—Family History—Gibuhat Ko Kini

Ang paghimo og journal dili sayon. Kita kanunay mosulti sa atong kaugalingon nga kita busy kaayo o gikapoy o nga ang atong mga kinabuhi dili mahinamon sa pagsulat mahitungod niini. Nakaamgo ko pipila ka tuig na ang milabay nga ang paghimo og journal wala gituyo nga lisud ug nga ako maganahan niini.

Akong gisugdan pinaagi sa pagsulat og usa ka butang kada adlaw. Dili igsapayan kon kini taas o makapahinam; misulat lang ko kon unsay anaa sa akong hunahuna o bisan unsay nahitabo nianang adlawa. Nakapanalangin na kini sa akong kinabuhi.

Usa ka adlaw usa ka tawo sa akong pamilya naglisud ug wala ko makahibalo kon unsay isulti kaniya, apan nadasig ko sa pagbasa ngadto kaniya sa usa sa mga nasulat diha sa akong journal. Nakahimo ko sa pagpakigbahin og usa ka gamay nga piraso nako nga akong girekord diha nianang gamay nga itom nga journal, ug akong nakita ang paagi nga kini nakatabang sa pagpagaan sa iyang kasingkasing.

Ako mogarantiya nga kon kamo magsugod sa pagsulat og usa ka butang sa usa ka adlaw, kini mopanalangin sa inyong kinabuhi. Dili igsapayan kon unsa ka gamay o unsa ka dako, ang pagsulat sa mga panalangin sa inyong kinabuhi makatabang kaninyo sa paghinumdom niini.

Imahe

A young woman and elderly woman looking at family history papers.

Sa dihang nabunyagan ko, daghan ko og nadungog mahitungod sa family history, apan wala ko masayud kon unsaon sa pagbuhat niini o kon ako makahimo ba. Ako mihukom sa pag-ampo mahitungod niini, ug akong gibati nga ako kinahanglan magsugod sa pagbuhat niini diha-diha dayon. Akong gibati nga ang akong mga katigulangan naghinam-hinam na nga ako makasugod ug nga sila motabang kanako nga makakita sa impormasyon nga gikinahanglan sa paghimo sa mga ordinansa.

Akong gisugdan pinaagi sa pagkuha og kurso sa family history, ug sa wala madugay ako gitawag nga mahimong usa ka consultant sa family history. Nakulbaan ko tungod kay ako wala kaayoy nahibaloan niini, apan akong gidawat ang calling.

Usa ka adlaw ako mibisita sa igsong babaye sa akong lola, kinsa adunay mga dokumento kabahin sa akong apohan sa tuhod. Dili siya gusto nga mopakigbahin og daghang impormasyon tungod kay sila adunay tradisyon sa dili paghisgot mahitungod sa mga patay nga kaliwatan. Siya miingon nga sa pagkasunod nga adlaw mao ang anibersaryo sa kamatayon sa akong apohan sa tuhod, ug iyang sunugon ang mga dokumento. Mihangyo ko kon makakuha ba ako og impormasyon gikan niini, ug mitugot siya nako. Nasayran nako didto nga ang Langitnong Amahan motabang nako sa pagpadayon sa akong pagsiksik.

Samtang nagserbisyo ako sa family history center duol sa templo, nagpadayon ko sa pagdiskobre og daghan pa kabahin sa akong pamilya. Akong nakat-unan nga duha ka mga apohan sa akong apohan sa tuhod mga Italian nga mga langyaw kinsa adunay umahan duol sa São Paulo, Brazil. Wala na makontak sa akong pamilya ang mga paryente diha sa umahan, apan akong nakaplagan ang usa ka ig-agaw nga nagsulat og usa ka libro mahitungod sa kasaysayan sa kagikan sa among pamilya. Iyang gihatag kanako ang libro, nga miabut og siyam ka tuig niyang pagsulat. Miingon siya nga wala siya masayud nganong kinahanglan siyang mosulat niini apan mibati nga kini makatabang sa usa ka tawo sa umaabut. Ako nasayud nga kini mao ang espiritu ni Elijah nga midasig kaniya.

Ang akong mga kasinatian nagtudlo kanako nga kita naghimo og usa ka sagrado nga buhat. Ang atong mga katigulangan naghulat sa atong tabang ug anaa sa atong kiliran sa pagtabang kanato.

Imahe

Youth at the Preston England Temple.

Ako usa ka kinabig ug ang bugtong miyembro sa Simbahan sa akong pamilya. Akong nakat-unan nga usa sa sagradong mga ordinansa mao ang bunyag alang sa mga patay. Miadto ko sa templo sa usa ka tour, ug samtang naminaw sa pakigpulong mahitungod sa mga ordinansa, mibati ko og hinay, hinagawhaw nga tingog nga nagsulti kanako sa pag-adto sa family history center sa pagsumiter og temple ordinance request alang sa akong inahan, kinsa namatay na. Malipayon kaayo ko sa dihang ang account sa FamilySearch mikumpirma nga ang buhat sa templo alang niya nahimo na. Kini nakapalig-on sa akong pagpamatuod, ug ako nasayud nga usa sa mga rason nganong ania kita dinhi sa yuta mao ang pagtabang sa atong mga katigulangan sa pagdawat sa tinuod nga ebanghelyo ni Jesukristo.

Imahe

Family members together at a table looking at a photo album.

Human makagradwar sa high school, nadasig ako sa pagbisita sa akong upat ka mga apohan. Diha koy panahon, ug naghunahuna ko nga basin wala na koy laing oportunidad pag-usab, mao nga migahin ko og usa ka semana sa kada usa ka pares sa akong mga apohan.

Akong gigahin ang akong panahon sa pagsusi sa karaan nga mga kahon, pagbasa sa karaan nga mga sulat, ug pagtan-aw sa karaang mga litrato. Girekord nako ang mga istorya sa kinabuhi sa akong mga apohan, miadto sa mga sementeryo, ug mibisita sa gipuy-an ug gitrabahoan sa akong mga apohan ug sa ilang mga paryente. Makalingaw kaayo! Daghan kog nakat-unan mahitungod sa akong mga katigulangan, sa akong mga apohan, sa akong mga ginikanan, ug sa akong kaugalingon. Ako nakaamgo nga dili unta ako makaangkon sa akong kinabuhi karon kon dili pa tungod sa akong mga katigulangan.

Human sa akong pagbiyahe, miuli ako dala ang mga 1,000 ka mga pangalan sa akong mga katigulangan ug nakahimo sa pagbuhat sa buhat sa templo alang sa kadaghanan kanila. Ang pagsunod sa mga aghat sa Espiritu Santo ug pagbisita sa akong mga apohan mao ang usa sa pinakamaayong desisyon nga sukad akong nahimo.

Imahe

Indexing, UK Army war records screen, Wales, UK

Sa dihang nangayo ko sa akong papa og mga ideya sa family history aron makakompleto sa akong Personal nga Kauswagan, siya mipasabut nga siya nakakita og pipila ka mga pangalan sa pamilya pipila ka tuig na ang milabay apan wala makaandam sa mga pangalan nga madala ngadto sa templo sa iyang kaugalingon tungod sa kakulang sa iyang panahon. Ang akong tabang makahimo niini nga posible alang sa mga sakop sa pamilya sa pagdawat sa mga panalangin sa templo.

Sa misunod nga pipila ka bulan, akong gigahin ang Dominggo sa hapon ug gabii sa pagsulod sa mga pangalan ngadto sa computer ug pagkat-on sa mga istorya sa pamilya gikan sa akong papa. Mi-order gani kami og microfiche sa pagpangita og dugang nga impormasyon. Usahay kon lisud basahon ang karaang mga film, mag-ampo ako sa hilom ug dayon mokuha og papel aron subayon ang mga imahe. Gikan sa kahanap, ang mga pangalan makita.

Sa katapusan nakatipon ako og daghang koleksyon sa mga pangalan sa pamilya, ug ang mga kabatan-onan sa among ward mitabang sa pagkompleto sa bunyag. Ang akong mga ginikanan ug ubang mga miyembro sa ward midala sa mga name card aron makompleto ang ubang mga ordinansa sa templo.

Ingon og kadiyot ra nga panahon nga ako nag-andam na sa pag-adto sa templo alang sa akong kaugalingong endowment. Ganahan ko pero gikulbaan usab.

Samtang kami nagpadulong ngadto sa templo, ang akong papa mipasabut nga iyang nakit-an ang ubang mga name card sa pamilya nga akong giandam alang sa akong proyekto sa Personal nga Kauswagan. Ang uban nawani, mao nga iyang gidala ang mga name card alang sa akong mama, sa akong pamanhunon, ug alang kaniya aron mahuman. Iyang gipaambit kanako ang ilang mga ngalan, ug ako nahinumdom kanila gikan sa akong proyekto.

Samtang ako mihimo og sagradong mga pakigsaad sa templo, akong gibati nga gilibutan sa mga minahal sa kinabuhi sa duha ka bahin sa tabil. Ako mibati og dakong kalinaw sa pagkasayud nga ako hangtud sa kahangturan mahiusa uban sa akong pamilya.