ug mga inahan tingali ingon og layo pa kaayo, apan ang panahon nga mosugod sa pagpangandam mao karon. Kining tanang butang mosangpot sa labing mahimayaon ug maanindot nga destinasyon sa tanan—kinabuhing dayon uban sa atong Langitnong Amahan.

Usa sa akong paborito nga kasulatan mitingub sa unsay atong gikinahanglan aron magpadayon ngadto sa atong mga tumong: “Busa, kamo kinahanglan gayud mopadayon sa unahan uban ang pagkamakanunayon kang Kristo, magbaton og hingpit nga kahayag sa paglaum, ug usa ka gugma sa Dios ug sa tanan nga mga tawo. Busa, kon kamo mopadayon sa unahan, magbusog sa pulong ni Kristo, ug molahutay hangtud sa katapusan, tan-awa, sa ingon miingon ang Amahan: Kamo makabaton og kinabuhi nga dayon” (2 Nephi 31:20).

Sama sa akong nakat-unan isip usa ka otso-anyos nga batang babaye nga ako kinahanglang magpadayon sa pagsikad aron sa pagbuntog sa gravity ug magpadayon nga balanse sa akong bisikleta, importante alang natong tanan sa pagpadayon sa unahan uban sa hugot nga pagtuo, pagsalig sa tambag sa buhing mga propeta ug sa usa ka mahigugmaong Langitnong Amahan aron dili kita matumba. Ang pipila sa atong destinasyon anaa sa unahan samtang ang uban magkinahanglan og tibuok kinabuhi sa matinud-anong pagsunod aron makab-ot. Ang mga saad kon unsay anaa sa katapusan sa dalan, kon kita matinud-anon, sigurado ug mahimayaon ug takus sa pagbiyahe.