Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko Hono Talitali ʻo Sīsuú
Tā fakatātaaʻi ʻe DanBurr
Hili e ngaahi uike ʻo e nofo ʻamanakí, kuo faifai pea hoko e Efiafi kimuʻa he Kilisimasí. Naʻe mei kakato kotoa mai homau fāmilí—Kulenipā mo Kulenimā Feletisā, ko homa fānau fefine ʻe toko tolú mo honau ngaahi husepānití mo e fānaú. Naʻe malu ʻaki mai e poʻulí pea kamata ke ulo ʻa e ngaahi halá. Ngingila e ngaahi falé ʻi he ngaahi teuteu fakaʻofoʻofá pea fetapaki fiefia ʻa e ngaahi ʻakau Kilisimasí ʻi he matapā sioʻatá.
Naʻa mau teuteu ke ō ki he Fakaʻaliʻali ʻo e ʻAloʻí, ʻa ia ne fakahoko ʻe he Siasí ʻi ha ngaahi taʻu lahi ʻi Kalakeli, ʻi ʻAlapeta, Kānata. Naʻa mau nofo ʻamanaki ʻi he Efiafi kimuʻa he Kilisimasi kotoa pē ki he ō ki he fakaʻaliʻali ʻi tuʻa naʻe kau ai e fanga ʻasí, sipí, Kau Tangata Potó, kau tauhisipí, kau sōtia Lomá, kau ʻāngeló, mo ha nāunau fakaongo leʻo lahi mālohi. Naʻá ne ʻomi ʻa e laumālie ʻo e melinó, ʻofá, pea mo e ʻuhinga moʻoni ʻo e Kilisimasí ki heʻemau kātoanga femoʻuekiná.
Ne mau aʻu atu ki he Paʻake Tukufakaholó, ʻa ia ne fakahoko ai ʻa e fakaʻaliʻalí, pea ʻikai hano taimi kuo mau fiefia ʻi he fakameʻite ʻa e ngaahi fasi ʻa e Kuaea ʻo e Tāpanekale Māmongá pea mo e talanoa ʻo e ʻaloʻi e Fakamoʻuí. Naʻe taʻu tolu homa mokopuna lahi taha ko Loleiní he taimi ko iá. Naʻe ʻāvea ia ʻi he fakaʻofoʻofa, ongo, pea mo e talanoa ne fakahoko maí. Naʻe kapu ʻemau mānavá ʻi he ʻea momoko ʻi he pō langimaʻa mo fetuʻuʻiá. Naʻa mau mamata ki he talangofua ʻa e kakai naʻa nau fakatātaaʻi ʻa Siosefa mo Melé ki he tuʻutuʻuni ʻa Sisa ʻAkositusí ke ō ki Selusalema ke tukuhauʻí. Ko e fefine naʻá ne fakatātaaʻi ʻa Melé naʻe “tuʻituʻia ʻi ha tama” (vakai, Luke 2:5), pea ko e potu pē naʻa nau lava ʻo maʻu ke nau nofo aí ko ha fale masivesiva tauhiʻanga ʻo e monumanú. “Pea fāʻeleʻi ʻe ia ʻa e tama ko hono olopoʻou, peá ne takatakai ʻaki ia ʻa e kofu, ʻo fakatokoto ia ʻi he ʻaiʻangakai ʻo e manú” (vakai, Luke 2:7). Naʻe vilo takai ʻa e foʻi maama hulú ʻi he kiʻi moʻunga ne mau lava ai ʻo sio ki he kakai ko e kau tauhisipí ʻi heʻenau leʻohi “ʻenau ngaahi tākangá he poʻulí” (vakai, Luke 2:8). Fakafokifā pē, kuo ʻasi mai ha taha kuo ʻosi teuteu ko ha ʻāngelo ʻi he ʻataá, kuo huluʻi ia ʻe ha maama ulo lahi. Naʻe toutou kaila fakaʻofa ʻa Loleini, “Sīsū, ko au ʻeni, Loleini!”
Naʻe fanongo e taha kotoa ʻi homau tafaʻakí ki heʻene fakaleá pea nau kata leʻo siʻi, ʻo fiefia he meʻa fakaʻohovalé. Ko ha maʻuhala lelei pē ia, ka kiate kimautolu, naʻá ne fakamanatua lelei ʻa e fakaʻaliʻali he taʻu ko iá. Naʻe ʻiloʻi ʻe Loleini naʻe ʻafioʻi ia ʻe Sīsū, pea naʻe fakamanatu ai kiate kimautolu ʻemau ʻilo ʻokú Ne ʻafioʻi kitautolu takitahá. Naʻa mau fifili pe naʻe kei manatuʻi ʻe Loleni ʻa e Fakamoʻui naʻe toki mavahe mai pē mei ai he taʻu nounou ʻe tolu kuo hilí. Naʻe ʻomi ʻe he toutou fakalea ʻa Loleiní ha ʻamanaki lelei te mau ʻiloʻi foki Ia ʻi haʻamau fetaulaki mo Ia. Naʻe fakamāfanaʻi homau lotó ʻe heʻene ʻofa ki he Fakamoʻuí pea mo ʻEne ʻofa kia Loleiní ʻi he Efiafi kimuʻa he Kilisimasi momoko ko iá.