ʻI he taimi ne u ʻi he ako māʻolungá aí, naʻá ku loto mamahi ʻi he niʻihi ʻo e tokāteline ʻo e Siasí. Naʻe faifai peá ne tataki au ke u vaivai ai he siasí. Ne u ʻalu ki he ngaahi ʻekitivitī ʻo ha siasi kehe, ka naʻe ʻikai pē ke kakato ʻeku fiefiá. Naʻe hangē ʻoku ʻi ai ha meʻa ʻoku molé.

Naʻe kiʻi fuoloa peá u toki maʻu ʻa e meʻa naʻe molé, ka ʻi he ʻaho ʻe taha hili ʻeku lotú, naʻe ʻāʻā hake hoku matá ʻo sio ki he Tohi ʻa Molomoná ʻoku hili mai ʻi heʻeku funga tēpilé. Naʻe ʻamanaki ke u mohé naʻe haʻu ha fakakaukau kiate au: “Ko e tupuʻi Māmonga au. ʻOku anga fēfē ʻa e teʻeki ke ʻosi e Tohi ʻa Molomoná heʻeku laú?” ʻI he ʻaho ko iá naʻá ku fakakaukau ai te u lau e Tohi ʻa Molomoná ke ʻosi.

Hili ha ngaahi taʻu lahi ʻo ʻeku fekumí, naʻe faifai peá u maʻu ʻa e konga ko ia ʻo e fiefiá naʻe molé.

ʻI heʻeku ngāue fakafaifekaú kuó u sio ki he kakai ʻoku nau inu kava mālohi, ifi tapaka, mo ngāue ʻaki e faitoʻo konatapú ka ʻi heʻenau fakaava pē e Tohi ʻa Molomoná ʻoku nau tafoki mei honau ngaahi ʻulungāangá pea foki ki honau ngaahi fāmilí mo e Siasí. Kuó u sio ki he ngaahi foha maumau koloá ʻoku nau foki ki ʻapi ʻo ngāue fakafaifekau hili ʻenau fakaava ʻa e tohí. Kuó u sio he ngaahi fāmili naʻe moveté ʻoku nau lau fakataha e Tohi ʻa Molomoná pea hili pē iá ʻoku silaʻi kinautolu ʻi he temipalé. Kuó u sio ki he kakai kuo siva moʻoni e ʻamanakí pea ʻikai ke nau ʻilo e meʻa ke faí, ʻoku nau fakaava e tohí ni, pea kamata ke tonu e meʻa kotoa.

ʻI he taimi pē ʻoku ou fakaava ai e Tohi ʻa Molomoná pea fakaʻaongaʻi ha veesi ke tokoni ki ha tahá, ʻoku hoko e ngaahi mana. ʻOkú te ongoʻi e mālohi ʻo e ʻOtuá ʻi he taimi ʻokú te lau ai e ngaahi peesi ʻo e tohí ni, ʻokú ne tatali ke liliu ha moʻui, ʻokú ne tatali ke fakahoko ha mana. ʻOkú ou palōmesi atu ʻoku hoko ʻa e ngaahi mana ʻi he taimi kotoa pē ʻokú ke fakaava ai e Tohi ʻa Molomoná. Mahalo he ʻikai ke hoko mai ʻi he meʻa naʻa tau fie maʻu ke hoko aí pe hoko ʻi he taimi naʻa tau fie maʻu ke hoko aí, ka kuo pau ke hoko ia.