Usa ka Team sa Pamilya

Nanghupaw si Ammon samtang siya ug si Papa mibiya sa dula sa football. “Wala ko makasabut,” siya miingon. “Duna tay daghan kaayong maayong magdudula. Nganong dili ta maka-score?”

Si Papa maayo nga magdudula sa football. Tingali makatabang siya.

“Sa akong hunahuna kinahanglan nga makat-on mo sa pagtinabangay isip usa ka team, miingon si Papa. “Kamong tanan gusto nga maka-score, di ba?”

“O,” miingon si Ammon. “Apan dili kaming tanan ang maka-score. Mao ba na ang imong gipasabut?”

Mitando si Papa. “Dili ka maka-score sa imong kaugalingon. Una ang mga tigpanalipod kinahanglan mokuha sa bola sa pikas team, di ba?”

Si Ammon mikatawa. “Lisud kaayo nga maka-score kon wala nimo ang bola.”

“Husto,” miingon si Papa. “Dayon ang mga tigpanalipod mohatag niini ngadto sa tawo nga maka-score. Walay usa nga makabuhat niini nga mag-inusara.”

“Tingali,” miingon si Ammon.

Sa dihang miabut sila sa balay, si Mama nagkugos sa bata samtang nag-andam sa panihapon. “Kumusta ang dula?” nangutana siya.

“Pilde gihapon mi,” miingon si Ammon. “Pero paninguhaon namo sa sunod.”

“Nindot kana nga kinaiya,” miingon si Mama.

“Gutom nako!” Misinggit si Miguel samtang siya, si Samuel, ug Lucas nagdagan sa pagsulod.

“Mga bata, mahimo bang motabang mo sa pagpahimutang sa lamesa ug hipuson ang mga dulaan?” Mihangyo si Mama.

Ang upat ka mga lalaki nagbagulbol.

“Apan wala ako magdula sa mga dulaan,” miingon si Samuel.

“Dugay kaayo ni mahuman!” Misyagit si Miguel.

Mikatawa si Papa. “Nagtuo ako nga ang atong pamilya dunay sama nga problema sa team ni Ammon.”

“Unsa kana?” Nangutana si Samuel.

“Wala kita magtinabangay,” miingon si Ammon. “Kitang tanan gusto nga maka-score pinaagi sa pagpanihapon. Apan gipasagdan lang nato si Mama.”

“Sakto!” Miingon si Papa. “Unsaon nato pagtinabangay isip usa ka team?”

Si Ammon dunay ideya. “Unsa kaha kon si Samuel ug ako mopahimutang sa lamesa? Ang ubang mga bata manghipos sa mga dulaan.”

“Nindot kaayo nga ideya!” miingon si Papa.

Sa wala madugay andam na ang panihapon. Gikyugpos ni Ammon ang iyang mga bukton sa pag-ampo. Nalipay siya nga ang iyang pamilya nagtinabangay isip usa ka team. Naglaum siya nga ang iyang team sa football makahimo sa ingon.