Ang Akong Pag-ampo diha sa Amihanang Dagat

Imahe

drawing for LDS Voices

Mga paghulagway pinaagi ni Bradley H. Clark

Sa dihang 17 anyos ko, kami nagpuyo sa usa ka isla sa southern Norway nga gitawag og Andabeløy. Ang akong amahan nakabig sa Simbahan sa Andabeløy, ug nabunyagan ko sa dagat didto.

Mangingisda ko nianang panahona ug sinati pag-ayo sa pagmaniubra sa bangka. Gihatag sa akong amahan ngari nako ang responsibilidad sa among maritime taxi service nga gamiton sa mga lumulupyo sa dapit.

Usa ka adlaw niadtong 1941 gitawagan mi sa usa doktor sa Flekkefjord, ngadto sa amihan. Usa ka babaye nga nagpuyo og mga duha ka oras ang gilay-on sakay sa bangka nagkinahanglan diha-diha dayon og medikal nga pagtagad. Si Dr. Hoffman nangutana kon madala ba nako siya didto aron makita ang babaye, apan ang akong ginikanan nabalaka sa dakong unos sa Amihanang Dagat. Mihukom mi sa pag-ampo, naghangyo sa Langitnong Amahan unsay buhaton. Nakadawat mi og tubag nga kinahanglan ko nga moadto.

Sa dihang akong gimaniobra ang Tryg, ang akong 31 ka pye (10 m) nga bangka sa pagpangisda, ngadto sa dagat, ang panahon ngil-ad ug dagko ang mga balud. Human og hapit sa doktor, gisugdan nako og subay ang fjord ngadto sa dagat. Kami mobiyahe paingon sa usa ka komunidad nga amihan sa Lista, nahimutang sa batoon nga habagatang baybayon sa Norway—inila sa unuson nga panahon ug sa natanggong nga mga gubang barko.

Akong gitimunan ang bangka tadlas sa unos hangtud nga miabut mi sa usa ka batoong bukana, mga 40 ka pye (12 m) ang gilapdon, paingon sa among destinasyon. Ang mga balud, hilabihan ka taas nga dili nako makontrolar ang bangka agi sa bukana, midasdas pasulod sa bukana ug mihampak sa mga bato.

“Unsay atong angay nga buhaton? nangutana ang doktor taliwala sa kusog kaayo nga hangin.

“Kinahanglan mag-ampo ta kabahin niini,” mitubag ko.

Mihunong ko og kadiyot ug nag-ampo, nangamuyo sa Langitnong Amahan og direksyon. Sa dihang nakasulti ko og amen, ang tubag klarong miabut dayon. Diha-diha dayon nakahinumdom ko sa istorya nga gisugilon sa usa ka tigulang nga mangingisda kanako. Nakasuway na siya og pagpangisda niining dapita atol sa grabeng unos ug dili makaadto sa baybayon. Samtang naghulat siya nga mohunong ang unos, nakabantay siya og pattern sa mga balud nga moabut. Human og hasmag sa tulo ka dagkong mga balud, adunay mubong panahon sa kalinaw nga mosunod—igong panahon nga makasulod siya sa bukana.

Kadaghan nako nakapangisda niining dapita apan wala makabantay og pattern sa balud. Bisan pa niana, akong gipahimutang ang bangka sa atubangan sa bukana, diin kami nagpaabut ug nagtan-aw samtang tulo ka dagkong mga balud ang mihasmag. Sigurado gayud, misunod ang kakalma. Gipadailos nako ang bangka sa unahan diha sa malinawaon nga tubig sa tunga-tunga sa bahiya ug luwas nga gidala si Dr. Hoffman sa baybayon. Nagdali-dali siya sa pag-adto sa masakiton nga babaye samtang nagpaabut ko sa bangka, mapasalamaton nga gitubag sa Langitnong Amahan ang akong pag-ampo.

Sa dihang mibalik ang doktor mga usa ka oras ang milabay, siya mideklarar, “Atong naluwas ang iyang kinabuhi!”

Nahupay sa balita ug sa nagkaanam nga nindot nga panahon, akong gitimunan ang bangka pauli nga wala nay panghitabo.

Ako mosaksi nga kon kita nagkinahanglan og tabang, kita kinahanglang mag-ampo. Nasayud ko nga ang Langitnong Amahan motubag.