“Ko ʻeku ongomātuʻá ʻokú na kapekape, fanongo ki he ngaahi fasi leʻo lalahí, mo sio he ngaahi faiva taʻe-feʻunga he TV. Ko e hā ʻe lava ke u fai ke u ongoʻi ai ʻa e Laumālié ʻi ʻapi, tautautefito ki he Sāpaté?”

Tatau ai pē pe ʻoku kau hoʻo ongomātuʻá ki he Siasí pe ʻikai, talanoa mo kinaua kau ki he ʻuhinga ʻoku mahuʻinga ai kiate koe ke maʻu maʻu pē ʻa e Laumālié ʻi homou ʻapí, tautefito ki he Sāpaté. ʻI he tūkunga ʻoʻoú, te ke lava ʻo fili e feituʻu nonga taha homou falé pea fakaafeʻi e kāingalotu kehe ʻo e Siasí ke nau kau fakataha mo koe ʻi hono fakaafeʻi e Laumālié ke ʻi ai. ʻOku ou ʻilo kapau te mou tauhi e ʻaho Sāpaté ke māʻoniʻoni, ʻe tāpuekina lahi kimoutolu ʻe he ʻEikí.

Te ke lava ʻo lotua hoʻo Ongomātuʻá. ʻO hangē ko ia naʻe tohi ʻe Molomoná, “ʻE manatuʻi foki ʻe he ʻEikí ʻa e ngaahi lotu ʻa e māʻoniʻoní, ʻa ia kuo fai kiate ia koeʻuhi ko kinautolú” (Molomona 5:21). Mahalo naʻa ʻikai ke tuku ʻe hoʻo ongomātuʻá he taimi pē ko iá, ka ʻe tokoniʻi koe ʻe he ʻEikí.

ʻOku faingataʻa maʻu pē ʻa e Sāpaté kiate au ʻi ʻapi. Ko au pē ʻoku ou kau ki he Siasí ʻi homau ʻapí, pea ʻoku sio TV maʻu pē mo fanongo hiva ʻeku ongomātuʻá mo hoku ngaahi tokouá ʻi he Sāpaté. ʻOku ou fie maʻu ke fakahaaʻi ʻeku ʻofa ki he Tamai Hēvaní ʻaki hono tauhi e ʻaho Sāpaté ke māʻoniʻoní ʻOku lava ke u ʻalu ʻo lau folofola ʻi hoku lokí, fanongo ki he ngaahi mūsika ʻa e Siasí, mo ʻalu ʻo ʻaʻahi mo hoku ngaahi kaungāmeʻá pe ko e ongo faifekaú. ʻOku ou fakamālō lahi ko e tokoni ʻa e ʻEikí ʻo ʻomi maʻu pē ha mālohi ke u tauhi faivelenga e ʻaho Sāpaté.

Kapau ʻoku ʻi ai haʻo telefoni toʻotoʻo pe tepileti, te ke lava ʻo hiki ʻa e ngaahi polokalama ʻa e Siasí ki ai. ʻOku fonu ʻi he ngaahi hiva, vitiō mo e ngaahi lea fakaʻofoʻofa ʻoku nau ʻomi maʻu pē ʻa e Laumālié ʻi he taimi ʻoku ou fanongo ai ki aí! ʻOku faingofua pē, pea ʻoku tokoni ia ke u ongoʻi moʻoni e Laumālié ʻo aʻu ki he taimi ʻoku longoaʻa ai e ʻātakai ʻoku ou ʻi aí. ʻOku ʻi ai pē hono kehekehe pea ʻokú ne ʻomi e nonga ki he falé kotoa.

Talanoa mo hoʻo ongomātuʻá kau ki he ngaahi meʻa ʻokú na fakahokó, ka kapau ʻe ʻikai ke na fie fanongo, te ke lava ʻo lotu ki ha fakahinohino ki he founga ʻe ala tokoni ai ke ke ongoʻi e Laumālié ʻi homou ʻapí. Ke ongoʻi e Laumālié ʻi homau ʻapí, ʻoku ou lau e folofolá pea ʻokú ne ʻomi ai ʻa e Laumālié ki hoku lokí he taimi pē ko iá.

ʻOku mahuʻinga ke fakafonu e ʻapí ʻaki e Laumālié, ka ʻoku toe mahuʻinga ange ke fakafonuʻaki ia ha taha. Ko Kalaisi ko e faʻifaʻitakiʻanga haohaoa Ia ʻo hono maʻu e Laumālié ʻiate Ia he taimi kotoa peé. Ko hoʻo feinga pē ke moʻui ʻo hangē ko Kalaisí, angalelei ange ki he niʻihi kehé, mo mamata ki he māmaní ʻo tatau mo Iá, mahalo ko e founga lelei taha ia ke nofoʻia ai koe ʻe he Laumālié ʻi ha feituʻu pē te ke ʻi ai.

ʻI he Sāpaté, mahalo te ke fokotuʻu ha ngaahi ʻekitivitī te ke lava ʻo fakahoko fakataha mo e fāmilí. Fokotuʻu ha meʻa ʻe lava ke fakahoko fakataha ʻe he fāmilí ʻa ia he ʻikai lava ke fakaʻaongaʻi ai e ngaahi meʻa taʻe-feʻungá. Kapau ʻokú ke fakahoko fakataha ha meʻa mo e fāmilí, ʻokú ne ʻomi kimoutolu ke mou toe vāofi ange. Pea ʻoku nau maʻu ai ha ngaahi fakakaukau foʻou ki he meʻa te mou ala fai he Sāpaté. Mahalo ko e Sāpate hokó pē te nau pehē atu, “ʻEi, naʻe fakalata e meʻa naʻa tau fai he uike kuo ʻosí—tau toe ʻai pē ia.”