“Naningkamot ko sa pagkontrol sa akong mga hunahuna, apan adunay daghan kaayong mga tintasyon. Sa unsang paagi ako makabaton og mas limpyo nga mga hunahuna?”

Usa ka maayo nga punto sa pagsugod mao ang pagpili sa makapabayaw nga mga salida, musika, ug literatura. Pagpili og mga higala kansang pakigkuyog makapatunhay sa takus nga pag-istoryahanay ug matarung nga mga kalihokan. Samtang kamo adunay mas maayo nga mga butang nga hunahunaon, anam-anam ninyong makaplagan nga mas sayon nga wagtangon ang ngil-ad nga mga hunahuna, ug kini dili na kaayo sa kasagaran moabut.

Ang pag-ampo makapaduol nako sa atong Langitnong Amahan ug makatabang nako nga maghunahuna og maayong mga hunahunaon. Ang matag adlaw nga pagtuon sa kasulatan makapalig-on sa akong pagsalig sa pagbuntog sa mga tintasyon; diha sa mga kasulatan akong makita ang mga ehemplo sa matinud-anong mga disipulo ni Kristo. Ang paghatag sa akong pagpamatuod makatabang usab nako nga malimpyo ang akong mga hunahuna.

Ang pagbasa sa mga kasulatan matag buntag sa dili pa moeskwela makatabang. Sa higayon nga ako maghunahuna og dili maayo, diha-diha pulihan dayon nako og butang nga mas maayo. Imbis moingon lang, “Dili, ayaw paghunahuna niana” (nga mao ang usa ka maayo nga butang nga buhaton), pulihan kini og usa ka maayo nga panghunahuna. Hinumdumi, kamo ang nagkontrolar sa inyong hunahuna, dili si Satanas. Kita maisugon nga mga anak sa Langitnong Amahan ug kanunay anaa sa misyon sa pagpalambo sa atong kaugalingon.

Kamo dili kanunay makakontrolar kon moabut ba ang hunahuna, apan inyong makontrolar kon magpabilin ba kini. Mahimo kamong mangutana: Kini nga hunahuna makaayo ba nako? Makatabang ba kini nako nga mosubay sa sakto nga direksyon? Kon ang usa ka makatintal nga hunahuna motunga, kanta og nindot nga awit, paghunahuna og nindot nga panumduman, o mag-ampo. Mahitungod kini sa pagpuli sa dautang mga hunahuna og usa ka butang nga maayo.

Sa 1 Nephi 15:27, si Nephi misulti sa iyang mga igsoon nga ang ilang amahan, sa iyang panan-awon sa kahoy sa kinabuhi, gilibutan sa kahugaw. Apan si Lehi wala makamatikod sa mga kahugaw tungod kay ang “iyang hunahuna hilabihan [nga] nalinga sa uban nga mga butang.” Tinuod usab kini alang nato karon. Kon kita nagtinguha nga mapuno sa pagkamatarung, pag-ampo alang niini, ug tutuki ang matarung nga mga butang, dayon ang atong mga hunahuna mapuno sa pagkamatarung ug hiyas nga ang hugaw nga mga hunahuna dili makabaton og gahum nga magpabilin.

Ang mga himno makatabang kanato nga makabaton og mas limpyo nga mga hunahuna. Ang maayong musika makapabayaw sa espiritu. Kon ako makapaminaw sa mga himno, kini makabayaw nako kanunay ngadto sa mas kalma ug celestial nga kahimtang. Kini makatabang nako sa paghinumdom sa gugma sa Langitnong Amahan alang sa matag usa kanato, ug kini makapasayon sa paglikay sa tintasyon.

Kon ang hugaw nga mga hunahuna mosulod sa akong pangisip, maningkamot ko sa paghinumdom sa mga kasulatan nga gibasa sa akong pamilya ug nako pagkabuntag. Matag buntag sa alas 6:00, ang akong pamilya magbasa og dungan sa mga kasulatan. Sayo ra kini, apan usa kini ka panalangin ug makahimo nako sa pagbati nga mas lig-on nianang adlawa.

Ang pag-ampo sa sakrament namahayag nga kon kita modala diha kanato sa ngalan ni Kristo, mosunod sa Iyang mga sugo, ug sa kanunay mohinumdom Kaniya, kita sa kanunay makabaton sa Iyang Espiritu uban kanato. Pinaagi sa paghinumdom Kaniya, kita naningkamot sa pagsalikway sa yutan-ong mga hunahuna ug motutok sa mahangturong mga butang. Kon kita kanunay mahinumdom Kaniya, ang atong mga hunahuna, mga tinguha ug mga aksyon mausab ngadto sa mas maayo.