Kaisug sa Pagpili nga Magmaligdong

Ang kaligdong usa ka baruganan nga hinatag sa Dios nga makatabang nato sa pagkat-on sa paggamit sa atong mga lawas sa maayong paagi sa atong mortal nga kinabuhi. Ang kahulugan sa kaligdong diha sa Matinud-anon sa Tinuhoan mao “Ang kinaiya sa pagkamapainubsanon ug pagkadesente sa sininaan, pamustura, pinulongan, ug pamatasan.”¹ Ang kaligdong dili mapasigarbuhon o manghambog. Ang mga tawo nga ligdong dili mogamit sa ilang mga lawas o sa ilang mga kinaiya sa pagtinguha og pagtugot sa kalibutan o mokuha og atensyon ngadto sa ilang tinuod o gitinguhang mga kalampusan o sa madanihong mga hiyas.

Palihug hinumdumi nga ang mga baruganan sa kaligdong magamit sa mga lalaki ug babaye, mga anak nga lalaki ug babaye, ug hinumdumi nga bisan kon kita motudlo ug mopakita og kaligdong, dili gayud nato ipanghimaraut kadtong nagpili nga mosul-ob og mubong mga sayal o “lain-lain ang kolor sa buhok ug nagsul-ob og daghang singsing.”² Kita kanunay magpakita og kalooy ug sama kang Kristo nga gugma para sa indibidwal samtang kita magpabiling maunungon ngadto sa mga sumbanan nga gihan-ay sa Ginoo.

Ako mopamatuod nga ang pagpili nga atong gihimo aron mopakita ug molihok nga ligdong nagpasabut og maayo nga kita nakasabut sa atong pagkatawo isip mga anak sa Dios ug kita mipili nga mobarug sa balaan nga mga dapit.

Ganahan kaayo ko niining kasulatan: “Wala ba kamo masayud nga kamo templo sa Dios, ug nga ang Espiritu sa Dios nagapuyo diha sa sulod ninyo? … Ang templo sa Dios balaan, ug kanang temploha mao kamo” (1 Mga Taga-Corinto 3:16–17). Ang atong mga lawas mao ang templo sa atong mga espiritu. Ngadto niining lawasnong templo nga atong gidapit ang pagpakig-uban sa Espiritu Santo. Nagtuo ko nga kon kita mopili sa pagsul-ob og tarung nga sinina ug magbinuotan, kita nagpakita ug nagkinabuhi sa atong pagpamatuod kabahin sa Dios ang Amahan sa Kahangturan ug sa Iyang Anak, si Jesukristo. Mosaksi kita pinaagi sa atong pisikal nga panagway nga kita mga disipulo ni Kristo ug kita nagsunod sa Iyang ebanghelyo.

Kita nagpuyo sa kalibutan sa maayo ug dautan, ug ang pisikal nga lawas mahimong gamiton para sa matarung o sa dautan nga mga katuyoan. Apan kita nasayud nga ang atong bililhon nga mga lawas gasa gikan sa Dios ngari kanato. Kini sagrado. Si Elder David A. Bednar sa Korum sa Napulog Duha ka mga Apostoles mitudlo, “Kadtong nasayud ug nakasabut sa plano sa kaluwasan, ang paghugaw sa lawas usa ka lihok sa pagrebelde [tan-awa sa Mosiah 2:36–37] ug paglimud sa atong tinuod nga pagkatawo isip mga anak sa Dios.”³ Kita mipili sa pag-atiman ug pagprotektar sa atong mga lawas aron kita mahimong mga instrumento sa mga kamot sa Dios sa pagdala sa Iyang mahimayaong mga katuyoan (tan-awa sa Alma 26:3). Kon kita nagtinguha nga mobarug para sa Manluluwas ug mobuhat sa Iyang buluhaton, kinahanglang mangutana ta sa atong kaugalingon, Kon ang Manluluwas nagbarug tupad kanato, komportable ba kita sa sinina nga atong gisul-ob?

Ang kaligdong sa pagsinina, panagway, hunahuna, ug kinaiya mao ang ebidensya nga kita nakasabut sa mga pakigsaad nga atong gihimo nga mopanalangin kanato, moprotektar kanato, ug mohatag nato og gahum sa pagpangandam nga makabalik sa Iyang presensya. Sa dihang kita gibunyagan, migawas kita sa kalibutan ug misulod sa gingharian sa Dios. Ang tanan kinahanglang lahi para nato. Si Elder Robert D. Hales sa Korum sa Napulog Duha ka mga Apostoles mitudlo: “Pinaagi sa pagpili nga maanaa sa Iyang gingharian, kita mibulag—wala mopalayo—sa atong kaugalingon sa kalibutan. Tarung ang atong sininaan, putli ang atong hunahuna, limpyo ang atong pinulongan.”⁴

Ang kaligdong usa ka baruganan nga makatabang nato nga luwas diha sa dalan sa pakigsaad samtang kita naglambo padulong sa presensya sa Dios. Ang kaligdong sa pagsinina ug panagway ug panghunahuna ug sa kinaiya makatabang sa pag-andam nato sa paghimo ug pagtuman sa sagradong mga pakigsaad sa templo. Sa pagpanalangin ug pagprotektar nila ni Adan ug Eva, ang Dios mihatag kanila og sinina nga panit aron ilang masul-ob sa wala pa sila gipagawas sa tanaman. Sa sama nga paagi, ang Dios naghatag kanato og tabon nga mga pakigsaad isip panalipod sa pagka-mortal, nga gisimbolohan sa atong sagradong mga temple garment.

Unsay atong matudlo sa atong mga anak nga makatabang nila nga makabaton og kaisug sa pagpili nga magmaligdong sa kalibutan nga mobiay-biay nila sa ilang mga putli ug mahiyasong mga pagpili? Ila bang nakita nga atong gigamit atong lawas aron makakuha og atensyon o sa paghimaya sa Dios?

Imahe

A smiling family standing on a lawn. Shot in Australia.

Ang kaligdong sa hunahuna, pulong, panagway, ug kinaiya makatabang nato nga makabaton sa tulo ka makapahimo ug makapahalangdon nga mga panalangin.

1. Ang kaligdong nagdasig sa kanunay nga pagpakig-uban sa Espiritu Santo. Si Elder Hales mitudlo, “Ang tarung nga sininaan [kaligdong] mahinungdanon sa pagkatakus alang sa Espiritu.”⁵

Atong tabangan atong mga anak nga makasabut nga dili sila mobuhat og bisan unsa nga maghikaw kanila “sa dili mahulagway nga gasa sa Espiritu Santo” (D&P 121:26). Tabangi sila nga masayud nga ang bililhon ug gamhanang espirituhanong mga gasa anaa sa Iyang sagradong pagpakig-uban. Ang Dios misaad, “Ako mohatag nganha kanimo sa akong Espiritu, nga mohatag og kahayag sa imong hunahuna, nga mopuno sa imong kalag uban sa hingpit nga kalipay; … Pinaagi niini ikaw masayud, sa tanan nga bisan unsa nga mga butang nga ikaw nagtinguha kanako, diin kalabut ngadto sa mga butang sa pagkamatarung, diha sa hugot nga pagtuo nagtuo ngari kanako nga ikaw makadawat” (D&P 11:13–14). Kahibalo, kaalam, ug pagpamatuod; hingpit nga kalipay, kalinaw ug kalipay—kini mao ang pipila sa dagkong mga panalangin nga atong masaad sa atong mga anak samtang kita modapit kanila nga magkinabuhi nga may kaligdong ug takus sa Espiritu Santo.

Usa sa mga hagit sa tarung nga sininaan mao nga ang uso ug ang gidawat nga sosyal nga pamatasan kanunay mag-usab-usab. Ang mga sumbanan sa Ginoo dili gayud mausab. Tudloi ang mga batan-on nga mahimong sensitibo sa Espiritu samtang sila magpili kon unsay isul-ob, isulti, ug buhaton. Samtang sila nagkinabuhi nga maduol sa Espiritu, dili sila kinahanglan nga mosunod sa kalibutan.

Ang atong mga anak nakadawat sa gasa sa Espiritu Santo, ug sila nagsubay sa dalan sa pakigsaad padulong sa templo ug mopabalik kanila ngadto sa presensya sa Dios. Nagkinahanglan sila kanato nga mopasalig kanila ug ipakita kanila nga sila magiyahan, maprotektahan, mahupay, ug maputli samtang sila magkinabuhi nga takus sa Espiritu Santo.

2. Kita makatudlo sa atong mga anak nga ang tarung nga panagway ug batasan makaprotekta nato gikan sa makadaut nga mga impluwensya sa kalibutan. Usa sa labing malinglahon nga hinagiban nga gigamit batok kanato mao ang kinaiya nga gidawat na sa katilingban nga ang moralidad kinaraan. Ang kaligdong usa ka panalipod batok sa ingon nga dautang mga impluwensya ug proteksyon sa kaputli ug hiyas. Paminawa kining mga pulonga sa Alang sa Kalig-on sa mga Kabatan-onan: “Sa dili pa ang kaminyoon, … ayaw paghimo og bisan unsang butang … makapukaw sa sekswal nga mga pagbati.”⁶ Ang dili tinarung nga panagway ug batasan sa kasagaran makapukaw sa sekswal nga mga pagbati ug mawala ang mga babag ug makaagni og dugang tintasyon nga makapasupak sa balaod sa kaputli.

Si Elder Hales mitudlo: “Ang tarung nga sininaan [kaligdong] anaa sa sentro sa pagkaputli ug pagkamahiyasnon, sa hunahuna ug sa buhat. Sa ingon, tungod kay naggiya ug nag-impluwensya kini sa atong mga hunahuna, kinaiya, ug mga desisyon, ang tarung nga sininaan [kaligdong] anaa sa tunga sa atong pamatasan.”⁷ Itudlo ug ipakita ang kaligdong aron pagtabang sa atong mga batan-on nga maandam sa pagpanalipod ug pagprotektar sa gahum sa paglalang nga anaa kanila. Tabangi sila nga himoong sagrado ug ipreserbar ang pagpahayag og gugma tali sa bana ug asawa diha na sa kaminyoon.

3. Ang kaligdong makapahimo kanato nga “mobarug ingon nga mga saksi sa Dios sa tanan nga mga panahon” (Mosiah 18:9). Ang Manluluwas mitudlo: “Ipakita ninyo ang inyong kahayag aron kini moiwag sa kalibutan. Tan-awa Ako mao ang kahayag diin kamo mopakita” (3 Nephi 18:24). Kita adunay balaang sugo nga mahimong kahayag sa kalibutan, sa pagpakita og kalipay sa pagsunod sa ebanghelyo, sa pagtudlo sa pagkamatarung, ug sa pagtukod sa gingharian sa Dios dinhi sa yuta. Matag usa kanato nagpakita sa Kahayag ni Kristo kon kita maligdong ug putli ug mosunod sa mga sugo. Ang kaligdong mao ang saksi sa atong pagpamatuod sa Manluluwas ug sa ebanghelyo ni Jesukristo.

Hilabihang kanindot ug kabulahan kinsa kadtong nagiyahan sa Espiritu Santo, kinsa nanalipod sa ilang kaugalingon sa pagkakalibutanon, ug kinsa nagbarug isip saksi sa Dios ngadto sa kalibutan. Ug bulahan kadtong nagpakita ug nagtudlo sa doktrina kabahin sa kaligdong para sa tanang mga anak sa Zion.

Samtang kita nakigsaad sa pagsunod sa Manluluwas ug nagtinguha sa pagdawat sa kahingpitan sa mga panalangin sa Iyang Pag-ula sa atong kinabuhi, adunay usa lang ka saput nga mahinungdanon. Si Moroni mirekord, “Pagmata, ug bangon gikan sa abug, … oo, ug isul-ob ang imong matahum nga mga saput, O anak nga babaye sa Zion; … nga ang mga pakigsaad sa Amahan sa Kahangturan … mahimo nga matuman” (Moroni 10:31; emphasis gidugang).

Ang matahum nga mga saput mao ang mga kupo sa pagkamatarung, sul-ubon niadtong nagtuman sa ilang mga pakigsaad. Giandam ba nato atong mga anak sa pagsul-ob niining matahum nga mga saput?

Ako mopamatuod nga ang kaluwasan anaa kang Kristo ug kadtong nagtuman sa ilang mga pakigsaad “makabaton og hingpit nga kahibalo sa ilang kamaya, ug sa ilang pagkamatarung, ingon nga gisul-uban sa kaputli, oo, gani sa kupo sa pagkamatarung” (2 Nephi 9:14).