Mga Pangutana ug mga Tubag
“Ang akong mama nagtrabaho sa tibuok adlaw. Unsaon nako sa pagpalambo sa among relasyon?”
Tungod kay dili nimo makita ang imong mama kanunay, siguroa nga sa higayon nga kamo magkita nindot ang inyong panag-uban. Mahimo nimong istoryahan ang imong mama unsaon kini sa paghimo. Siya usab gusto og nindot nga relasyon uban nimo ug motabang nimo sa pagbuhat niini. Sulayi ang pagpangutana niya: kon malipay ba siya nga mouli sa limpyo nga balay? Magdungan sa paghimo sa kalihokan? Mag-istoryahay uban nimo? Kon pirmihon nimo ang pagbuhat og mga kalihokan nga ganahan sa imong mama, ang inyong relasyon molambo.
Dayag lang, ikaw makaplano og makalingaw nga mga kalihokan nga buhaton ninyong duha, apan ang bisan unsa nga makahuluganon nga panahon sa panag-uban—sama sa paghugas sa mga plato o pagbasa sa mga kasulatan—mahimong usa ka maanindot nga paagi sa pagpalambo sa inyong relasyon.
Pagplano usab sa pagpakig-istoryahanay. Ang pagsabut sa usag usa mao ang mahinungdanon nga elemento sa maayong mga relasyon. Usa sa mga butang nga hisgutan mao kon sa unsa nga paagi ang iskedyul sa trabaho sa imong mama makaapekto sa imong relasyon uban kaniya. Malikayan ang dili pagsinabtanay kon ikaw mosulti sa imong gipaabut ug ingon man usab sa gipaabut sa imong mama.
Ang pag-ampo makatabang. Ang mga pamilya importante ngadto sa Langitnong Amahan, mao nga Siya makadasig nimo nga masayud unsaon sa pagpalambo sa imong relasyon uban sa imong mama. Ayaw ibaliwala ang usa ka aghat sa pagbuhat og usa ka butang nga ingon og gamay ra (tan-awa sa Alma 37:6). Ang gakos ug pahiyom, pananglit, makahimo og dako nga kalainan.
Pagsulat og Mubo nga Sulat
Bisan kon kamo gamay ra og panahon, ikaw makahimo gihapon sa pagsulti sa imong gugma sa imong inahan. Pagsulat og manggihunahunaon, sekreto nga mga sulat. Kon makabasa siya didto sa trabahoan, siya maghunahuna kanimo. Buhata ang tanan alang kaniya. Paghunahuna niya pirme ug pag-ampo alang niya. Hangyoa ang Ginoo sa pagdasig nimo ug pag-aghat nimo kabahin kon unsaon nimo pagpalambo sa inyong relasyon.
Irinka E., edad 20, Odessa, Ukraine
Paningkamot sa Pagsabut Kaniya
Paningkamot sa pagsabut sa iyang sitwasyon, tungod kay siya nagtrabaho alang sa imong kaayohan. Makasugod ka pinaagi sa pagtabang sa mga butang sa panimalay, sama sa pagpanglimpyo sa balay, pagtabang sa imong mga igsoon, ug pagluto. Ikaw usab mahimong mopakigbahin og mga kasulatan uban sa imong mama, pagdungan sa pag-ampo ug pagbuhat sa mga kalihokan nga gusto ninyong buhaton nga mag-uban.
Morony M., edad 18, Chihuahua, Mexico
Pagsulay og usa ka Eksperimento
Nagsabut mi og panahon nga mag-uban: sa family home evening, magdula, mangadto sa baybayon, maniudto og dungan. Kining tanan makatabang nga magpadayon ang maayong relasyon. Kon kami dili magkauyon, likayan namo ang pagpanaway. Nasayud ko nga usahay mohangyo ko nga dili mohimo sa mga buluhaton sa balay, apan kini makasalmot sa dili pagsinabtanay sa panimalay. Sukad akong gisugdan kini nga eksperimento—dili kaayo moreklamo, magpaubos sa akong tingog, motabang pa sa trabaho sa balay, ug makig-istorya sa akong inahan—nindot nga espiritu ang milambo sa among panimalay ug kami mas nagtinabangay.
Glenda C., edad 18, Bahia, Brazil
Paghimo og Espesyal nga Dominggo
Sa ubang mga Dominggo kami dunay espesyal nga paniudto o panihapon uban sa bag-ong dessert, kami mag-istorya, ug sa katapusan kami manganta og mga himno. Kini nakapahiusa namo ug nagtabang namo nga mahimong mas suod nga mga higala!
Rebeca N., edad 12, São Paulo, Brazil
Pagtabang sa Panimalay
Trabahoa ang ubang mga buluhaton sa balay. Ang imong mama nagtrabaho tibuok adlaw. Kon gamay na lang ang iyang buhaton kon mauli na siya, tingali mas malipay siya ug dunay mas daghang panahon nga makig-istorya ug mobuhat og laing butang uban nimo. Samtang nag-istoryahanay mo, mahimo nimong pangutan-on siya bahin sa iyang trabaho. Magpakita kini nga ikaw naghunahuna, ug kini ang magbukas og laing mga hilisgutan nga istoryahan, nagtugot kaninyo nga magkasuod.
Heather B., edad 18, Oregon, USA
Pangita og Butang nga Gustong Buhaton Ninyong Duha
Ang relasyon nako sa akong mama milambo pag-ayo sa dihang ako miingon, “gusto ko nga mogahin og dugang panahon uban nimo, apan wala ko masayud unsay buhaton o kanus-a kini buhaton.” Ang pagdula og mga board game maoy among paboritong kalingawan. Mao nga naggahin mi og panahon sa pagdula, pagkatawa, ug paghimo og mga handumanan. Kon ikaw bukas sa imong mga ginikanan, sa katapusan sila mahimo nimong labing maayong mga kauban. Mahimo kang makig-istorya nila og bisan unsa nga butang, ug makasiguro ka sa matinuoron nga tubag. Kana mao ang timailhan sa usa ka hingkod nga relasyon.
Ephraim S., edad 15, New South Wales, Australia
Pagbasa og Dungan sa mga Kasulatan
Kamong duha makahimo og tumong sa pagbasa og dungan matag adlaw, bisan lima ka minuto lang, gikan sa Basahon ni Mormon o sa bisan unsa nga basahon sa Simbahan. Kini makapalig-on sa inyong relasyon ug moamuma ninyo uban sa pulong sa Dios aron kamo andam moatubang sa matag adlaw. Hinumdumi usab nga mag-ampo ngadto sa Dios ug mangayo sa Iyang panabang. Ako nasayud nga Siya makadungog kanimo ug nahigugma kanimo.
Laura M., edad 19, Córdoba, Argentina