Ko e Ngāue Fakafaifekau Naʻá ku Fie Maʻú
ʻOku nofo e tokotaha ʻoku ʻaʻana e talanoá ʻi Sao Paulo, Palāsila.
Ko ha mēmipa au ʻo e Siasí, ka naʻá ku toe fie maʻu foki mo e kau faifekaú.
ʻI he hoko hoku taʻu 17, kuo ʻosi kotoa hoku ngaahi kaungāmeʻá ʻoʻoku he ō. Ne nau hiki mamaʻo ʻaupito, ngāue fakafaifekau, pe ʻikai toe hoko ko haku ngaahi kaungāmeʻa. Neongo naʻe kei maʻu hoku fāmilí, ka naʻá ku ongoʻi tuēnoa. Naʻá ku ongoʻi naʻe ʻikai ha toe poupou mavahe mei hoku ʻapí, pea naʻe ʻikai ke u feangai mo e niʻihi kehé neongo naʻá ku feinga.
Naʻe aʻu ange ongo faifekau foʻou ne vahe ki homau uōtí ʻi ha ʻaho ʻe taha ki homau ʻapí ke fakafeʻiloaki mai kinaua. Naʻá na fehuʻi pe ʻe founga fēfē haʻana tokoni mai. Naʻe ʻikai ke u tokanga au ki heʻena leá he naʻá ku fakakaukau pē au ki heʻeku mamahí mo e taʻelatá. Pea pehē leva ʻe he ongo faifekaú te na fiefia ke u tokoni he akoʻi ha niʻihi ʻo ʻena ngaahi lēsoní. Naʻá ku ʻohovale au! Ko e hā te na kole tokoni ai ki ha taha ʻoku mahino ʻoku ʻikai ʻi he tuʻunga fakaeloto lelei tahá?
Ka naʻá ku tali, peá u ʻalu mo kinaua ki ha ngaahi lēsoni ʻe niʻihi. Naʻe ʻikai ngata pē ʻi hono tokoniʻi ʻe he ongo faifekaú ʻa e kakai naʻá na akoʻí ka ne toe hoko ko ha ivi tākiekina lelei kiate au.
Ko e taimi ne hiki ai e taha ʻo e ongo ʻeletaá, naʻá ku fakatokangaʻi kuo fakaʻau ke sai ange ʻeku moʻuí talu mei he taimi naʻá ku feohi ai mo e ongo faifekaú. Naʻe lahi e ngaahi meʻa naʻá ku tatau ai mo e ʻeletā naʻe hiki mai ki homau feituʻú, pea hoko atu ai pē ʻeku feohi mo e ongo faifekaú. Naʻá na fakalotolahiʻi, akoʻi, mo poupouʻi au. Naʻá na tokoni ke u ongoʻi lelei ange ʻi he ngaahi ʻaho faingataʻá. Neongo e faingataʻa ʻo e leá mo ʻena taimi tēpile femoʻuekiná, naʻe feinga ʻa e ongo faifekaú ke tokoniʻi au. Naʻe tokoni ʻa e ongo faifekaú ke u fakatokangaʻi naʻe ʻikai ke u tuēnoa. Naʻe tokangaʻi au ʻe he Tamai Hēvaní mo Hono ʻAlo ko Sīsū Kalaisí, pea mo tokoniʻi au ʻo fou ʻi ha niʻihi kehe.
Ko e taimi naʻe hiki ai ʻa e ʻeletā foʻou ko iá, naʻá ku fakamālō ange ʻi heʻene hoko ko e meʻangāue ʻi he toʻukupu ʻo e ʻEikí ke fakahaofi aú. Naʻá ku fakamālō ʻi heʻene haʻu ki he misiona ko iá he naʻe hoko ko e tāpuaki kiate au.
Kimuʻa aí, naʻe meimei ke ʻikai haʻaku toe holi ʻaʻaku ke ngāue fakafaifekau, ka ʻi heʻeku vakai ki he ongo faifekaú ni, ne tupulaki ʻeku holi ke ngāué. ʻE vavé ni haʻaku mavahe ki heʻeku ngāue fakafaifekaú, pea ʻoku ou ʻamanaki ke fai ʻeku lelei tahá maʻá e ʻEikí hangē ko ia ne fai ʻe he ongo faifekau ko iá.
Kimuʻa pea omi e ongo ʻuluaki faifekaú ki hoku ʻapí, ʻoku ou manatuʻi ʻeku ongoʻi taʻelata ʻi ha pō ʻe taha peá u lotu. Naʻá ku kole ki he ʻOtuá ʻaki hoku lotó kotoa ke Ne fekau mai ha kaungāmeʻa pē taha ke ne tokoniʻi mo poupouʻi au. Naʻe tali ʻe he ʻEikí ʻeku lotú ʻi ha founga taʻeʻamanekina—ʻaki hono fekauʻi mai e ongo faifekaú. ʻOku ou ʻiloʻi ʻoku moʻui ʻa Sīsū Kalaisi pea ko e kau faifekaú ko ʻEne kau tamaioʻeiki.