Ko e Ongoʻi ʻa e Laumālie ʻo e Temipalé
Kathy Rossier, Kalefōnia, USA
Tā fakatātā ʻa Allen Garns
Ne u maʻu e faingamālie ke u ʻaʻahi ai ki hoku ʻofefine ko Kelí ʻi Lasi Vēkasi, Nēvata ʻi USA, ʻa ia naʻa nau toki hiki ki ai mo hono husepānití mo ʻena fānau ʻe toko uá. Naʻe kamata ʻa e uooti ʻa Kelí ʻi he hoʻataá, ko ia ne mau teuteu fiemālie ʻi he pongipongí pea aleaʻi e ngaahi fili ʻe fakahoko ʻi he tuku ʻa e lotú. Koeʻuhí naʻe teʻeki ke maʻu ʻe Keli ha faingamālie ke ʻaʻahi ki he temipalé, ne mau fakakaukau ai ke mau ʻalu ʻo faitā mo e fānaú ʻi he temipalé.
Naʻe fakaʻofoʻofa pea tokangaʻi lelei e Temipale Lasi Vēkasi Nevatá ʻi hono ngaahi faunitení mo e matalaʻiʻakau fakaʻofoʻofá ʻo tatau pē mo e ngaahi temipalé kotoa.
Hili hono lau ha talanoa naʻe fai ʻe Palesiteni Tōmasi S. Monisoni, naʻe vēkeveke ʻa Keli ke ʻave ʻene fānaú ki he temipalé ke nau ala ki ai (vakai, “Finding Peace,” Liahona, Mar. 2004, 5–6). Ko e fuofua meʻa naʻá ne faí naʻá ne fakamatalaʻi ʻa e toputapu mo e mahuʻinga ʻo e temipalé ki hono ʻofefine ko Sitelá.
Naʻe mahino pē kia Sitela ʻo tatau pē mo ha taha taʻu tolu, pea naʻa mau poupouʻi ia ke ne ala ki he temipalé. Naʻe lahi e ngaahi laʻitā ʻo Sitela mo hono tuongaʻane māhina tolú ʻokú na ala ki he temipalé.
ʻI he hokosia e taimi ke mau foki aí, naʻe ʻikai ke fie ʻalu ʻa Sitela ia. Ne mau pehē ne mau ʻiloʻi hono ʻuhingá; naʻá ne fiefia ke ne ʻi ha feituʻu fakaʻofoʻofa pehē pea naʻe pau pē naʻá ne ongoʻi ʻa e laumālie tatau ne mau ongoʻí.
Hili hono fakaheka ia ki he meʻalelé pea fakamaʻu mo hono letá, naʻa mau kamata foki leva. Naʻá ku tafoki kimui, ʻo taʻataʻalo, peá u pehē ange kia Sitela, “Lea, nofo ā temipale ē.” Naʻá ne sio ki he temipalé, ʻo taʻataʻalo, mo pehē “Nofo ā temipale ē. Nofo ā, Kulenipā ē.” Naʻe ʻikai ke u fakapapauʻi pe naʻe tonu ʻeku fanongó, ka ʻi heʻeku tafoki hake kia Kelí peá u sio ki heʻene fakatē loʻimatá, naʻá ku ʻiloʻi ne ma fakatou fanongo pē ki he meʻa tatau.
Naʻe mālōlō ʻa e kui tangata ʻa Sitelá—ʻa hoku husepāniti ko Timí—ʻi he taʻu ʻe fā kimuʻa pea fāʻeleʻi ʻa Sitelá. Naʻá ne ʻosi sio pē ʻi ha ʻū laʻitā ʻo Timi pea fanongo ʻi he fāmilí ʻenau talanoa kau kiate iá, ka naʻe teʻeki pē ke mau talanoa kau kia Timi he ʻaho ko iá.
Naʻe toko taha pē homa mokopuná, ʻi he taimi naʻe mālōlō ai ʻa Timí. ʻOku toko 12 he taimí ni homa makapuná, pea ko e taimi kotoa pē ʻoku ou pukepuke ai ha taha ʻo e ngaahi pēpē pelepelengesi ko ia ne nau toki mavahe mai mei he ʻafioʻanga ʻo ʻetau Tamai Hēvaní, ʻoku ou fie ʻeke ange, “Naʻá ke fetaulaki mo hoʻo kui tangatá? Ko e hā ʻene ngaahi faleʻi naʻá ne ʻoatu ke ke haʻu mo iá?”
Naʻe fakamālohia ʻeku fakamoʻoni ki he toputapu ʻo e temipalé ʻi he ʻaho ko iá. ʻE ʻikai ke tau lava ʻo hū fakataha mo ʻetau fānau īkí ki loto, ka te tau lava ʻo ʻave kinautolu ki he matapaá pea tuku ke ala honau nimá ki he matapā ʻoku fakaʻaongaʻi ʻe he kāingalotu taʻefaʻalaua ʻoku nau taau ke hū ki he fale ʻo e ʻEikí.